Кафкса идень тядя

Атюрьевскяй райононь Курташка велеса эряй-ащи велень хозяйствань ветеранць, кафкса идень тядясь, кельгома бабась, щавась, шнама мокшавась Л.М.Мурзайкина. Ванат лангозонза и аф верондат, што теенза 80 киза. Няеви одста, отькорьста, эрь тевсь кядьсонза лаказь-лакай. Аш стама тефт, конат теенза улельхть аф вийс коре. Кизоньберьф пульхки переса. И модамарьхть касфты, и перень сёрот. Тялонда кштирди-кодай. Велеряенза кельгсазь. Кинь мезе кизефтемац, советонкса, пара валонкса сувсихть Любовь Матвеевнань пяли. Сонь кенкшец панжада сембонди. Сембонь мархта корхтай, сембонь кулхцондсыне и максы, кда эрявксты, советт.
—А велеса эрязь лиякс аш кода,—корхтай Любовь Матвеевна.—Кенкшт ашеме пяксне мзярдовок. Фалу фкя-фкянди лезнеме. Аньцек ни тяни, пяляз урмать пингста, ушедоме лиякс пряньконь вятема. Но тя, арьсян, аф ламос. Сембось арай эсь вастозонза.
Любовь Матвеевнань эряфоц тёждя ашель мзярдовок. Шачсь Леванофнень семьяса 1942 кизоня. Мольсь Великай Отечественнай войнась. Аляц, Матвей Иванович, аф од ломанель ни. Тяда инголе ульсь Гражданскяй войнаса, сявозь Великай Отечественнай войнав. Ся пингть мокшалять ульсть ни ниле стиренза, ветецесь аньцек шачсь. Рьванцты, Евдокия Конафеевнанди, пяк стакаль. Трудендась колхозса. Мархтонза работасть и оцю стиренза. А пингонь ётазь сась войнаста Матвей Иванович стакаста ранендафста, фкя кядьса. Но вестевок ашезь пеняцякшне эряфонц лангс, ашезь кяшенде лиятнень фталу. Лия алятнень мархта ряцок трудендась, касфтсь идензон эса. Вете стиренза арасть шнама ломанькс. Колма стиренза эрясть-ащесть Владимирса. Ольга и Люба—Курташкасольхть. Вететнень эзда Любовь Матвеевна лядсь ськамонза. Кода сонць корхтай, племянниконза, сембе раднянза путыхть честь. Маласа эряйхне сидеста сувсихть варжамонза, ичкоздетне гайфнихть телефонца, азонкшнихть эсь эряфснон-ащефснон, сатфксснон колга, тердихть инжикс. Сяда одста инжикска якась. А тяни кизотневок аф сят и пингське аф инжикс якамань.
Любовь Матвеевна—авась грамотнай. Аф ваномок войнада мельдень стака кизотнень лангс, аделась Курташкань школаса сисем класст. Кеветие кизоса ушедсь покодема. Каннесь велеряензонды почта. А тоса сась покодема «Рассвет» колхозу. Трудендась фермаса. Сембе одонь кизонзон, а тя мянь нильгемоньшка киза, максозень тя хозяйствати. И мокшавась вестевок ашезь каендакшне, што работась фермаса, ашезь ту аканзон мельге Владимиру. Меколанкт, колхозса ётафтф кизонзон лятфнесыне прянь шнафтозь, оцю гордостень марязь. Тяса сон ульсь шнама ломанькс. Трудонь оцю сатфксонзон инкса казьф лама оцю казнеса. «Рассвет» колхозсь фалу ульсь инголи молихнень ёткса. Любовь Матвеевна тянемс аньцек шнамань валса лятфнесыне сонь вятиензон И.И.Понимасовонь, В.В.Тюринонь, Г.Г.Енинонь, С.В.Базаркинонь лемснон. Синь пичедсть колхозть тевонзон, велеряйхнень инкса. А кода аф лятфтамс М.А.Яшкинать, П.С.Пронинонь и трудонь лия ветераттнень лемснон, конатнень мархта трудендась 40 лама киза.
«Рассвет» колхозти сембе эсь эряфонц максозе и Любовь Матвеевнань мирдец, Павел Фёдорович. Сон рьванц коряс кизода сяда сирель, 1941 кизоннель. Кассь аляфтома. Аляц шавовсь войнаса. Кельгома рьванц мархта эрясть 40 лама киза. Колхозса передовой механизатороль. Касфтсть мянь кафкса итть. Мокшалясь кулось одста. Но семьяса, велеса лятфнесазь сидеста и аньцек шнамань валса.
Оцю гордость Любовь Матвеевна маряй и эсь идензон инкса. Ниле цёранза служасть армияса, эряй-ащи ломатть. Иван эряй Владимирса, покоди военнай заводса. Михаил и Павел лама киза трудендасть «Рассвет», «Искра» колхоснень эса, тяни якайхть Москуву ярмаконь добувама. Сергей Москуса, заняф строямань тевса. Александра, Татьяна стане жа Москусот. Галина эряй Курташкаса, Валентина—Зубово-Полянскяй районца. Любовь Матвеевнань 12 унокоц, уноконь вете идьтонза. Кирдемок мяльса рьвянятнень, офнень, семьяц пяк оцю, кудозонза аф тяльги. И тя пяк пара. Синь мархтост аф скушна. Финцне сайхть, омбонцне туйхть. А мзярксть шиньберьф гайфтихть. Аньцек кенерькшнек отвечсемс.
—Кой-коста лисян ульцяв, юкстаса куду телефонозень,—корхтай Любовь Матвеевна.—Иттне юмафтсазь покойснон. Ушедыхть гайфнема радняненди, шабраненди. Ваность, кле, тядязень, мес аф отвечай. Ашезь лисе ли мезевок мархтонза. Вов тяфта.
Ульсь пинге, пирьфоц пяшксель жуватада. Касфнесь лама перень сёра. Тянивок путни перень сёрот, аф кельгсы тевфтома ащекшнеманц. Но кизотне ни аф сят. Мезе афолеме корхта, топодсь кафксогемонь. Илац ётась мяляфтовиста. Мзяра лямбе, шнамань валда кульсь эсь колганза. Поздравляндазь велеряенза. Пяле Курташка радняц. Да и сонценьге семьяц пяк оцю.
Л.М.Мурзайкина пяк кельгсы мокшень кяльть. Содасыне и лац ванфтсыне мокшень койхнень-обуцятнень. Лама киза ни сёрматфни «Мокшень правда». Эсь кяльсонк лисенди газетать смекаензон-арьсиензон лемста арьсетяма трудонь кельги мокшавати кеме шумбраши и тёждя эряф 80 кизонь юбилейстонза.

И.Вешкин.
Снимкаса: Л.М.Мурзайкина
уноконзон мархта.

Последние новости

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

В Мордовии развивается система патриотического воспитания

В рамках регионального проекта «Патриотическое воспитание граждан» национального проекта...

Бизнес-десант посетил Ромодановский и Лямбирский районы

Третий год в Мордовии в рамках национального проекта «Малое...

ПЕТРОФНЕНЬ СЕМЬЯСНА—ИНЬ ОЦЮСЬ АРГАСА

Атюрьевскяй райононь Арга велесь кирди Петрофнень вельде. Тячи тяса...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь ошнень эзга ётафневи «Волга—река мира. Диалог культур волжских народов» Международнай этнокультурнай экспедициясь-фестивальсь. Тядде сон пуропневсь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа» лем ала форум. Сонь аноклазе и ётафтозе «Российскяй Федерациянь финно-угорскяй нароттнень Ассоциациясна» общероссийскяй общественнай организациясь...