Измаил крепостть штурмоц

1787–1791 кизотнень Русско-турецкяй войнать пингста А.В.Суворовонь командованиянц ала рузонь войскатнень мархта Измаил турецкяй крепостть осадац и штурмоц.
Тя ульсь 1790 кизонь 11 (22) декабрьста. Измаилсь ульсь Турциянь крепосттнень эзда инь виикс. 1768–1774 кизотнень войнать пингста туркатне французскяй инженерть Де-Лафит-Кловень и немецть Рихтеронь руководстваснон ала тиезь Измаилть кеме вастокс, конань эзда пельсть сембе. Крепостсь ащесь Дунайть маласа панда шаматнень лангса. Кели лашмось, кона мольсь северста югу, явфнезе Измаилть кафта пяльксова, конатнень эзда оцюсь, западнайсь, лемневсь сирекс. Главнай валсь ульсь 8,5 метрань сереса и перьфканза шувфоль 11 метрань крхкалмоса лотка, конань келецоль 13 метра. Лотксь кой-коса пяшксель ведьта. Валть аралакшнезе 260 орудия, конатнень эзда 85 пушкась и 15 мортирась ащесть ляйть маласа. Аноклафоль ляцендемань и ярхцамбялень пяк лама запас. Крепостть гарнизонцонза ульсь 35 тёжянь ломань. Командиркс ульсь Айдозли-Махмет-паша.
Октябрть песта Потёмкинонь южнай армияц тусь Бессарабиять шири. Сон Измаилть сявоманцты шарфнесь башка мяль и мярьгсь Суворовонди (кона ащесь дивизиянц мархта Браиловаса) примамс Измаилть ала командованиять и эстеенза самс мяльс, валхтомс-аф осадать или кирдемс сонь сяда тов. Суворов тусь Измаилть малас, васьфтезень фталу потай войскатнень, мрдафтозень синь траншеятненди и 11 (22) декабрьста варьхмодемста фатязе туркань крепостть. Тиезе тянь стане, кода тяда инголи кивок ашезь тиенде.
40000 туркатнень эзда шиса ашезь ляда кивок. Суворов юмафтсь 4600 ломань.