Игорь Савин:  «Родинаньке фкя и кие, кда аф минь, сонь  араласы?!»

Тяни минь эрятама аф сетьме пингста, мзярда пелемань аф содай земляконьке СВО-нь зонаса няфнесазь пряснон странань афкуксонь патриотокс, достойнайста полаткшнесазь атяснон и алянь атяснон—Великай Отечественнай войнань геройхнень тевснон. Эрсь эздост тиенди путкс нацизмать каршес тюремати, аралакшнесы мирть, кемоста ащи Россиять сай пингонц инкса.
…Игорь Савинонди 33 киза. Шачсь и кассь сон Кочкуровскяй райононь Воеводское велеса. Тястонь школаса аделась 9 класст, а сяльде тонафнесь трактористонди-машинистонди Качелайскяй СПТУ-са. Шумордамдонза меле ётась срочнай служба армияса. Служась цёрась Дальняй Востокса. Мзярда мрдась куду, аф лама пинге работась Кочкуровскяй райононь Семилей велеса элеваторса. Сяда тов трудендась аф фкя лацонь работаса Большеберезниковскяй и Краснослободскяй райоттнень эса. А меле тага мрдась шачема-касома аймакозонза и лиссь покодема «Норов» агрохолдингу.
2022 кизонь октябрьста Игорь Александрович мобилизацияс коре сявфоль СВО-в. Пцтай колма кофт ётнесь боевой слаживания Ульяновскяйса. А тоса сявфоль фронту. 4-це батальононь 88-це бригадать лувксса пцтай киза пяшкотькшнесь боевой задачат Спорное посёлкать маласа. Стрелоксь—гранатомётчикть помощникоц Игорь Савин фалу ульсь передовойса, боевой ялганзон мархта кирдезь оборонань васенце линиять и васенцекс «васьфнезь» вражескяй атакатнень.
—Ульсь пелема?—кизефтеськ корхнемстонк СВО-нь ветеранть.
—Ульсь, но сон курокста ётась. Вастозонза эвондась кемама, што сят, кинь мархта тон молят бойс, аф каттядязь. Аф весть савсь няемс, кода минь цёраньке ёрясть пря пулятнень алу, кяшендезь эсь мархтост боевой ялгаснон, тарксезь тюремань паксяста ранендафнень. Передовойса, кода аш косовок, шарьхкотькшнесак мезе стамсь боевой братствась! СВО-са мунь од афкуксонь ялгат республиканьконь ламоц уженянзон эзда. Фкя-фкянь мархта кирттяма кеме соткст.
2023 кизонь сентябрьста батальонць, коса служась земляконьке, ётафтфоль Клещеевка велеть малас. Октябрьста боевой задачань пяшкодемста Игорь Савин повсь мина лангс и стакаста ранендафоль. Апак ватт, што медицинскяй лезкссь максфоль пяк курокста, цёрась лядсь фкя пильголапафтома.
Госпитальса пчксемда меле Игорь Александрович мрдась куду. Оборонань министерствать вельде СВО-нь ветеранти питнефтома максфоль протез, конань мархта сон саворне тонаткшни якама.
Корхнемста Игорь Александрович аф весть шарфнесь мяль тылть ширень кирдеманц лангс, конань СВО-нь ётафтома вастса боецне марьсесазь эрь шиня и сембе седиса.
—«Норов» агрохолдингсь, кепотьксонди, тя пингс ванфтсы мельган рабочай вастозень,—азозе цёрась.—Передовойса аф весть получсень гуманитарнай лезкс предприятиять эзда. И тянивок, кудса улемстон, агрохолдингонь сотрудникне сашендыхть варжамон и лезнихть, кда тя эрявксни.
Спасибамань валхт ветеранць азонды и «Защитники Отечества» фондть филиалонцты. Сонь представителенза лездсть курокста получамс ранениянкса региональнай выплатать и тянивок лезнихть эрь-кодама документонь-мезень кочкамаса. Социальнай координаторсь Римма Овчинникова сидеста гайфни ветеранти, кизефнесы кода тевонза, шять, мезевок эряви.
Тячи СВО-нь ветеранць стак аф ащекшни. Кудонь, кудъётконь тевда башка сон сидеста васетькшни школаса тонафнихнень мархта. Аф кунара, кепотьксонди, примась участия тонафнемань од кизоть ушедоманцты лемтьф торжественнай мероприятияса Саранскяень 9№ школаса. Игорь Александрович аф аньцек арьсесь шабатненди сатфкст тонафнемаса, но и кошардозень кельгомс эсь шачема-касома масторснон, ванфтомс сонь.
«Родинаньке фкя и кие, кда аф минь, сонь араласы?!»—ня валхнень СВО-нь ветеранць фалу азонкшнесыне шабатнень мархта васедематнень пингста. И сонць эсь примерсонза няфтезе, кода эряви кельгомс и кородомс эсь странацень.
Игорь Савин казьф «За боевое отличие» медальса.
—Кда максоль тиемс тянь шумбрашизе, тячикиге тага тулень фронту, штоба марса тёжятть цёраньконь, аляньконь мархта сяда курокста сатомс сяськомать,—азозе ветеранць.—Сон обязательна кармай мельганк, вдь Россиясь нинге киндивок ашезь сяськондев!
Ольга ЕВДОКИМОВА.