Темниковскяй райононь Келгужа велень библиотекарть Анна Леонтьевна Нечайкинать колга газетасонк азондоме ни. 2019 кизоня мокшавась эсь мяльс коре велеса панчсь Молочниконь куд. Кизонек-тялонек тоза сашендыхть туристт, велеряйхнень тевснон колга снимандайхть фильмат и телепередачат. Аф кунара Анна Леонтьевна ялганзон мархта ушедсь нинге фкя оцю и эрявикс тев—специальнай военнай операциянь боецненди понань носоконь, варягань, шарфонь кодама.
А.Л.Нечайкина азозе: «Касть боецоньконди лямбе» акцияти кярьмодсть райононь сембе ошне и велетне. Темниковскяй районнай администрациять оцюнянц заместителец Галина Алексеевна Бабина кизефтемань, улихть-аш велесонк ломатть, конат кодальхть солдатоньконди лямбе вещат. Нежедень библиотекать видеса «Ветеран» кружоконь участницатненди. Мокшаватне А.Е.Анчина, Е.Т.Анчина, З.С.Нечайкина, Л.М.Кукушкина, В.А.Кижменёва, Л.А.Артёмова, А.И.Васляева эстокиге согласиндасть, аф ваномок лафча шумбрашиснон и лия прябаласнон лангс. Кой-конат синць тейне гайфнесть. Кле, аш возможностьсна кодамс, рамайхть и рамафнень кандсазь тейне. Ётань кудга, явонь сюрет. Кой-мзяра сюре макссь Темниковскяй районнай администрациясь, мзярошкась минцень. Ламоц велеряйхне эстокиге максозь учань понаста тяда ингольдень кодафснон, кле, нят натуральнайхть, лямбонят, сяда эждьсазь боецнень. Кода аф лездат алятненди, конат передовойсот.
Васень 2-3 шитнень аноколь носоконь кемоньда лама пара. Якшапне малаткшнихть. Кда вийсонк хуш кодавок лездомс боецоньконди—лезттама!
Кодаф паршиеньконь усксесаськ районнай администрацияв. А тоста Донбассу пачфнесыне индивидуальнай предпринимательсь С.В.Жеребцов. Васень пингть, мзярда Темниковскяй районцта мобилизованнайхнень сявозь Ульяновскяи, Сергей Васильевич пачфнесь теест ярхцамбяльхть, щапт, кямот».
Биологиянь и химиянь учительсь, мокшавась 13 киза ульсь велень школань директоркс. 2009 кизоня Келгужса школать сёлгозь. Эста Анна Леонтьевна кярьмодсь библиотекарень тевти. Библиотекаса аноклакшни и ётафни илат и васедемат. Од ломаньда велеса кржа, эряфкшуфнень мархта и кузня наряжайхть, и шра лангс аноклайхть, и морайхть—марса васьфтьсазь Од кизонь илать. Велеряйхненди тя кизоня тисть оцю казне—нолдасть Культурань куду газ. Тяда инголе аватне эжендсть пянакудть вельде.
«Арьсян Од кизоста сембонди аньцек цебярь! Оцю мялезе, штоба боецоньке сяда курок мрдальхть куду Сяськома мархта»,—мярьгсь А.Л.Нечайкина.
О.Белкина.