1759 кизонь 12 августста русско-австрийскяй союзнай войскатне тапазь Кунерсдорфть видеса прусскяй армиять
1756-1763 кизонь войнась сувафтозень эзонза пцтай сембе европейскяй государстватнень. Корольть Великай Фридрих Второень прусскяй армияц лувондовсь аф сяськовикс. Каршезонза марс шовордазь вийснон Австриясь, Франциясь, Россиясь, Швециясь, Саксониясь. Но союзникнень ёткса ашель марстонь план. Сяс Фридрих врьгятнесь лангозост и сяськондезень синь.
1759 кизоня российскяй армияти главнокомандующайкс (сонць армиясь ащесь Познань ошса) путфоль графсь Салтыков. Ломаттнень валснон коряс, кржа кие кемась, што тя «шаржуня, ёмланя и простой атяняти» ули кода ащемс Фридрихонь войсканзон каршес. Аф ваномок тянь лангс, антипрусскяй коалициять коряс союзникне марстонь тефнень коряс састь фкя мяльс.
1759 кизонь 23 июльста Франкфуртса Салтыковонь армияц шовордавсь фельдмаршалть Даунонь австрийскяй войсканзон мархта. Салтыков мярьгсь австрийскяй главнокомандующайти марса врьгятемс Берлинть лангс. Ся арьсесь. Тя ёткть Фридрих Второй прусскяй армиять инь оцю виензон мархта ётазе Одерть Франкфуртть эзда кельме ширеса. Сон сась мяльс тапамс русско-австрийскяй войскатнень, врьгятемок лангозост тылста.
12 августста Кунерсдорф велеть маласа ушедсь Сисем кизонь войнань инь оцю тюремась. Фридрихонь ульсь 48 тёжянь ломанец и 200 орудияц, генерал-аншефть Салтыковонь—41 тёжянь рузонь ломанец, 18,5 тёжянь австриецоц, 248 орудияц. Ульсь толу, вии тюрема. Салтыков мярьгсь врьгятемс противникть лангс, кона ушедсь ворьгодема. Сисем частонь тюремада меле Фридрихонь армиянц эзда ашезь ляда мезевок. Тянь колга кульсть аф аньцек Петербургса, но и союзнай сембе столицатнень эса. Елизавета макссь Салтыковонди фельдмаршалонь лем и «Пруссакнень лангса сяськити» сёрматф мархта башка медаль.
Тя сяськомада меле союзникненди панжадоль Берлинть лангс врьгятемань кись. Салтыковонь эзда учсевсть тянь коряс тефт, сон и мярьгондсь фельдмаршалти Даунонди марса врьгятемс Пруссиять столицанц лангс. Но Даун и венскяй гофкригсратсь ашесть арьсе Россиять виияфтоманц колга. Австрийскяй командованиять эняльдеманц инкса рузонь войскатне ётафтфтольхть военнай тевонди Силезияв.
Сянь, што противниксь сяськомада меле ашезь карма мезевок тиема сяда тов, Фридрих лемдезе «Бранденбургскяй кудонь» чудакс и несколька шида меле кочкась 30 тёжянь ломаньцта од войска. Рузонь армиясь кадозе Пруссиять и тусь тялонь квартирас Польшав. Войнась таргавсь куватьс. Берлину рузонь войскатне сувасть аньцек кизода меле.