Крымскяй операциясь—4-це Украинскяй фронтть (командующайсь армиянь генералсь Фёдор Толбухин) и Приморскяй армиять (командующайсь армиянь генералсь Андрей Еременко) войскаснон наступательнай операциясна. Тя тевса примасть участия Черноморскяй флотсь (командующайсь адмиралсь Филипп Октябрьскяй) и Азовскяй военнай флотилиясь (командующайсь контр-адмиралсь Сергей Горшков). Эрявсь нолдамс воляс Крымть немецко-фашистскяй захватчикнень эзда.
8 апрельста 4-це Украинскяй фронтонь войскатне 8-це воздушнай армиять и Черноморскяй флотть авиацияснон лезксснон вельде ётасть наступленияс. 2-це гвардейскяй армиясь сявозе Армянск ошть, а 51-це армиясь лиссь противникть перекопскяй группировканц флангозонза, кона ушедсь потама. 10-11 апрельста веть наступленияс тусь Приморскяй армиясь, конанди лезнесть 4-це воздушнай армиянь и Черноморскяй флотонь авиациятне. Шобдава миннетне сявозь Керчть. 51-це армиянь 19-це танковай корпуссь сявозе Джанкойть, мезсь кошардозе противникть потамс. Виияфтомок наступлениять, 15-16 апрельста советскяй войскатне лиссть Севастопольти.
35 СУТКА
7 майста 10 частста 30 минутаста фронтонь марнек авиациять лезксонц вельде советскяй войскатне ушедозь Севастопольскяй укреплённай районть генеральнай штурмонц. Фронтть главнай ударнай группировканц войсканза 9 вайгяльбень участкаса сязезь врагть оборонанц и вишке тюремада меле сявозь Сапун-пандть. 9 майста фронтонь войскатне Северть, Востокть ширде и Юго-востокста сувасть Севастополи и нолдазь ошть воляс. 17-це немецкяй армиянь лятксне, конатнень мельге панць 19-це танковай корпуссь, потасть Херсонес мысти, коса и тапафтольхть. Пленц сявфтольхть противниконь 21 тёжянь солдат и офицер, лама техника и вооружения.
12 майста Крымскяй наступательнай операциясь шумордавсь. Советскяй войскатненди эрявсь аньцек 35 сутка, штоба машфтомс Крымса противникть вии укреплениянзон и араламс эздонза пцтай марнек полуостровть.
Крымскяй операциять пингста врагть мекольце оцю плацдармац, кона пельксоль Украинаса Правобережнай фронттненди, машфтфоль. Вете шиста воляс нолдафоль Черноморскяй флотть главнай базац—Севастопольсь и тифтольхть условият, штоба мольфтемс наступлениять сяда тов—Балкаттненди.