Тяддеть Россиянь Президентсь Владимир Путин азозе Семьянь кизокс. Семьясь—тя обществать ёмла ся пялькскац, косот тонь инь мала ломаттне, конат фалу анокт тейть лездомс и мзярдовок аф каттядязь стака пингста. Семьяса, коса сембось сотф фкя-фкянь шарьхкодемать и кельгомать мархта, касыхть павазу и цебярь итть.
Тяфтама кеме семьят улихть и Инсарскяй райононь Исавелеса. Фкясь эздост Миронофнень семьясна. Мирттне-рьвятне, Александр Николаевич и Рита Шамильевна, касфтыхть колма итть: кафта цёрат и стирь.
Синь семьясост васенце вастти фалу путневи покодемась. Александр Николаевичень ули фермац Навлей велеса. Мокшаляти 2011 кизоня удалась примамс участия «Начинающий фермер» программаса.
Рита Шамильевна учитель Исавелень школаса, вяти немецонь и английскяй кялень урокт. Иттне лувондсазь сонь цебярь педагогокс и оцю мяльса якайхть уроконзонды. Тяда башка, Рита Шамильевна кельгсы творчествать, сон морси велень ансамбльса.
Тядятне-алятне касфтсть асу итть. Инь оцюсь, Кирилл, тонафни Н.П.Огарёвонь лемса МГУ-нь Историко-социологическяй институтса, сувси студенческяй совету и профбюров, примси участия университетть общественнай эряфсонза. Сон морай музыкальнай инструментса, ялгафты спортть мархта.
Омбоце шабасна, Анастасия, кона меля поступась Н.П.Огарёвонь лемса Мордовскяй госуниверситетонь ФДП-нь и СПО-нь факультету, ёрай арамс программистокс. Школаса тонафнемста фалу примсесь участия олимпиадатнень, пялькстоматнень, мероприятиятнень эса. Стирсь лац тонафнесь школаса. Анастасия аф виздихнень эзда, фалу анок кярьмодемс од тевс, ошса мусь лама ялга, сувась университетть общественнай эряфозонза.
Миронофнень колмоце идьсна Захар, тонафни Исавелень школаса 1-це класса. Ёрай улемс аканц Настянь и альняканц Кириллонь лаца.
Трудта и тонафнемада башка, Миронофне пяк кельгсазь спортть. Тялонда синь курькснихть соксса. Кирилл и Анастасия лац налхкихть шахматаса, аф весть сявондсть призовой вастт районнай пялькстоматнень эса. Сембода пяк мяльснон салсесыне футболсь. Кельгомать спортонь тя видти максозе Александр Николаевич. Сон тонафнесь тренеронди, а тяни кочксесы Исавелень футбольнай командать тя или тона турнирхненди.
Тяфтама семьятне апак няйхть аф лядондыхть. 2022 кизоня Миронофне примасть участия «Семья года» Всероссийскяй конкурсса. Теест удалась сяськомс республиканскяй этапса «Сельская семья» номинацияса.
Миронофнень колга ули кода азомс: синь—павазу семья. Кудсост фалу эряйхть кельгомась, фкя-фкянь шарьхкодемась. Тяфтама семьятне ащихть кепотьксокс сембонди. Арьсетяма Миронофненди сатфкст и кеме шумбраши!
Илья ПЕРВОЙКИН.