Каст и мазолготкшнек, Сире Сендру!

Республикаса аф кржа веледа, конат содафт эсь историяснон, койснон-обуцяснон мархта, коса шачсть-кассть учёнайхть, писательхть, искусствань и культурань работникт, общественнай деятельхть. Тяфтамотнень ёткс сувси и Краснослободскяй райононь Сире Сендру велесь. Сонь исяконц и тячиенц колга эсь книгасонза лац сёрмадсь тя велеса шачфсь, Н.П.Огарёвонь лемса Мордовскяй государственнай университетонь учёнайсь В.Ф.Кирдяшов.
Авторсь няфтезе, кодама событият улендсть мокшень тя велеса, кие стака пинкнень стяшендсь родинать аралама, кодама родса-плямаса содаф Сире Сендрусь, мезе тячемс тяса ванфтовсь атянь-атяньконь, бабань-бабаньконь эзда.

Васенцесь, мезсь пови сельминголет Сире Сендру вели сувамста—тя цебярь китне. Ламонцне ацафт асфальтса, лиятне петевихть, озафнефт шуфтонят. Нинге сядонга кеподи мяльце велень куттнень лангс ваномста: бта выставкас аноклафт, фкясь сяда мазы омбоцеть коряс. А вдь нинге аф пяк кунара велеса ламонц куттне пякснефтольхть, срадома-каладома лангсотольхть, «сизесть» учсемс азорснон эса. И синь састь, бта сонць Шкайсь тошкась пилезост мрдамс эсь шачема-касома шири и кярьмодемс вельмофтемань тефненди.
Шинь, ковонь ётазь Сире Сендру велесь кармась полафнемонза шамаликонц, валдомсть ульцятне, петевихть шава куттне. Кой-коса работайхть ширде саф строительнай бригадат, а кой-коса кудазорхне синць семботь тиендьсазь эсь вийсост.
—Кенярдемати аш пе, мзярда няйса, кода велень нинге фкя кудса крьвязсь толня, ташта карттнень, перяфкснень вастс, стройсевихть отт, переса касфневихть перень сёрот, перьфпяле озафневихть панчфт, сянгяря кусторкскят,—азонды Сире Сендру велень поселениянь оцюнясь Е.Н.Фомкина.—Строяйхть, петихть кутт кода од ломаттне, стане и пенсионерхне. Синь ётксост мольфтеви эсь лацонь пялькстома—кие сяда курокста, лац и мазыста петьсы кудонц, путы перяфкс, шуви эши, строяй баня, гараж. И тяфтама работат мольфтевихть марнек велеса.
Васенцетнень ёткса, кие мрдась эсь шачема-касома велезонза, тя Александр Иванович Радаевонь семьяц. Кудазорсь сембе эряфонц лемдезе Родинати служамати, сон лётчик, тяни запасса майор. Александр Иванович улендсь аф фкя специальнай операцияса, сон казьф Россиянь оборонань министерствань медальса и орденца, а тяни вельмофнесы эсь шачема ширенц. Сонь кудоц фкя инь мазысь велеса, ванондолеть и ванондолеть лангозонза. Аф куд, а налхкшкя!
—Мзярда вертолётса лиемста вярде ванондонь велетнень лангс, най лятфнень Сире Сендруть колга, тястонь лугатнень, вирьхнень, лихтибрятнень квалма, конат малат седити нинге идькс пингста,—азонды Александр Радаев.—Сяс, мзярда тунь отставкас, ламос ашень арьсекшне, коса сяда тов поладомс эряфозень, мрдань шачема-касома шири. И тянь колга аф ужяльдян.
Тяфта арьсихть и лиятневок, кие сиредембяльхть кочказе эряма вастокс Сире Сендруть. Тяса нльне пуроптф эсь аймакса шачиень, фкя велень ломанень группа, совет, конанди оцюнякс, республикаса лац содаф ломанць, Российскяй Федерациянь сенаторсь П.Н.Тултаев. Кие-кие, а сон машты эсь перьфканза кочкама стама ломатть, конат анокт шачема ширеснон вандыенц инкса хуш пантт веляфтомс. Пётр Николаевич эсь примерсонза няфтезе кода ванфтома и кирдема тядянь-алянь кудсь, мезе тиема, штоба эсь шачема велеса афольхть юкснев койхне, обуцятне, кайгольхть мокшень моротне, сиде моронятне. А кда ни пови вели и сявсы кядезонза гармониянц, тяса сембе велеряйхненди праздник, перьфпяле кштимат, морамат.
Эсь лацонза кеподи и вельмофни шачема веленц эса учёнайсь Василий Кирдяшов. Сонь блокнотоц тянивок най мархтонза, коза сёрматкшнесыне сембе полафткснень, однять, мезе уленди Сире Сендруть тячиень эряфсонза. Ломаттнень мархта васьфнемста, улеза тя «Ладямань кудса», велень библиотекаса или лавкаса, учёнайсь азонкшни ломаттненди республикаса, странаса и марнек мирса мекольце кулятнень колга, кода аралайхть Родинаньконь и Донбассонь эряйхнень эса российскяй солдаттне. Василий Филиппович сембе пинкнень кирдсь соткст эсь шачема-касома ширенц мархта, мекольце кемонь кизотнень тяса эряй най.
Кда ни лятфтаськ велеть содаф ломанензон, аш кода аф азондомс пара вайме ломанть А.С.Малаевать колга. Аф кунара теенза топодсь 100 киза. Но аф мярьгат, што Анна Сергеевна ётась тяшка оцю ки, коса улендсть и стака шит, и аф кржа кенярдема. Семботь мяляфтсы, эряфонь ётаф эрь кизоть колга анок азондомс частонь. Тя сон, войнань кизотнень, нинге од стирнякс путфоль Колапа велень школань директоркс, вятсь тястонь эряйхнень ёткса Родинаньконь араламанц коряс пропаганда. И тяфта ульсь ся пингс, мзярс изь тапав врагсь, мзярс изь са Сяськомань шись. Анна Сергеевна школати лемдсь сизьгемонь киза, вятсь рузонь кялень и литературань урокт, мекольце кизотнень работась начальнай классонь тонафтыкс. Стака азомс, мзяра выпускниконди сон макссь содамошит и лездсь лисемс эряфонь цебярь кис.
—Мон шачень и касонь рузонь семьяса, но пяк мялезон мокшень кяльсь. Сяс тя кяльса, кода няйсасть, мон лац корхтан, семботь шарьхкодьса, нльне мокшень морот и сиде моронят содан,—мярьгсь Анна Сергеевна.—Най шнакшнесайне мокшетнень культураснон, щамснон, пидефснон-паньфснон, иласнон, койснон-обуцяснон. И лувса эсь прязень павазу ломанькс, мес сембе эряфозе ётась ряцок мокшетнень мархта.
Ня валхнень кулемдост меле арась лад мялезон, мес сон тяфтама пара вайме ломань, кона тячемс лятфнесы коста молихть юронза, кинь мархта ряцок ётась эряфоц, содасы кода ванфнема ялгаксшить, фкя-фкянь мархта шарьхкодемать.
Н.Лобанов.
Фототне авторть.

Последние новости

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

В Мордовии развивается система патриотического воспитания

В рамках регионального проекта «Патриотическое воспитание граждан» национального проекта...

Бизнес-десант посетил Ромодановский и Лямбирский районы

Третий год в Мордовии в рамках национального проекта «Малое...

ПЕТРОФНЕНЬ СЕМЬЯСНА—ИНЬ ОЦЮСЬ АРГАСА

Атюрьевскяй райононь Арга велесь кирди Петрофнень вельде. Тячи тяса...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь ошнень эзга ётафневи «Волга—река мира. Диалог культур волжских народов» Международнай этнокультурнай экспедициясь-фестивальсь. Тядде сон пуропневсь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа» лем ала форум. Сонь аноклазе и ётафтозе «Российскяй Федерациянь финно-угорскяй нароттнень Ассоциациясна» общероссийскяй общественнай организациясь...