2024 кизось Российскяй Федерациянь Президентть Владимир Путинонь Указонц мархта Россияса азф Семьянь кизокс. Указть алу Владимир Владимирович кяденц путозе мелянь 22 ноябрьста.
Указть эса корхтави, што семьянь традиционнай питнишитнень ванфтоманкса, семьять араламанц мархта сотф государственнай политикать содафокс тиеманкса, 2024 кизоня Российскяй Федерацияса ётафтови Семьянь киза.
Россиянь Правительствати мелянь 27 декабрти молемс мярькфоль пуроптомс Семьянь кизоть ётафтоманц коряс организационнай комитет, конанди председателькс путфоль Российскяй Федерациянь Правительствать Председателенц заместителец Татьяна Голикова.
Российскяй Федерациянь субъекттнень (государственнай властень высшай исполнительнай оргаттнень руководительснонды) мярькфоль пуропнемс и ётафнемс эрявикс сембе пуромкснень, конат сотфт Семьянь кизоть мархта.
Лятфтасаськ, што Россияса 2008 кизось стане жа азфоль Семьянь кизокс, а мелясь странасонк лемтьфоль Педагогонь и наставниконь кизоти.
Семьясь фалу лувондовсь инь оцю питнишикс. Кеме семьятне—государствать нежец. Кеняртьфти, што мекольдень кизотнень Россияса кармась касома лама идень семьятнень лувкссна. 2023 кизоня газетасонк пачфнеме Ковылкинскяй райононь Малав мокшень велеста Ермакофнень семьяснон колга, коса касыхть сисем итть, Рузаевкаста Агаркофнень семьяснон квалма, коса мирттне-рьвятне Евгений и Наталья касфтыхть вете цёрат-богатырьхть. И тяфтама кепотькст улихть нинге.
Ламоц эксперттне, учёнайхне аф весть корхнесть, што идсь касы афкуксонь ломанькс аньцек пяшксе семьяса, коса улихть и тядясь, и алясь. Самай синь кепотьксснон лангса шабасна, касомок, пуроптыхть эстеест семьят.
Семьянь кизоть ётафтоманц колга сидеста карматама пачфнема «Мокшень правдаса» тядде. Учесть тянди лемтьф материалхнень!
Материалть аноклазе
Татьяна АЛЬШИНА.