Инголи, мезеньге лангс апак ватт

Мокшень цёрась Максим Васькин идькс пингста сявомок баянца и гитараса морси мокшень и рузонь морот, валхнень и музыкать конатненди тяшнесыне сонць. Родной кяльса моронза: «Мокшень велезе», «Ковнесь валдопты», «Очижить эса учан» и аф кунара тяштсь нинге фкя—«Куду ардан». Ёрай нолдамс альбом. Атерень цёрась 5 кизот работась Торбеевскяй районнай Культурань кудса. Дракинань воскреснай школаса вятсь кружок, коса тонафнезень цёранятнень и стирнятнень гитараса морама.
Ётай кизоня «Ковнесь валдопты» моронц мархта «Од вий» тяниень пингонь национальнай моронь фестивальса «Автор-исполнитель» номинацияса Максим сявозе омбоце вастть.
Мзярда теенза ульсь 10 кизот, лиссь зиян, кона полафтозе мокшень цёрать марнек эряфонц. Сон получась электрическяй травма, палсь марнек ронгоц. Павазонди, лядсь шиса.

—Максим, азонтк, пожалуйста, кинь эзда ётась тейть морамань асусь? Семьясот улихть морсихть?
—Тядязень пяк мазы вайгялец. Алязе сонць тонафнесь гитараса, баянца и кургса морама.
—А кода тон кярьмодеть тя тевти?
—Нинге ёмланяста тядязе максомань тонафнема музыкальнай школав баянонь классть коряс. Пяк кельговсь тейне тя тевсь, фкя кизоста сатыне ялганень, конат тонафнесть ни 4 кизот.
Мархтон лисьф зиянда меле, цёрашабакс «педень» алязти: рамак тейне гитара. Васенда сон атказакшнесь, кле, сурфтома аф тонадат морама инструментса. Но сембе сяка гитара тейне рамасть. Тонадыне нотатнень, а сяльде валхневок синць ушедсть кочксевома.
—Кода шачсть «Мокшень велезе» и «Ковнесь валдопты» моротне?
—«Мокшень велезе» мороть тяштине 2018 кизоня. Васенда лемоцоль «Атерь велезе»—шачема-касома уженязень колга. А сяльде, штоба морсемс мороть лия райоттнень эса, полафтыне лемонц.
«Ковнесь валдопты» омбоце морозе кельгомать колга. Эсонза азондови, кода цёрась эрь илядня прважсезе кельгоманц ичкоздень вели. То пизем, то лов алу пови, то кись аф няеви, аньцек ковнясь валдопты.
—Кода мархтот лиссь зиянць, кона полафтозе марнек эряфцень.
—Тейне ульсь 10 кизот. Срхкаме ялгазень мархта эшеляма. Меки куду самста тусь пизем. Ки лангса повсь будка, кенкшец панжадоль. Кяшеме тоза пиземть эзда. Будкать потмоса ушедонь семботь варчсема, токсема. Начколень, эста токсь и вачкодемань. Тячемс ронгсон лама пицеф вастта. Тяда меле ламос ашень корхтав, семботь шарьхкодине, а валхне ашесть азондов. Саранскяйса врачне мярьгсть, бта аф карман корхтама, аф карман стякшнема васта лангста. А кода няйсасть, эрян, якан, корхтан, тяштян морот, да нинге тонафтсайне музыкати лиятнень. Оцю спасиба тянкса Шкайти!
—Мзярс зиянда меле сашендоть эсезот?
—Зиянда меле 9 шит комасолень. Ковшка врачне старандасть ванфтомс види кядезень. Тя лиссь мархтон 2002 кизонь июньцта, а сентябрьста стянь пильге лангс. Аф содаса, кода ётайне семботь. Спасиба тядязти, сон фкя минутас ваксстон ашезь тушенда.
—Кода 10 кизоса цёранясь примазе сянь, што эряфсь тяни аф кармай тяфтамкс, кодамкс ульсь инголи?
—Лятфнеса, мзярда аньцек лисень комаста, варжакстонь види кядезень лангс. Ушедонь курмоштама мокшендазень. Сяльде азозь, што тя аньцек марявсь тяфта шоковай состояниять инкса. Ся пингти кядьсон ашельхть ни сурхт.
10 кизоса ашень арьсекшне тянь колга. Шарьхкодемась сась меле, мзярда касонь. Аф маряса прязень обжафокс. Да, улихть перяфкст, кда ваномс лиятнень лангс. Но ломанть вийса сембось! Кда оцю мялезе тиемс кодамовок тев, тиса. Аньцек улеза мяль! Аф эряви ащекшнемс фкя вастса.
—Мезсь макссь вийхть молемс инголи стака травмада меле?
—Улема, музыкась и лездсь. Мзярда зиянда меле маряйне гитарань струнать вайгяленц. Сяшкава сувась ваймозон, сяшкава кельговсь. Васенцеда лисень сценать лангс, мзярда тейне ульсь 17 киза. Атерьса 23 февральти лемтьф иласа морань армейскяй мора. Лятфтаса, марнек залсь цяпась стяда. Ся пингста сявомок и выступандакшнян.
—Кода ушедоть тонафнемост иттнень музыкати?
—Ломанць эвондакшни тоса, коза сонь кучсы Шкайсь. Торбеевскяй райононь Дракино велеса ули Пресвятой Богородицать Покровонц церькавоц. Видесонза монастырьса работай воскреснай школа. Районнай Культурань кудса азсть мяль, штоба тонафнелине тостонь стирнятнень и цёранятнень гитараса морама. Васенце выпускть нолдайне ни. Омбоцеть ашень кенере, сяс мес семьязень мархта ётаме эряма Саранскяи. Но тянивок, мзярда сашендан Дракинав радняньконь шири, якан воскреснай школав, ётафнян занятият.
—Мезьса сембода стакась шабатнень тонафнемста?
—Тейне стака няфтемс, кода налхкомс шумбра ломаттненди. Кона сурсь вяре кирдема, кона алува. Азомс азса, а няфтемс аф няфтеви. Иднятне молодецт, кулхцондыхть. Якась занятияс комозьшка ломань. Пяледа ламоснон тевсна лисендсь пяк лац.
—Кодама совет максолеть ограниченнай возможность мархта ломаттненди?
—Содаса стака теенть. Тейневок стака. Но эрян тянь мархта. И кизоста кизос арси сяда тёждя. Фалу мушендовихть ломатть, конат корхтафттядязь. Главнайсь, аф нолямс кяттнень. Кда нолдасайть, меки кеподемс пяк стака. Озондода Шкайти, морафнеда, якада ару кожфова, ванфтость шумбрашинтень, корхнеда ломань мархта, тяда «сёлгондов». Масторлангса лама мялень салайда, конат эрявихть нинге содамс и няемс.
Сюконян семьязти: рьвязти Елизаветати и иднянди Софияти и Даниилонди. Синь макссихть вийхть молемс инголи.
О.Белкина.

Последние новости

В Мордовии растет количество госзакупок у самозанятых

Одно из ключевых направление национального проекта «Малое и среднее...

В Мордовии благоустраивают общественные территории 

В Рузаевке в рамках федерального проекта «Формирование комфортной городской...

Команда «Бизнес-десанта»проконсультировала предпринимателей Торбеевского района

Центр «Мой бизнес»проводит активную работу в районах Мордовии по...

В Мордовии ведется капитальный ремонт дороги до с. Новая Карьга

ВКраснослободском районе Мордовии приступили к капитальному ремонту автодороги «Подъезд...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Тройцясь—Малавса

Святой Тройцять келиста отмечсесазь пцтай эрь велеса. Цебярь тяфтама...

В Мордовии растет количество госзакупок у самозанятых

Одно из ключевых направление национального проекта «Малое и среднее предпринимательство» - это поддержка самозанятых.  Почти 4,5 млрд рублей по России составил общий объем закупок у...

В Мордовии благоустраивают общественные территории 

В Рузаевке в рамках федерального проекта «Формирование комфортной городской среды» национального проекта «Жилье и городская среда» идет благоустройство Аллеи Славы на улице Куйбышева. Эта...

Команда «Бизнес-десанта»проконсультировала предпринимателей Торбеевского района

Центр «Мой бизнес»проводит активную работу в районах Мордовии по информированию предпринимателей о возможностях государственной поддержки. На этой неделе специалисты провели встречу с представителями малого...