«Крымская весна» фестивальсь пуропнесь лама ломань

18 мартста топодсь кефкие киза, кода Крымсь и Севастополь ошсь сувасть Российскяй Федерациять составс.
Тя событиясь арась марстомомань и историческяй видешинь символкс—референдумса крымскяй полуостровонь эряйхне максозь эсь вайгяльснон Россиять составс суваманкса. 2014 кизонь 18 мартста Россиянь Президентсь Владимир Путин Кремляса путозе кяденц тя Указть алу. Мордовиясь арась васенце регионкс, кона ушедсь кирдема соткст полуостровть мархта. 11 кизоста республиканьке и Крымсь арасть аф аньцек шабракс, а цебярь ялгакс.
18 мартста марнек странаса ётафневихть оцю тя событияти лемтьф пуромкст. Саранскяйса тонатф вастокс арась Ледовай дворецть каршеса площадсь, коза «Крымская весна» фестивальс сашендсь пяк лама ломань кода республикать столицаста, стане и райоттнень эзда.
Фестивальть ванома пуромкшнесть эряфкшу, од ломатть, общественнай организациянь, вузонь представительхть, специальнай военнай операциянь ветератт. Кой-кит аськолясть семьянек, идьснон мархта.
Фестивальть пингста пуромфнень творчестваснон мархта кеняртьфтезь Мордовскяй государственнай филармониянь солисттне Андрей Бочканов, Александр Сергеев, Мордовия Республикань Заслуженнай артисткась Оксана Глебова, «Росичи», «Умарина», «Земляки» коллектифне, лиятне.
Тячиень шити полуостровса няевиста кассь населениять лувксоц, колмонь-крда кирсь аф работайхнень лувкссна, кассть инвестициятне. Крымсь арась нинге сядовок мялень салайкс туристтненди. Эвондасть кемотть од объектт, кепотьксонди, «Новый Херсонес» музейно-храмовай комплекссь. архитектурнай тя ансамбльсь панчфоль 2024 кизоня и примась ни 1,5 миллионда лама инжи, ётксост и Мордовиянь эряйхть.
Татьяна Альшина.