Каланчакса 27 октябрьста панжевсь часовня Феодор Ушаковонди—мокшэрзянь масторть и российскяй флотть лездыенцты. Сонь лемонц мархта сотфт Херсонщинать историяса важнай страницатне—Ушаков стане жа лувондови Херсононь лездыкс. Сонь тяса мяляфтсазь и почитандасазь.
Святой праведнай воинть Феодор Ушаковонь часовняц, конань строямаса Мордовиясь лездсь и специалистса, и материалса, мусь васта святой лихтибрять ваксса.
«Тячи знаковай события. Нюрьхкяня пингста бславамать вельде, конанди ули кода самс аньцек вярде, эвондась тяфтама цебярьдонга цебярь часовня. Тя вастсь арай пуромома уженякс сембонди тейнек. Савор-савор сембось тяса мазоптови-тиеви. Тячиста сявомок минь аськолятама мархтонт аньцек марса. Кда Мордовиять и марнек Русть менелень покровителец—праведнай воинць Феодор Ушаков—лезни тейнек, эста тя аф оцю, но тяфтама важнай объектть, минь ялгаксшиньконь и сотрудничендаманьконь эвондамаснон мархта, сон арай лездыкс и тя крайти»,—мярьгсь Артём Здунов духовнай объектть панжемста.
Мероприятияса примасть участия Мордовиять эзда делегациянь члеттне—МР-нь Оцюнять и МР-нь Правительствать Администрацияснон Руководителец Булат Хайрутдинов, сонь заместителец Александр Сайгачёв, «Женщины за жизнь» фондть руководителец Наталья Москвитина, Мордовиянь здравоохранениянь министрсь Олег Маркин, Мордовиянь энергетикань и ЖКХ-нь министрть тевонзон тиендисна Александр Голянин и мордовскяй землячествань представительхне.
Херсонскяй областень оцюнять васенце заместителец Игорь Чагаев шарфтсь мяль, што ётай кизось ульсь Херсонскяй областти и Каланчакскяй округти знаковайкс, ушедовсть экономическяй и духовнай полафтксне. «Тинь полафнесасть эряфоньконь цебярь шири! Надиятама, што эряйхне ушедыхть мртцема эсь шачема-касома вастозост»,—мярьгсь сон.
Великай флотоводецть лемс часовнясь Каланчакса строяф Москувонь и сембе Русень Святейшай Патриархть Кириллонь и Каланчакскяй округонь благочиннайть Михаил Кулинонь бславамаснон коряс. Молебенда меле Артём Здунов ванозе святой лихтибрять и маластонза территориять. Подряднай организациясь озафтсь тяса шуфтонят, одкстоптозе освещениять—лампатне валдоптыхть российскяй триколоркс.
Артём Здунов и Игорь Чагаев стане жа озафтсть несколька шуфтоня. «Главнайсь, штоба эряйхнень улель пара мялезост, штоба ломаттне мртцельхть тяза эряма. Сяда тов карматама молема инголи аньцек марса!»—пшкядсь Мордовиянь Оцюнясь тостонь эряйхненди.