Кадсь эсь колганза валда лятфнемат

Исяк, 26 июньцта, Саранскяйса панчфоль мемориальнай доска советскяй хозяйственнай, государственнай и политическяй деятельти, Мордовия Республикань Почётнай гражданинти Василий Семёнович Учайкинонди. Тянди лемтьф митингса, кона ётафтовсь Советскяй ульцянь 31№ кудть маласа, примасть участия МР-нь Правительствать Председателец Дмитрий Поздняков, Саранск ошень мэрсь Игорь Асабин, Саранскяй и Мордовскяй митрополитсь Зиновий, Василий Семёновичень стирец Людмила Васильевна, работас коре ялганза, мала ломаненза. Вятезе митингть Мордовиянь Ветеранонь советть председателец Иван Цыганок.
Василий Семёнович Учайкин ётась эряфонь и трудовой кувака ки. Сонь ули кода кандомс сембода содаф руководительхнень лувксс, конат лама тисть республиканьконь цебярь шири полафтомасонза.
Шачсь Василий Семёнович 1934 кизоня Большеберезниковскяй райононь Симкина велеса. 1956 кизоня аделазе Велень хозяйствань Ульяновскяй институтть. Шумордамдонза меле трудендась хозяйственнай, общественнай и политическяй работаса. 1956 кизоста сявомок Василий Семёнович ётась трудовой ки старшай ветеринарнай врачста сявомок Мордовия Республикань Министронь Советть председателенцты молемс. Мекольце должностьса сон работась кемгафтува киза.
Улемок МАССР-нь Министронь Советонь председателькс сон лама вийда и эрьгада макссесь республикань хозяйственнай тефнень решандамаснонды. Сонь активнай участиянц пингста мольфтевсь промышленнай и велень хозяйствань предприятиянь, эряма вастонь, школань, больницянь, идень садонь, кинь строямась, ламоц населённай пункттненди пачфтьфоль газ, няевиста полафтсь ошнень, райцентратнень шамаликсна.
Мекольдень кизотнень Василий Семёнович заняфоль республикасонк шачфнень-касфнень колга, конат тиезь содафокс ёмла родинаснон, книгань анокламать мархта—вятезе «Люди долга и чести» альманахть сёрмадоманц-нолдаманц коряс работать.
Василий Семёнович Учайкин ульсь РСФСР-нь Верховнай Советонь (1980, 1985 кизотне) Мордовскяй АССР-нь Верховнай Советонь (1975, 1980, 1985, 1990 кизотне) депутатокс. 1992 кизоста сявомок 1994 кизоти молемс покодсь «СарРост» фирмань вице-президентокс, а 1994 кизоста сявомок 1996 кизоти молемс—Мордовия Республикань Правительствать Председателенцты помощникокс.
Пенсияс лисемда мелевок Василий Семёнович лядондсь стройса, пяшксель вийда-эрьгада и оцюволь мялец служамс родной Мордовиянцты. Лама киза сон ульсь Мордовия Республикань Оцюнять видеса Консультативнай Советть председателенцты заместителькс, Мордовия Республикань Оцюнять и Мордовия Республикань Правительствать Администрацияснон видеса ветеранскяй организациянь председателькс.
Лама киза седикс-ваймокс покодеманкса казьф аф кржа оцю казнеса.
Митингть пингста Дмитрий Поздняков лувозе МР-нь Оцюнять Артём Здуновонь приветственнай адресонц, а сяльде азозе: «Василий Семёновичень мархта содаме фкя-фкянь 2007 кизоста сявомок. Сон ульсь пяк ёню, грамотнай, смузю ломанькс. Советонза лезнесть тейне кода работаса, стане и эряфса. Мархтонза седикс-ваймокс корхнематне кармайхть пяк аф сатнема».
Василий Семёновичень стирец Людмила Васильевна спасибась мемориальнай доскать панжеманц инициаторонзонды, митингс сембе пуромфненди алянц колга мялямть ванфтоманкса.
Пуромксть пингста лама пара вал Василий Семёнович Учайкинонь колга азсть сонь ялганза, кинь мархта марса покодсть лама киза, кие содазе сонь аф аньцек кода маштозь работай политическяй деятелень, но и кода панжада вайме, лиянь кулема-шарьхкодема машты ломанень.
Василий Семёнович кадсь эсь колганза валда лятфнемат. 24 июньцта теенза топодель 90 киза.
Ольга Евдокимова.