КУРСКЯЙ ТЮРЕМАСЬ

23 августсь—Россиянь воинскяй славань ши. 1943 кизонь тя шиня советскяй войскатне тапазь немецко-фашистскяй войскатнень Курскяй тюремаса.
Курскяй дугась (5 июльсь—23 августсь)—Великай Отечественнай войнаса оцю полафтксонь тиемась. Стратегическяй инициативась сембе пингс ётась советскяй армиять кядьс. Орёлть и Белгородть воляс нолдамаснон лемс Москуса кайгсь васенце салютсь.
Курскяй тюремать ушедоманцты Центральнай и Воронежскяй фронттнень составса ульсь 1336 тёжянь ломань, 19 тёжянь орудия и миномёт, 3444 танка и САУ, 2172 самолёт. Курскяй выступть тылса тифоль Степной военнай округ (9 июльста сявомок Степной фронт), кона ульсь Ставкань резервакс.
Немецкяй ширесь ударнай кафта группировкатнень, конат эрявсть Курскяй выступть севернай и южнай ширесонза наступлениянь тиемс, составозост сувафтсь 50 дивизия, тяконь лувксса 16 танковай и моторизованнай, мезсь ульсь советско-германскяй фронтса вермахтонь танковай дивизиянзон 70 процентсна. Сембоц—900 тёжянь ломань, 10 тёжянть малава орудия и миномёт, 2700 молемс танковай и штурмовой орудия, 2500 малава самолёт. Противникть арьсефонц эса башка мяль шарфневсь боевой од техникать массированнайста тевс нолдаманцты: «тигр» и «пантера» танкатнень, «фердинанд» штурмовой орудиятнень, а стане жа «Фоке-Вульф-190А» и «Хеншель-129» од самолёттнень.
1943 кизоня июльть кучкаста ушедсь Курскяйть ала пяк оцю тюремать омбоце пяльксоц. 12-15 июльста наступленияс тусть Брянскяй, Центральнай и Западнай фронттне, а 3 августста, сяда меле, кода Воронежскяй и Степной фронттнень войскасна ёрдазь противникть тоза, косоль сон инголи—Курскяй выступть южнай ширезонза, синь ушедсть Белгородско-Харьковскяй наступательнай операциять («Румянцев» операциясь) эряфс ётафтомонза. 5 августста ни советскяй войскатне нолдазь воляс Орёлть и Белгородть. 23 августти Якстерь Армиянь частьтне ёрдазь противникть ши мадома шири 140-150 вайяльбес и омбоцеда нолдазь воляс Харьковть.
Вермахтсь юмафтсь Курскяй тюремаса 30 цебярьдонга цебярь дивизия, тяконь лувксса 7 танковайхть, 500 тёжянть малава солдат шавфста, ранендафста и куляфтома юмафтфста, 1,5 тёжянь танка, 3 тёжяньда лама самолёт, 3 тёжятть орудия. Советскяй войскатне юмафтсть сядовок лама: 860 тёжянь ломань, 6 тёжяньда лама танка и САУ, 5 тёжятть орудия и миномёт, 1,5 тежянь самолёт. Но фронтса виикс арась Якстерь Армиясь. Сонь ульсь сяда лама од резервац вермахтть коряс.
1943 кизоня Курскяйть ала и меле Днепрть инкса тюремаса сяськоманьке шумордазь Великай Отечественнай войнаса оцю полафткснень—«коренной переломть». Вермахтонь врьгятемань стратегияц срадсь-каладсь. Инголе ульсь кувака и веронь шудефти тюрема, но «коренной переломсь» лиссь ни.