Журналисттненди сашендови работамс лама ломанень мархта. Тянь ули кода азомс и «Мокшень правдаса» покодихнень квалма. Кочксетяма информация мокшень велетнень, синь эряйснон колга. И, мзярда киньге мархта корхнемста лятфнесаськ Старошайговскяй райононь Лемдяйть, куленттяма квалманза пяк лама пара вал. Фкясь аш ни кода шнасыне тостонь сюреса сёрмадыхнень, нулань-мезень стайхнень, омбоцесь—Шкаенди верондайхнень, конат мекольдень кизотнень тиендьсазь семботь од церькавть строяманц инкса, колмоцетне шнасазь Лемдяйть целайнек: цебярь, кле, велесь.
Тячи азонттама Лемдяй велеть исяконц и тячиень шинц колга.
«Сембось Мордовиять колга» энциклопедическяй справочникса азф вов мезе. Лемдяйсь—веле Старошайговскяй районца. Эвондась XVI векть омбоце пялестонза. Населённай пунктти васенце эряенза лем макссть Лемдяй христианствада ингольдень мокшэрзянь лемть коряс. Сон ванфтовсь Лемдяйкин/Лемдяйкина фамилиять юрсонза.
Велень эряйхне соксесть и витцесть мода, кирнесть мешт. Тянь колга пачфнихть архивнай документтне. Тяфта, «Ясашнай мордвать мешень заводонзон эзда оброконь кочксемань книгаса» (1704 кизось) азф, што «Алмачка Ишеевонь ульсь 173, Тирка Алшеевонь—168, Жданка Любимовонь—93, Митька Пужаевонь—44 нешксна».
«Пензенскяй губерниянь населённай васттнень спискасост» (1869 кизось) Лемдяйсь—Инсарскяй уездонь 161 кудста ащи казённай веле. 1904 кизоня Лемдяйса эрясь 226 ломань, а 1911 кизоня населенияц ульсь ни 1918 ломань—кда лувомс средняйста, то эрь кудти сашендовсь котонь ломань. 1976 кизоня, населениянь переписть даннаензон коряс, Лемдяйса эрясь 1112 ломань.
«Крестьянскяй хозяйствань подворнай переписть» (1913 кизось) материалонзон коряс, велеса 327 кудоль, коса эрясь 2014 ломань; ульсь 12 варма меленця, ёмла кафта лавкат, просодранка, кузенця, нешкопере, церькав, земскяй школа.
Шуфтонь васенце храмсь строяфоль 1800 кизоня и святиндафоль Пресвятой Богородицать Покровонц лемс. 1890 кизотнень кучкаста сафоль мяльс ташта храмть вастс путомс од. Строямать мархта сотф тефне шумордафтольхть 1898 кизоня. Церькавть кизонь пяльксоц тага святиндафоль Пресвятой Богородицать Покровонц лемс. Советскяй пинкнень храмсь срафтфоль-калафтфоль. Несколька кизода инголе тифоль фундамент од церькавонь строямс.
1930 кизоня Лемдяйса пуроптфоль «Од ки» колхоз, 1962 кизоня—«Старошайговскяй» откормсовхоз, 2002 кизоня—«АРМ РОС» ограниченнай ответственность мархта общества.
Мокшень тя велеса шачсть Советскяй Союзонь Геройсь Г.М.Надёжкин, Мордовия Республикань культурань Заслуженнай работниксь Мария Ивановна Бикеева, ламоц лия содаф ломаттне.
Лемдяйса улемстонк васендакиге шарфтоме мяль велеса азорондай арушить лангс. Няевсь, што лемдяряйхне арушинь кельги ломатть.
Лемдяй велень поселениянь оцюнясь Анатолий Медведев заняфоль эрь шинь тевонзон мархта, но васьфтемазь пара мяльса и отвечась кизефксоньконь лангс.
Анатолий Медведев—руз. Кунара ни эряй Лемдяйса. Шачемас коре Инсарскяй райононь Кацятов мокшень велеста. Мокшень кяльть содасы пяк лац. Кода сонць мярьгсь, и рузонь, и мокшень кяльхне теенза роднойхть. Кацятову састь эряма тядяц и аляц, и хуш кудса мархтонза корхтасть рузкс, идень садса тонадозе мокшень кяльть. Тонафнезе сонь, ряцок Кацятовонь шабатнень мархта, школаса. Тянивок лятфтазень правилатнень, падешнень. Кали, кле, можна шачемс, касомс, лама киза эрямс мокшетнень мархта и аф тонадомс мокшень кяльть?
Анатолий Викторовичень валонзон коряс, Лемдяй велень поселенияти сувсихть сонць Лемдяйсь и Николаевка рузонь велесь. Николаевкаса—70, Лемдяйса—460 эряй.
Тячиень шити Лемдяйса улихть велень администрация, фельдшерско-акушерскяй пункт, Культурань куд, библиотека, Почтань отделения, лавка, кафе. Школась сёлкфоль 2016 кизоня, сяс иттнень, эздост 23, тонафнема пачфнесазь Новотроицкое вели.
Оцюнять мархта корхнемста ашеме ёта и частичнай мобилизациять коряс сявфнень вакска. Специальнай военнай операцияс несколька ломаньцта сявфнень эзда фкять эряфоц, ужяленди, сязевсь кизода инголе.
Велеса ули «Луч» хозяйства, конань руководителец Александр Наумов. Тяса покодихне заняфт учань касфнемань тевть мархта.
Лемдяень кой-кона эряйхне покодихть «Новотроицкий» агрохолдингса.
Лятфтаськ и прябалатнень. Фкясь эздост—велень китне. Конешна, синь петневихть. Ётафневи лотконянь ремонт, но аф сатни асфальтсь. Гражданскяй ульцяса кись грунтовай. Тялонда ловсь урятцеви фалу. Лац ащихть тефне ульцянь валдоптомать (освещениять) мархта.
Велень поселениянь оцюнясь шарфтсь мяль эряйхнень активнайкс улемаснон лангс. Ломаттне, кле, аф кельгсазь тевфтома ащекшнемаснон. И тянди кепотькст улихть. Тяфта, самообложениять вельде, мзярда населениять ширде кочкаф 1 цалковайти макссевсь 3 цалковайхть, тифоль перяфкс велень калмотненди, керсефтольхть шуфттне.
Пилафоль пцтай 200 шуфта и одукс тифоль перяфкссь.
Самообложенияда меле ломаттне тага ушедсть эрявикс тев. Тяни синь кочкайхть ярмакт од церькавонь строямс. Храмть цокольнай этажец пцтай анок ни. Сембось тиендеви ломаттнень пожертвованияснон лангс. Ётксост улихть и сят, кит шачсть тяса, а тяни ширесот ёмла родинаснон эзда. Синьге венептезь лездыень кядьснон.
Лемдяйса инголи ульсь шуфтонь церькав. Тяни вастсонза ащи крёз. Вов мезе тяштьф лангсонза: «Тя вастсь святой. XVIII векста строяфоль Николай Чудотворецонь храмоц Пресвятой Богородицать Покровонц лемс престол мархта. 1960 кизоня храмсь палсь ёндолть сюнеда».
Тяни церькавсь строяви лия вастса. Лемдяйса престольнай илась 14 октябрьста—Пресвятой Богородицать Покровоц. Башка мяль шарфневи и православнай лия илатнендивок. И ули коза молемс озондома ломаттненди. Службань ётафнема сашенды отец Серафим Сире Шайгавста, а улендихть синь озондомань (молельнай) кудса. Тя тевонди помещения макссь фкя ломань.
Нинге фкя вастть колга азонттама тячи–Божией Матерть Казанскяй ликонц купеленц и эшиенц колга.
Мзярда 2010 кизоня ашельхть пизепт, кизонда аш ни кода псиль, сембе эшихнень эса ушедсь юмсема ведсь. Ломаттне лятфтазь, што ся вастса, коса тяни Божией Матерть Казанскяй ликонц эшиец, ведсь шави лихтибрякс тишеса вельхтяф эшиняса. Велеряйхне лувозь тянь «вярде» максф тевкс. Эшинять аруяфтозь, урядазь пирьфонц. Православнай ломаттне тя вастти строясть купель, кона святиндафоль Божией Матерть Казанскяй ликонц лемс. Кизоньберьф тяза сашендыхть паломникт эшеляма и веденкса. Валснон коряс, тяфта синь кочксихть вийхть-эрьгат, юкснихть урматнень колга.
Лемдяряйхне мзярдовок аф юкснесазь сятнень, кие максозе эряфонц Великай Отечественнай войнать пингста вандыень шиньконь инкса. Тянь колга лятфни памятниксь.
Мокшень велеса аф кржа сюреса сёрмадыда, мазыста морайда. Кой-кинь колга газетаса пачфнеме ни, а лиятнень квалма нинге азонттама. Тяконь лувксса и «Синельга» народнай ансамбльть колга. Лемдяйса улеме Иванофнень, Дюжиттнень, Елизавета Становкинать ширеса. Учеда од материалхт!
Татьяна ВЛАДИМИРОВа.
Фототне Николай КАРАНОВОНЬ.