Крашенинникофнень семьясна касфтсь российскяй колма офицерхт, конат честь мархта лемдезь эряфснон Родинати служамати. Роман Крашенинников шавовсь тя кизоня специальнай военнай операциянь ётафтома вастса воинскяй долгонц пяшкодемста.
19 декабрьста Мордовиянь Оцюнясь Артём Здунов васетькшнесь геройть тядянзон-алянзон Сергей Николаевичень и Лариса Владимировнань мархта, штоба максомс теест Мужествань орденть, конань мархта куломдонза меле казьф синь цёрасна.
«Роман Сергеевичень инкса гордость маряй марнек республикась. Тя оцю юмафкс тейнек. Оцю сюкпря теенть, мес касфтоде тяфтама цёра»,—мярьгсь Артём Здунов казнеть максомста.
Роман Крашенинников служась парашютно-десантнай полкса, разведротаса получазе боевой снайперонь квалификациять, тяддень март ковста прважафоль СВО-нь зонав. Роман шавовсь Херсонскяй областьса боевой задачань пяшкодемста. Командованиясь и боевой ялганза фалу корхнесть колганза, кода оцю опыт мархта профессионалонь и цебярь боевой ялгань квалма, кона фалу анок самс лездома. Теенза ульсь 28 киза…
Романонь дуганоц стане жа сотнезе эряфонц воинонь тевть мархта. Служась Грознайса, ашезь ляда ширеса специальнай военнай операциять эздовок.
Родинати служамати цёратне усковсть аляснон Сергей Николаевичень кепотьксонц коряс. Сон лама киза служась внутренняй тевонь оргаттнень эса, аф весть улендсь командировкаса командованиять мархта путф задачатнень пяшкодеманкса. СВО-ть ушедомста Свято-Предтеченскяй обществань казаксь Сергей Крашенинников «Ермак-15» казачьяй отрядонь взводонь командиркс пяшкотькшнесь украинскяй националисттнень кирдемаснон коряс боевой задача. Лариса Владимировна фалу ульсь кеме тылкс поланцты, касфтозень цёраснон, конат арасть кепотьксокс од поколенияти.
Чайда симомста корхтафтфтольхть мобилизованнайхненди лезксонь максомань и од ломаттнень патриотическяй воспитанияснон мархта сотф кизефксне.
Васедемаса стане жа ульсь Саранскяй и Мордовскяй митрополитсь Зиновий. Сон мярьгсь: «Эрь ломанць, кона стясь эсь странань араламань кить лангс, канневи Отечествань святой аралайхнень лувксс. Цёрантень колга мялямсь кармай эряма лама век».