Лемдяень шнама ломаттне—мирттне-рьвятне Иванофне

Мария и Василий Иванофнень Старошайговскяй райононь Лемдяй мокшень велеса содасазь сембе. Мокша ломаттне, Мария Ивановна и Василий Яковлевич, марсот вов ни пцтай ведьгемонь киза. Рьвяясть и лядсть эряма ёмла родиназост. Мезенди, кле, эрявсь тушендомс шири павазонь вешендема? Кали Лемдяйсь, коса кафцьке шачеме-касоме, кальдяв?

Командировкас якамстонк улеме и ня ломаттнень ширеса. Нинге кудснон малас молемстонк шарфтоме мяль, конашкава сон цебярь. Оцю, пирьфоцка аш ни кода лац тиф! Кудсь пайгокс ащи—вов кода атяньке-бабаньке шнашендозь тяфтама эряма васттнень. Ня валхне и лядсть мялезон Мария Ивановнань и Василий Яковлевичень ширеса улемстонк.
Васенце кизефксоньке, конешна, сотфоль синцень мирттнень-рьвятнень мархта. Эняльдеме азондомс эсь колгаст. И тяса тага няфтезе эсь прянц скромнайкс улемась, конань колга аф весть лятфнень лия материалнень эса. Но кизефкс мельге кизефкс, ответ мельге ответ—тяфта Иванофне и пачфтсть эсь эряфснон-ащефснон квалма.
Мария Ивановна шачсь Лемдяйса Перфильефнень семьяса, коса ульсть ниле итть: цёра и колма стирьхть. Мирдсь и рьвясь трудонь кельги ломаттельхть, ламонь киза макссть колхозти. Стирьсна, Мария, иттнень ёткста лувксс коре омбоцесель. 8-це классть шумордазе Лемдяень школаса, а меле нинге кафта кизот тонафнесь Новотроицкое велень школаса.
«Эста школьнай автобуст-месть ашельхть. Коста машинаса пачкотькшнеме школав, коста—ялга»,—лятфни Мария Ивановна.
Меле мокшень стирсь поступась Темникавонь техникуму, кочкамок бухгалтеронь тевть. Мес сонь? Вов мезе отвечась:
«Бухгалтеркс арамать колга ушедонь арьсема нинге шабакс. Аф содаса мес, но тя тевсь пяк мялезоноль. Вов и поступань техникуму, коса тонафнень колма кизот».
Сяда тов мокшавась колма кизот пуропнесь содамошит университетса. А тяса мельганза ушедсь якама Лемдяень удалаф цёрась Василий Иванов. Василий Яковлевич шачсь-кассь лама идень семьяса, хуш ся пингть кота и сяда лама идь мархта тядятне-алятне лама иденнекс аф шта ашесть лувондов, тя тонатф тевкс ульсь.
Тонафнесь Василий Иванов Лемдяень 8 кизонь школаса. Меле получась шофёронь профессия. Служась армияса. Демобилизацияда меле мрдась Лемдяи.
И тага вал макстама Мария Ивановнанди.
«Мяляфтса, састь велень цёратне клубу. Ламоль эздост: отт, мазыхть. Ётксост ульсь и Василий Яковлевич. Аф прянь няихнень эздоль, скромнаель. Ламос якась мельган. Монга ёрань содамс сонь сяда лац».
Рьвяямдост меле Мария Ивановна мольсь рьвянякс мирденц ширес. Тяфта и ушедсь семейнай эряфсна. Колганза азондомати нинге мрдатама.
Мокшавась работась совхозса бухгалтеркс, полац—шофёркс. Кафцьке кельгозь эсь тевснон. Мария Ивановна ульсь и главнай экономистокс «Старошайговский» откормсовхозса. Цебярь специалистоль, тевонц тиендезе ваймонь путозь и оцю ответственностень марязь. Сяда тов сонь кочказь Лемдяй велень поселениянь оцюнякс. Алятнендивок аф тёждя уленди тяфтама вастса, но Мария Ивановась сембоса сафнезе. Эста макссевсть платт лофцть, сивольть коряс, лият, конатнень эрявсть пяшкодемс. Тянкса Мария Ивановна сонцьке якась велева, васьфнесь ломаттнень мархта. Велень Советть бюджетс сувсесть школась, медицинскяй пунктсь, велень бибилиотекась. Сембе вастова эрявсь ремонт, ламоль лия карьхцьта.
Пенсияс мокшавась тусь оцюнянь вастста, работамок 65 кизозонза.
Семьянь азорсь, Василий Яковлевич, совхозса шофёроль. Совхозть срадомдонза меле работась Саранскяйса воинскяй частьса водителькс. Иванофне республикать столицаса получасть квартира, но ошса ашесть эря. Прязост вестевок ашезь сашенда мяль Лемдяйста тумать колга. Тяфта тевсь ащи тянивок. Да и кали можна тумс кудста, конань Василий Яковлевич цёранзон мархта строязе сонць тядянц и алянц эряма вастснонды. Ташта «пятистенкать» вастс тяни ащи оцю куд. Пирьфоцка ёфксонь!
Мария Ивановна и Василий Яковлевич аф аньцек мирдть кудонц юрхтонц ванфтозь, но и семьянь азорть тядянзон-алянзон колга лятфнембяльть. Рьвяняснон валонзон коряс, Екатерина Васильевна и Яков Гаврилович пяк цебярь и ёню ломаттельхть.
«Мзярда сань кудозост рьвянякс, примамазь аш ни кода лац. Яков Гаврилович эряфоньберьф кузнецоль совхозса. Екатерина Васильевнань мархта эстокиге мунь марстонь кяль»,—стаки лятфни Мария Ивановна.
Мирттне-рьвятне Иванофне аф аньцек совхозса работасть, но и кирнесть ламонь жувата, перет путнесть. И кенерькшнесть, сяс мес семботь тиендезь марса, лац-ряц арьсезь. Семьяснон колга аньцек шнамань валса корхнихть лемдяряйхне.
Трудонь кельги ломаттне шачфтсть-касфтсть ниле цёрат. Ужяленди, инь оцюсь, Виталий Васильевич, ёфси одста тусь эряфста. Но мялямсь колганза фалу эряй мала ломанензон мялямса.
Вячеслав Васильевич, Александр Васильевич и Василий Васильевич музь эряфса эсь вастснон. Грамотнайхть, ёнюфт, шачфтыснонды-касфтыснонды почётонь и честень максыхть, лездыхть. Мокшетне кой-коста корхнихть: тяфтама цёратнень кодамовок стирь лангс аф полафтсайть. Тянь ули кода азомс браттнень Иванофнень колга. Кизефтьк Лемдяйса хуш кинь и аньцек пара валхт кулят кода Мария Ивановнань и Василий Яковлевичень, стане и синь шабаснон колга. Велень шнама ломатть—и сембось тянь мархта азф!
Вячеслав Васильевич эряй и работай Москуса. Сон—старшай участковай.
Александр Васильевич военнай. Рьванц, Олесянь мархта казсть Иванофненди колма уноконят-стирнят. Настюша, Ксюша и Таюша кизонда сашендыхть атяснон и бабаснон шири Лемдяи.
Василий Васильевич заняф военнай тевса. Эряй Москуса.
Вячеслав и Василий Иванофне мзярс апак рьвяякт, но тянь мельге тевсь ащема аф кармай. Синь рьваснонды и идьснонды кармайхть кеняртькшнема Иванофне. Оцю кудсост муви васта сембонди! Иванофнень эряма вастсна кунара арась родной кудкс Мария Ивановнань эряфста туф сестранц идензонды и уноконзонды. Мокшавась сембонь примасыне. Сестранц стиренц иденза лувсазь сонь эстеест щавакс.
Цёратне пяк сидеста улендихть Лемдяйса. И аф аньцек кудть строямста лездсть тядяснонды-аляснонды. Синь тиендьсазь тянь фалу и сембоса. Казендихть Мария Ивановнанди и Василий Яковлевиченди питни казнет.
Василий Васильевич аф весть прважсезень тядянц и алянц лямбе шири и санаторияв ваймама. Иванофне ульсть Крымса, Беларусь Республикаса…
Тяни Мария Ивановна и Василий Яковлевич пенсиясот. Трудовой марстонь стажсна—90-да лама киза. Ванды, 7 июньцта, топоди 50 киза, кода эряйхть марса. Зрнянь свадьбантень мархта тинь, Лемдяй велень шнама ломатть! Сембе цебярть и кеме шумбраши!
Татьяна Альшина.
Фотось Николай КАРАНОВОНЬ.

Последние новости

В Мордовии открылись новые благоустроенные зоны отдыха

В Мордовии в этом году открылось сразу 7 новых...

Благодаря нацпроекту малый и средний бизнес Мордовии получает господдержку

Министерство экономики, торговли и предпринимательства РМ совместно с Центром...

В Ичалковском районе приводят в порядок 14 км дорог

В Ичалковском районе Мордовии по национальному проекту «Безопасные качественные...

Нацпроект помогает бизнесу Мордовии стать узнаваемым и привлекать новых клиентов

Министерство экономики, торговли и предпринимательства РМ совместно с Центром...

Дан старт приемной кампании по программам «Профессионалитета»

В Мордовии начинается приемная кампания в колледжи и техникумы...

Нацпроект помогает семейному бизнесу Турбиных из Мордовии 

Министерство экономики, торговли и предпринимательства РМ совместно с Центром...

В Мордовии модернизируют службу занятости

Мордовия вошла в число пилотных регионов комплексной модернизации службы...

В Мордовии открылись новые благоустроенные зоны отдыха

В Мордовии в этом году открылось сразу 7 новых пляжей. Средства на их благоустройство были предоставлены предпринимателям республики в качестве грантовой поддержки. Работы велись...

Благодаря нацпроекту малый и средний бизнес Мордовии получает господдержку

Министерство экономики, торговли и предпринимательства РМ совместно с Центром «Мой бизнес» оказывает поддержку предпринимателям Мордовии. Так, благодаря реализации национального проекта «Малое и среднее предпринимательство...

В Ичалковском районе приводят в порядок 14 км дорог

В Ичалковском районе Мордовии по национальному проекту «Безопасные качественные дороги» в 2024 году будет капитально отремонтировано порядка 14 км дорог. В мае начались работы на...