Газетаса сяда тов азонттама мокшень од ломаттнень колга. Кенярдемакс арси ся, мзярда няйсак, што ётксонк улихть стирьхть и цёрат, конат аф ащихть тевфтома, а лама мезе тиендихть родной кяльть ванфтоманкса. Аф кунара корреспондентоньке васетькшнесь мокшень стирть Маргарита Чапайкинать мархта, кона пара мяльса отвечась сонь кизефксонзон лангс.
—Маргарита, азонтт, пожалуйста, коса шачеть-касоть?
—Шачень Торбеевскяй райононь Варжеляй мокшень велеса. Тоса аделайне школать зрнянь медаль мархта. Тяни тонафнян Н.П.Огарёвонь лемса Мордовскяй госуниверситетса, филологическяй факультетса, журналистикань отделенияса 3 курсса, сёрмадан мокшень кяльса стихотвореният, кельгса конькаса курькснемазень, книгань морафтомазень.
—Мес кочкайть филологическяй факультетть?
—Нинге 8-це класса тонафнемста сань мяльс арамс рузонь кялень учителькс, но сяльде сембось полафтсь и поступань журналистикань отделенияв. Аф каендан, мес кочкайне журналистонь тевть. Сон панжи од кит, содафты лама ломань мархта. А нинге мунь мяльс коре работа.
—Кода ушедсь работама кице? Удалась-аш ни пуроптомс опыт?
—Варжайне эсь прязень аф фкя тевса, работань газетаса, радиоса и телевиденияса. Ушедонь покодема 2-це курсса. Сёрматкшнень 8-10 куля шити. Светлана Пивкинась, кона университетса вятезе «История мордовской журналистики» предметть, тердемань «Вайгели» покодема. Радиоса работамась мялезон, пяк пара ульсь покодемс тоса, коса кулеви мокшень родной кяльсь. Кизонда практиказень ётайне «Сияжарса». И вов аф кунара ушедонь работама телевиденияса.
—Арьсят-аф сяда товга покодемс тя вастса?
—Васенце курсса ульсь преподавателезе Анастасия Смирнова. Сон—Мордовиянь содаф тележурналист, корреспондент. Эвондась оцю мялезе тумс киганза.
—Кода ушедоть стихотворениянь сёрмадома и кодама прябалат и темат эсост кепсят?
—Тя тевса вийнень ушедонь варчсемост 9-це класста меле. Сёрмадонь фкя стихотворения и тевозе тусь. Тяшнян эста, мзярда тейне уленди кальдяв или, меколанкт, пяк пара ваймосон. Тунда улень музыкань и поэтикань «Видьме» мероприятияса, коса васенцеда лувине мокшень кяльса стихотворениянень.
—Няеви, што пяк кельгсак мокшень кяльть.
—А кали ули мезевок мокшень кяльть коряс сяда питни? Сонь эряви ванфтомс. И аф кржа тянкса тиендихть национальнай СМИ-тне. Мзярдовок аф виздема шачема кяльцень эзда, а меколанкт, инксонза маряма гордость.
—Маргарита, кодама совет максолеть од ломаттненди?
—Кда ули мяленте мезевок сатомс, кулхцондость эсь прянтень, эсь седиентень. Мзярдовок тяда варжаксне фталу, а моледа инголи, эста эряфса сембось ули лац. Тясть юксне родной кялентень, эсь юронтень. Кда, кепотьксонди, морафттада шачема кяльса литература—сонь ванфтомасонза тя оцю аськолкс.
—Спасиба!
Илья Александров.