Кяшалонь фронтовиксь Максим Григорьевич Зеленов

Атюрьевскяй райононь Кяшал велень мокшавась, трудонь ветеранць З.М.Кяльгина, мзярда эвондакшни ётка пингонц, тарксесы семейнай альбомонц. Эсонза тяниень пингонь фотографият, а сире пинкнень эзда мезевок ашезь ляда.
—Да и ашетольхть синь,—корхтай Зинаида Максимовна.—Ся тяни сотовай телефотт, фотоаппаратт. А монь одкс пингстон мезевок ашель.
И вдь виде. Мокшавать аляц, Максим Григорьевич Зеленов, Великай Отечественнай войнань ветеран, Кяшал велень шнама ломань. Атявозец, Андрей Андреевич Кяльгин, стане жа фронтовик, казьф боевой орденца и медальса. Аш войнань пингонь фкявок фотографиясна. Сяс идьснонды, унокснонды, уноконь идьснонды аш мезе няфтемс.
Тяни Кяшал вели ашезь ляда войнань фкявок ветеран, фронтовиконь удава. 1993 кизоня кулось М.Г.Зеленов. Теенза ульсь 75 киза. Мокшалясь, сисем идень алясь ульсь Украинаса, Белоруссияса, Польшаса, пачкотькшнесь Берлину. Стакаста ранендафоль. Казьфоль боевой орденца и медальса. Сон лама азонкшнесь войнать, фронтовик ялганзон квалма. Уноконза азфонзон коряс тяшнесть сочиненият.
Шачсь Максим Григорьевич странаньконь аф тёждя пингстонза. Ульсть революцият, гражданскяй войнат. Тоса ушедсь коллективизациясь, колхозонь пуроптомась. Родителенза, Григорий Иванович и Анастасия Сергеевна, простой ломаттельхть. Одста трудендакшнесть козялятнень ширеса.
Григорий Иванович эрясь 96 кизос. Уноконза лац мяляфтсазь, кода атясна котцесь кептернят и мишендезень Стрельникавонь базарса. Атясь сафнезе сембоса. Цёрацка зрнянь кядель. Ашель стама тев, кона теенза афоль тиев.
Мзярда ушедсь Великай Отечественнай войнась, Максим Григорьевичень 23 кизоцоль. Трудендакшнесь колхозса. Ётазе марнек войнать. Мрдась куду, пуроптсь семья. Рьвянди кочказе Дарья Максимовнань. Кафцьке трудендакшнесть «Партизанский» совхозса. Мирдсь ульсь сторожкс, заправщикокс, рьвясь—разнорабочайкс. Трудонь кельги кафта ня ломаттне касфтсть сисем итть. Сембе арасть шнама ломанькс. Инь оцюти, Полина Максимовнанди, курок топоди 80 киза. Эряй Вярдень Кяшалса. Иван, Мария, Зинаида стане жа Кяшалсот. Семён покодсь инженеркс-конструкторкс Самараса. Лидия—Мурманскяйса, Анна—эряй Зубово-Полянскяй райононь Сосновкаса, трудендакшнесь поваркс идень садса. Сембе синь маряйхть оцю гордость аляснон инкса.
Илья Вешкин.
Снимкаса: М.Г.Зеленов.