Ковылкинаса эвондась спецоперацияса шавфненди стела

Мялямсь геройхнень колга, конат араласть шачема-касома масторснон эса, эряви ванфтомс сембе пингс. Тя канневи и Великай Отечественнай войнань солдаттненди, и Отечествать интересонзон араламанкса лия вооружённай конфликтонь участникненди.
Эрь пингть сонцень героенза, и тяни минь няйсаськ подвигть, конань тиендьсазь специальнай военнай операциянь участникне. Кой-коста макссемок тянкса эсь эряфснон! Колгаст мялямть минь ванфнесаськ иденьконди и уноконьконди. Великай Сяськомань шить карша Ковылкина ошса панчфоль районца ся шачфнень колга мялямонь стела, конат шавовсть СВО-ть пингста служебнай воинскяй долгснон пяшкодемста. Церемонияса примась участия МР-нь Оцюнясь Артём Здунов.
«Панчсаськ тячи тя стелать, арьсемок сянь колга, што 80 кизода тяда инголе шумордавсь инь лама веронь шудефти войнась. Атяньке аралазь минь традиционнай питнишиньконь, Родинаньконь. Тяниень пингть минь тага тюрьхтяма фашизмать каршес, аф кадондсаськ обжамс русскяй мирть. Тя войнась ашезь ёта кинге вакска,—китькстазе республикань руководительсь.—Тячи минь тисаськ сембе пингс ванфтовикс сятнень колга мялямть, кит тусть фронту и ашесть мрда—максозь сембода питнить, эсь эряфснон. Тя стелань эрь сёрматфксса—башка ломанень, башка семьянь судьба! Пачфтесть идентенди, што боецоньке максозь эряфснон геройкс. Тейнек важна, штоба синь эряльхть седисонк! Сембе пингонь мяляфтома героеньконди!»
Мордовиянь Оцюнясь спасибась сембонди, кие лезни фронтти—тя, тяконь лувксса, бизнессь, Мокшэрзянь землячествась. Благодарностень башка валхт—Ковылкинскяй райононь Почётнай гражданинти Егор Сорокинонди, кона лична заняфоль мемориалть тиемаса.
Специальнай военнай операциянь ветеранць Иван Латышев мярьгсь: «Брадоньке максозь эряфснон аф орденонкса, аф званиянкса. Максозь минь и тинь инксонк, павазу, кувака и сетьме эряфоньконь инкса. Иденьконь инкса—штоба синь мзярдовок афолезь сода, мезе стамсь войнась. Ня цёратнень ёткста ламотнень содайне лична, мархтост явондоськ кши сускомоньконь, лентанять тона ширестонза окопть—тя простой цёрат, конат эрясть ётксонк. Тяни мон надияфнян сембонь лемста: аф юкстамс фкявок лем, фкявок фамилия. Минь карматама эряма и покодема тяфта, штоба теест улель кода марямс инксонк гордость. Сембе пингонь слава геройхненди, конат лядсть вернайкс эсь присягаснонды!»
СВО-нь шавф участникть тядяц Валентина Хлынцева спасибась республикань руководствати спецоперациянь боецнень колга мялямть ванфтоманкса, семьяснон и радня ломаньцнон ширеснон кирдеманкса.
Мяляфтомань стелать панжезь республикань Оцюнясь Артём Здунов, Ковылкинскяй райононь оцюнясь Игорь Бутяйкин, спецоперациянь шавф участникть аляц Николай Тришин и шавф боецть тядяц Людмила Солдатова. Стелать ваксста вечнай толть крьвястезь СВО-нь ветераттне Иван Латышев и Евгений Тиков. Мероприятиянь участникне, конатнень ёткса ламоль райононь школатнень эзда юнармеецта и кадетта, путсть стелати панчфт. Родинань геройхне лятфтафтольхть минута кашт аф молезь ащезь.