1945 кизонь 9 апрельста маршалть Александр Василевскяень войсканза штурмса сявозь ошть-крепостть Кёнигсбергть—Восточнай Пруссиять столицанц. Тяни—Калининградсь.
КЁНИГСБЕРГТЬ ШТУРМОЦ
Кёнигсбергскяй операциясь (1945 кизонь 6-9 апрельсь)—Великай Отечественнай войнать пингста немецкяй войскатнень каршес СССР-нь Вооружённай вийхнень стратегическяй военнай операциясна, конань вельде арьсефоль машфтомс противникть кёнигсбергскяй группировканц и сявомс ошть-крепостть Кёнигсбергть. Тя ульсь Восточно-Прусскяй операциять 1945 кизонь пяльксоц.
Кёнигсбергть историяц—тя цебярьдонга цебярь крепостть тиеманц историяц. Ошть оборонац ащесь колма линияста, конат кольцякс карксазь Кёнигсбергть.
Главнай задачась, кона ащесь 3-це Белорусскяй фронтть инголе,—сявомс ошть и, тяка пингть, тиемс тянь юмафксфтома. Сяс маршалсь Александр Василевский башка мяль шарфнесь разведкати. Авиациясь апак лотксек ёрясь бомбат противникть укреплениянзонды.
Шить и веть мольсь Кёнигсбергть штурмонцты анокламась. Пуропневсть штурмовой группат ротаста сявомок пехотань батальонти молемс. Группати макссевсть сапёрнай взвод, кафта-колма орудия, кафта-колма танка, огнемётт и миномётт. Артиллеристтненди эрявсь молемс пехотинецнень мархта, анокламок кить наступлениянди. Меле штурмсь няфтезе, што тя тевса пяк эрявсть тяфтама аф оцю, но мобильнай группировкатне.
МАРШАЛТЬ СЕЛЬМОВАНФСА
«8 апрельста мон, кода фронтонь командующай, мярьгонь войскань кёнигсбергскяй группань немецкяй генералхненди, офицерхненди и солдаттненди путомс оружияснон и лоткамс тюремда. Тя тифоль жертватнень лувксснон кирьфтамаснон инкса. Но фашисттне тяфта ашесть тие. 9 апрельста тюрематне ушедсть од вийса. Минь 5000 орудияньке и миномётоньке, 1500 самолётоньке «эрьхтезь» крепостть. Гитлеровецне макссезь пряснон пленц башка подразделенияса. Апак лотксек тюремань нилеце шитнень шумордамста Кёнигсбергсь «макссь пря».
Александр Василевский
Ошса и ошть маласа советскяй войскатне сявсть 92 тёжянь пленнай (тяконь лувксса 1800 офицер и генерал), 3,5 тёжяньда лама орудия и миномёт, 130-ть малава самолёт и 90 танка, автомашинат, тягачт и тракторхт, кодама-повсь парши мархта склатт.
1945 кизонь 10 апрельста веть Москуса максфоль Кёнигсбергть штурмонц героензон аф пелемаснонды, мастерстваснонды и доблестьснонды лемтьф 324 орудияста 24 артиллерийскяй залпста салют.
«Кёнигсбергть сявоманкса» медальсь эряфс сувафтфоль 1945 кизонь 9 июньцта СССР-нь Верховнай Советть Президиумонц Указонц коряс. Сембоц тяфтама медальса казьфоль 760000 ломань.