Гуманитарнай лезксть пуроптомаса—аф озадонь седихть ащи ломаттнень ваймонь лямбосна

Гуманитарнай лезкс специальнай военнай операциянь участникненди кучсихть ламотне. Улема, эрсь эздонк лац шарьхкотькшнесы тянь эрявиксшинц.
Несколька киза мельцек специальнай военнай операциянь участникненди гуманитарнай лезкс пуропни, прважси и пачфни Сургутса эряй мокшалясь, газетаньконь пара ялгац Геннадий Наркаев.
Рузаевскяй райононь Трускляйса шачфсь Геннадий Сергеевич аф весть лезксть усксезе сонць. Тяфта ульсь ня шитнень. Валонзон коряс, тядде лезкс прважасть нилецеда, а сембоц тянь тиендезь комозьшкаксть. Сургутонь общественнай, волонтёрскяй организациятне, предпринимательхне, аф озадонь седихть ащи ломаттне фалу анокт венептемс лездыень кядьснон.
Апрельть васенце пялестонза ускф лезксса (самай сонь пачфтемонза якась Геннадий Наркаев) ульсть Макеевкань госпитали медикаментт, медицинскяй оборудования, перевязочнай материалхт-месть. Тяда башка, пачфтьфт алгань щапт, гигиенань средстват, маскировочнай сетьть, окопонь штатолхт, генераторхт, пянакутт-буржуйкат, коське душт, ярхцамбяльхть—коптиндаф куя, банкас салыяфтф перень сёрот, кудонь вареньят, конатнень максозь Сургутонь аватне.
Геннадий Сергеевич мярьгсь, што госпитальда башка сонь учсазь нинге ниле адресс коре, коза уски гуманитарнай лезкс. Кой-мезть марстонь вийса кочказь и аноклазь инголенди получаф заявкатнень коряс. Подразделенияньконь мархта мокшалясь кирди соткст фалу.
«Гуманитарнай эрь грузсь—тя Сяськомати Сургутонь общественнай организациятнень, волонтёрхнень, предпринимательхнень и ламотнень лиятнень марстонь путкссна»,—мярьгсь сон.
Оцю спасиба азсь сятненди, кит фалу анокт лездомс. Кепотьксонди, «лентанять тона ширеса» аляньконди-цёраньконди эряви машина. Мокшалясь, марса пуроптф ярмакть лангс, сонь рамасы, кда эрявксты ремонт—рамай запчастьт, а ремонтонь тиихне семботь тисазь и эсь тевснон инкса пандома аф сявихть.
Оцю спасиба Геннадий Наркаевонди и сембонди сятненди, кит лезнихть боецоньконди. А аляньконь и цёраньконь учсаськ куду курокста мрдамаснон. И, конешна, Сяськома мархта!
Татьяна Альшина.