«Мордовия Республикань Заслуженнай электротехник». Тяфтама лем аф кунара максфоль Кадошкинань электротехническяй заводонь покодити Татьяна Новиковати. И тя аф стак. Авась комозьда лама киза ни седикс-ваймокс трудендай тя предприятияса.
Школать аделамдонза меле Татьяна Николаевна тонафнесь поваронди Саранскяйса, кооперативнай техникумса. Аньцек шкайгиц тусь лиява—эряфоц сотовсь электротехникать мархта.
—Кадошкинань заводу сань 2000 кизоня. Васенда покодень грузонь усксемать коряс экспедиторкс материально-техническяй снабжениянь отделса. Пингта меле арань укладчикокс-упаковщикокс, сяльде работань слесарькс-электромонтажникокс, малярнай, пропиточнай, упаковкань участкань мастеркс, тиендень и лия тефт. 2014 кизоня заводсонк панжевсь светодиодонь продукциянь тиемать коряс од цех и мон кармань покодема тяса радиоэлектроннай аппаратурань и приборонь монтажникокс. Вов ни вейхкса кизот заняфан тя тевса,—азозе авась.
Татьяна Новиковать валонзон коряс, тя участкаса покодихть аньцек ават. Синь паендакшнихть детальхть, ванондсазь лац-аф кочкафт светодиоднай плататне, конат сяльде путневихть лампатненди и стак тов.
Работасонк сембось тиендема пяк внимательнайста, аньцяй пялькскятнень марс кочкамстост аф ноляма фкявок эльбятькс. Тя аф тёждя, а сяс аф сембонь сатни кирдемшкасна,—азозе Татьяна Новикова.
Татьяна Николаевна мзярдовок ашезь панце казнень мельге. Виде ваймокс покодеманкса казнетне синць мушендсазь азорснон.
Сон сашенды работама оцю ответственностень марязь и тиендьсы эсь тевонц стане, штоба меле афоль уле визькс заводстост ноляви продукциять инкса. 2016 кизоня Т.Н.Новиковась сяськсь «Профессияс коре инь цебярсь» конкурсса. 2021 кизоня казьф Мордовия Республикань Промышленностень, наукань и од технологиянь министерствать Почётнай грамотанц мархта. И вов тядде сон арась республикань Заслуженнай электротехникокс.
—Мон кельгса эсь тевозень, заводоньконь, коллективоньконь. Аватне, конатнень мархта покодян, пяк цебярь ломатть, афкуксонь ялгат. Лангозост ули кода надиямс, синь лездыхть, кда эрявксты. Кеман, предприятияньконь ули вандыень шиц. Вдь тя заводть эзда ламода ащи марнек Кадошкинать эряфоц. Кда сонь сёлгсазь, коса тейнек сембонди работама? Монь аш мялезе тумс лия васту. Тяса мон шачень, тясот ялгане, радняне, кудозе,—панжезе ваймонц Татьяна Николаевна.
Тячиень героиняньке вяти нинге хозяйства. Сонь ули перец, коса касфни эрь кодама сёрот и имошт. Переса работамать Татьяна Николаевна сталмокс аф лувондсы. Тяса, кле, ваймоце аньцек ваймоси.
Ирина Фадеева.