Кеподьсы ломанть мяленц лямбе валса

Мокшавать Мария Петровна Белкинать содасы и кельгсы марнек велесь. Сон сембонь мархта мушенды марстонь кяль, кеподьсы эрть мяленц лямбе валса. Модамарень таргамань пингть ламоц велеряйхненди лезды перень тевса, работай од ломаттнень мархта ряцок, тят вана, што 76 кизоц. Куд перьфоц вайси панчфнень потмос. Кизонда пиди-пани ульцяса, кизонь кухняса. Вов тянивок нежедень Мария Петровнанди, мзярда сон ульцясоль. Тись кочкаф тишеста чайня, а сяльде аф эряскодозь ушедоськ корхтаманьконь.
«Тейне сидеста сашендыхть од ломатть, кизефнихть, кодамоль эряфозе. Отвечсян: пяк пара эряфозе! Шачень тязк Зубово-Полянскяй райононь Велезем велеса. Семьясонк 7 итть ульсть. Тядяне-аляне—трудонь кельги ломаттельхть. Кода и сембе ся пингть, покодсть колхозса. Мзярда касонь, тейне азондозь, што шачень кудса, шамафкс мархта. Корхтайхть, тяфтама ломаттне павазуста касыхть.
Стака ульсь ся пингть тонафнемать мархта, но сембе сяка аделайне средняй школать, поступань Саранскяи педагогическяй институту, тонафнень мокшень и рузонь кялень учителькс. Ярмак ашель, эрявсь работамс, сяс колмоце курста меле ётань тонафнема заочна. Сяльде васьфтине сай пингонь мирдезень Василиень. Сон ульсь велестонк, но армияда меле комсомольскяй путёвкас коре кучезь работама Узбекистану. Васенце кизоня Василий ялганзон мархта покодсь тоннелень строямаса, кона лездсь полафтомс ляйть шудема вастонц. Сяда тов работась шахтаса, зрня таргась. Сась велезонк отпускс, сявомань моньге мархтонза эстонь СССР-нь республикав.
Узбекистанца ётасть эряфонь 30 кизоне. Шачсь цёраньке Виталий, сяльде—стиреньке Наташа. Ушедонь работама «зрнянь фабрикаса», коса вешендсть и тарксесть зрня, ся пингть сон аньцек панжевсь. Мирдезе работась панттнень эса, вешендсь руда, конань сяльде усксезь фабриказонк. А минь тиендеме переработка. Рудань фкя тоннать эзда сявондеме аньцек 3-4 грамма зрня. Конашка труд тифоль, штоба получамс ня ёмла «ямкскятнень»! Стакаль, но мялезон ульсь. 25 киза работань фкя вастса. Шумбрашити зиянонь канды условиятнень инкса тунь пенсияс 45 кизоса.
Эряме Ангрен ошса, тя Афганистанть мархта границась. Мзярда аньцек саме, лац васьфтемазь. Васенда макссть общежитияса комната, а иденьконь шачемдост меле—кафта комнатаса квартира. Сяльде получаме колма комнатаса квартира и ошть эзда аф ичкозе мода, коса дачаньколь. Аньцек аф куватьс савсь тяфта эрямс. Сембось полафтсь, мзярда 1990-це кизотнень срадсь СССР-сь. Рузонь кяльса корхтай ломаттнень лоткасть лувомдост ломанькс. Ашезь мярьгондев корхтамс рузкс, тяштемс рузкс. Рузонь школатне сёлгондовсть. Стирьхненди пельксоль ётамс ульцятнень пачк. Лавкатне шамсть. Ярмак ульсь, а рамамс ашель мезе.
Мирдезе тусь эряфста. Алязе тердемазь меки Мордовияв, кле, сак, марса сяда тёждя ули. Работаста васенда ашемазь ноля, сяс мес работань виень аф ужяльдезь, совестьс коре. Цёразе эста ни рьвяяфоль, а мон сявине Наташать, и миф дачать инкса сявф ярмакнень лангс рамаме билет и саме Мордовияв. Квартираньке тозк и лядсь, панжемаса пякстайне и кадыне. Узбекистанонь карточкасон тянемс мзярошка ярмак ули. Ёрань молемс, валхтомс, но цёразе ашемань нолда, пельсь меки аф мрдан.
24 киза ни кода Мордовиясан, шачема велесон, но сяка лятфнеса Узбекистанца эряфоньконь, мялезон тоса ульсь. Ульцяса псиль, но тонаткшнень тянди. Мезе аньцек ашезь каса перенясонк: абрикост, черешнят, персикт, хурмат. Ломаттне ульсть пара ваймот, инжиень кельгихть».
Тяни Мария Петровна эряй цёранц и рьвянянц мархта, кирди жуватат, озафни пере. Мзяра киза ни работай Велеземонь Свято-Варсонофиевскяй авань монастырьса, лезды тя или тона тевса. Церькавса ули цех: синць кочкайхть пчкафтомань тишет, тиендихть эздост лекарстват, конат лездыхть урматнень пчкафтомс.
Ётка пингстонза М.П.Белкина кельгсы вндерняса кодаманц. Пцтай сембе велети питнефтома кодась кофтат, жилеткат, носокт. Пидемань маштомошинзон колгавок содайхть сембе! Кинь кодама кенярдемац или зияноц—шра лангс пидема тердьсазь сонь.
О.Белкина.