12 июньцта Республикань Кудса ётафтовсь торжественнай мероприятия, конань пингста казьфтольхть трудовой и общественнай тевса сатфксонь сатнихне. Мероприятияса примасть участия Мордовиянь Оцюнясь Артём Здунов, МР-нь Правительствать Председателец Владимир Сидоров, МР-нь Государственнай Собраниять Председателец Владимир Чибиркин, Мордовиять эзга главнай федеральнай инспекторсь Михаил Сезганов и Саранск ошень округонь оцюнясь Игорь Асабин.
Артём Здунов поздравляндазень пуромфнень Россиянь Шить, Православнай Тройцять и Саранскяйть шинц мархта. Арьсесь мир республикань и странань сембе эряйхненди, цебярь эряф эрь семьяти.
«Пингсь моли, тняра поколения полафтсь, но Россиясь лядонды тейнек родной кудкс. Россиясь—тя минь тинь мархтонт!»—мярьгсь региононь руководительсь.
Сон азсь благодарностень валхт странать интересонзон араламань активнай участниконзонды—сятненди, кие обеспечендакшнесы безопасностть западнай рубешнень эса, работай производстваса, лезни Луганскяйста, Мариупольста и ДНР-ста саф инжихненди, сембонди, кие эрь шиня кемокснесы Родинаньконь славанц, вдь героизмась няфневи эрь шинь трудса.
«Мялезе азомс оцю сюкпря Россиянь Президентти Владимир Владимирович Путинонди ся ответственностть инкса, конань сон сявозе эсь лангозонза, конань сявозе эсь лангозонза Россиясь—русскяй мирть судьбанц, лия державатнень судьбаснон инкса, штоба перямс кить фашизмать и национализмать келемомаснонды. Тя ответственностть сави кирдемс эсь лангсост од поколениятивок. Марса кирдемась тейнек важна тячи кода мзярдовок аш. Катк касонды Россиять и минь родной Мордовияньконь славасна»,—китькстазе Артём Здунов.
Стане жа мероприятияса Мордовиянь од эряйхненди максфтольхть Российскяй Федерациянь гражданинонь паспортт.