Торбеевскяй райононь Салазгорь велеса лац содаф Манушкиттнень семьясна. Кудазорхне кафцьке учительхть. Татьяна Юрьевна аделазе М.Е.Евсевьевонь лемса МГПИ-нь (тяни МГПУ) физико-математическяй факультетть. Васенда трудендась Виндреень, меле Салазгорень школатнень эса. Алексей Алексеевич шумордазе филологическяй факультетть, вяти рузонь кялень и литературань урокт. Од ломаттне васедсть школаса, тусть фкя-фкянь мяльс, крьвязсь ётксост кельгомань цятконя и рьвяясть. И вов ни лама киза эряйхть ладязь, кельгозь и фкя-фкянь шарьхкодезь.
Алексей Алексеевич покоди Варжеляй велень средняй общеобразовательнай школаса. Татьяна Юрьевна декретнай отпускта меле покодема школав ашезь лисе, кярьмодсь фермеронь тефненди. Пирьфсна пяшксе жуватада. Кирдихть тракст, тувот, вазнят, куднармотть. Татьяна Юрьевнанди сембоса лезнихть мирдец, иденза. Алексей Алексеевич кирдьсы рьванц ширенц. И вестевок ашесть каендакшне, што кярьмодсть тя тевти.
—Велень ломанць аф содай сизема,—корхтай Татьяна Юрьевнань тядяц, велень хозяйствань ветеранць Е.Ф.Акашкина.—Сембе эряфозень ётафтыне велеса, пчкафтонь жуватат. Пирьфоньке фалу пяшксель жуватада. Нинге стирнякс ушедсь трудендама Татьянавок. Кирдьсайне оттнень ширеснон. Кда эряви лезкс, аф атказан, лездан пара мяльса.
Манушкиттнень колма идьсна. Оцюсь, Валерия, тонафни Москуса, столицань вузса. Стирсь пяк кельгсы химиять. Омбоце стирьсна, Виктория, тонафни Варжеляень средняй общеобразовательнай школаса. Тонафни лац. Примси участия предметнай олимпиадатнень, пялькстоматнень эса. Лисенди сяськикс, призёркс. Алексей—омбоце классонь ученик. Сонга сембоса лезды тядянзонды-алянзонды.
Инголе Манушкиттнень пяк стака и ответственнай тевсна. Тялось жуватань кирдихнень кядьста веши кафтонь-крда. Кормада анокласть сатомшка. Синь трудонь кельгихть, аф эвфтевихть кодамовок сталмонди. А лездома теест сашенды Татьяна Юрьевнань тядяц, Елена Фёдоровна. Профессияс коре сон ветеринарнай врач. Лама киза пчкафтсь жуватат, ульсь совхозса директоркс. Тяни мокшавась пенсияса. Кда стиренц сярятькстсь кодамовок жуватац, Елена Фёдоровна путы уколхт, максы таблеткат.
Алексей Алексеевич аф аньцек цебярь учитель, но и кельгома мирде и аля.
Т.Ю.Манушкинась сембе ширде павазу мокшава. Кодама стака тяза уле велеса, сонь мзярдовок аф полафтсы ошень эряфть лангс.
Илья Вешкин.
Снимкаса:
Манушкиттнень оцю и трудонь кельги семьясна.