Тяфтама оцю ила Атюрьевскяй райононь Крхтаж велеса ашель кунара. 17 майста ётафтовсть браттнень Леванофнень призснон инкса ласькомаса спортивнай пялькстомат, коза сашендсть спортсметт республиканьконь эрь-кодама уженястонза.
Кайгсь Российскяй Федерациянь Гимнась. Вал максфоль Леванофнень оцю брадснонды, Иван Семёновиченди. Сон спортонь кельги ломань. Одкс пингстонза трудендакшнесь физвоспитаниянь учителькс Атерень райононь школатнень эса. Тяни эряй Краснослободскяйса.
Ёмла брадсна, Н.С.Леванов, содаф предприниматель, велень хозяйствань наукань кандидат. Оцю лезкс максси Крхтаж велень поселенияти, средняй общеобразовательнай школати. Хуш и эряй столицаса, но сон шачема ширень афкуксонь патриот. Эрь тевса ули путксоц, лезксоц.
Мордовия Республикань Государственнай Собраниянь депутатсь С.М.Пивкин браттнень Леванофнень лемс азсь шнамань валхт, арьсесь оцю сатфкст спортсметтненди, синь тренерснонды. Ашезь ляда шири тя оцю илать эзда и Атюрьевскяй райононь администрациясь. Райононь оцюнять заместителец А.М.Сивов арьсесь оцю сатфкст браттненди Леванофненди аф тёждя тевсост, а спортсметтненди—пялькстомаса.
Крхтаж велень поселениянь оцюнясь В.И.Сунгаев азозе, што ня илатне пяк эрявихть. Мекольдень кизотнень ламоль пичефти куляда. Васенда ковидсь шорясь оцю илань ётафтомс, тоса ушедсь СВО-сь. Василий Иванович сембе велеряйхнень лемста сюконясь браттненди Леванофненди синь цебярь тевснон инкса. Велень администрациянь Почётнай грамотаса и Благодарностьса казезень браттнень Леванофнень, СВО-нь участникть Ю.В.Мурзайкинонь, кона сафоль отпускс.
Инжихнень эсь выступленияснон мархта кеняртьфтезь Рузаевкань мокшалясь Григорий Петров, райцентрань Культурань кудонь «Стирнят» триось, а тяфта жа Надежда Леванова, Ирина Черняева, Николай Пугаев и лиятне.
Оцюфнень мархта ряцок пялькстсть и шабатне. Сяськида и призёрда пяк ламоль. Васенце вастонкса казнет максфтольхть Владислав Ипполитовонди, Александр Шукшинонди, Алексей Максимовонди, Владимир Брагинонди, Екатерина Сычёвати, Елена Щукинати, Мария Торшинати, Дмитрий Шушняевонди и лиятненди. Башка отмечафоль Крхтаж велень средняй общеобразовательнай школань командась, конатнень мархта трудендай физвоспитаниянь учительсь С.И.Маскайкин. Школань директорти Н.И.Бурнайкинонди браттне Леванофне макссть топт, конат кармайхть нолявома тевс физвоспитаниянь урокста, ваймама пингста.
Илья Вешкин.