Ня шитнень Мордовия Республикань Пресс-центраса ётафтовсь пресс-конференция, коса корхтамась мольфтевсь май ковонь илатнень пингста лама ломанень пуропни мероприятиятнень ётафтомаснонды анокламать колга.
Кода азозе МР-нь культурань, национальнай политикань и архивнай тевонь министрсь Светлана Баулина, сембоц республикать эзга Сяськомань Шить праздновандаманкса арьсеф тёжяньда лама мероприятия. Сембе синь водендафт касы поколениять воспитандаманцты, историческяй мялямть ванфтоманцты, ветераттнень колга заботендамати.
Фкя инь оцю мероприятиякс арась «Сурский рубеж» мемориальнай комплексть панжемац. Мемориалсь ладяф Оцю Березники велень паркса, аф ичкозе оборонительнай сооружениятнень историческяй вастснон эзда. Комплекссь панжевсь 29 апрельста.
4 майста Саранскяень эряйхнень и инжихнень учендсыне Мариинскяй театрань Симфоническяй оркестрать концертоц.
8 майста Сяськомань площадьса панжеви специальнай военнай операциянь Геройхненди памятник. Тяфта жа тя шиня «Огарёв Арена» стадионца 14:00 частста и 19:00 частста ваныхне няйсазь «На безымянной высоте» героико-патриотическяй театрализованнай спектакльть. Эсонза примай участия 2900 ломань. Билеттнень ули кода питнефтома получамс Саранскяень сембе основной театратнень и музейхнень, а стане жа РДК-нь кассатнень эса.
9 майста ошть центральнай пялькссонза шиньберьф (10:00 частста сявомок) кармайхть эрь-кодама мероприятият, коса примай участия лама од ломань.
Мордовия Республикать эзга МВД-нь общественнай порядкать ванфтоманц коряс полициянь начальникть заместителец, полициянь полковниксь Владислав Пинаев азозе, што МР-ть эзга Внутренняй тевонь министерствать мархта мольфтеви Великай Сяськомать 80 кизонц праздновандамста граждаттнень общественнай безопасностьснон обеспечендаманкса оцю работа. Лама ломанень пуропни мероприятиянь ётафтома васттне инголенди сявовихть охрана алу. Арьсефт досмотровай мероприятият, конатнень пингста тевс нолдави лама техническяй средства.
Кода пачфтезе Мордовия Республикать эзга Росгвардиянь Управлениять начальниконц заместителец, полициянь полковниксь Василий Бикурев, майскяй илатнень пингста росгвардеецне кармайхть кандомонза службаснон виияфтф режимса. Ётафтови территориятнень обследованиясна. Тяфта жа региононь эряйхненди и инжихненди лятфтафоль, што республикасонк аф мярьгондеви нолямс тевс коптерхнень, дроттнень и пилотфтома лиенди лия средстватнень личнай целенкса.
Саранск ошень округонь оцюнять васенце заместителенц тевонзон тиендисна Алексей Матюшин азозе, што ошсь сембе вийса аноклай илать ётафтоманцты. Корхтамась мольфтеви аф аньцек культурнай мероприятиятнень колга. Ладяви дежурнай службатнень работасна. Региононь эряйхненди лятфтафоль экстреннай службатнень единай телефонцна—112. Сембе структуратнень работасна кармай водендаф сянди, штоба кода можна сяда курокста машфнемс эвондакшни прябалатнень.