Максим Александрович и Мария Степановна Царёфне шачфтсть и касфтсть ниле итть. И сембонь синь одонь кизосна прасть Великай Отечественнай войнати. Евдокия и Акулина—тылонь труженицатольхть, шобдаста шобдас покодсть Атерень колхозса. Егор Максимович и Николай Максимович тюрсть немецко-фашистскяй захватчикнень каршес. Сонць Максим Александрович войнань кизотнень стакаста сярядсь. Кулось 1944 кизонь 9 майста. Теенза ашесть учев фронтста кафта цёранза. Синь васьфтезень рьвац, тылонь труженицась Мария Степановна.
Николай Максимович сась фронтста ранендафста. Мяштец пяшксель боевой орденда и медальда. Фкясь синь эздост «За Оборону Ленинграда». Сон ульсь Ленинградонь эряйхнень мархта 900 ши, мзярда ошса ашель аф ярхцамбяль, аф уштомбяль. А ульсть вачаши, тялонь якшапт и фальхть, сёксень кельме пизепт. Николай Максимович аф весть азонкшнезе, кода араласть Ленинградть эса. Фашисттне, кода ашесть старанда, ашесть ёта инголи. Фкя бойса сон стакаста ранендафоль. Госпитальса кеподезь пильге лангс. А тоса прважазь младшай командиронь курсс. Аделамдост меле тага прважазь Ленинграду.
Аф тёждя ульсь блокаднай Ленинградса. Эрь шиня кулсесь лама ломаньда. Стакаль сембонди, кафтонь-крда военнайхненди. Но эрявсь кирдемс.
Николай Максимович казьфоль III степенень Славань орденца. Тя оцю казнеть тяфтак аф макссесазь. Атерень цёративок сон сатовсь аф тёждяста. Тя ульсь 1943 кизонь мартста. Хуш и ковсь тунданнель, но пяк якшамоль. Ленинградскяй фронтонь боецне шарьхкотькшнесть, што мезе-бди арьсекшневи тиемс. Командирхне кяжихтольхть, мековасу ласькондсть адъютантсна, анокласть Невать вельф переправа. Тя шить сембе пяк учезь. Вдь тя ульсь «наступление», сась пе гитлеровскяй блокадати. Н.М.Царёвонь дивизиянц инголе ащесь аньцек фкя задача: ётамс врагть мархта заняф берякти и кирдемс основной вийхнень самс. Моторнай лодкатне, плоттне нолдафтольхть ведьти. Врагсь ляцендсь сембе ширде. Сон ащесь сяда вярдень берякса и теенза боецне няевсть пяк лац. Ведсь, мярьгат, палсь толса. Сязендевсть Невать эзга уембяльхне, прашендсть ведти ранендафне и шавфне. Немецне сембонь тиендезь сянкса, штоба тапамс войскатнень. Невась лаказь-лакась, аноколь лисемс беряконзон эзда. Но войскатне уйсть и мольсть аньцек инголи: тифтень-кафтонь и группань. Минь боецоньке ашесть эводе фашисттнень эзда, сяшкава кяжихтольхть фрицнень лангс, нльне аноктольхть сяземс пачк. Пингонь ётазь ульсть врагонь окопнень ваксса, ашесть лоткафтов аф пулемётонь, аф автоматонь ляцендематненди. Илядь шири Николай Максимовичень дивизияц аф аньцек кемокстазень позициянзон Невать берякса, но ётась нинге кемоньшка вайгяльбе. Местностсь, противникть войсканзон расположениясна аф пяк содафтольхть. Штоба сяда лац содамс синь расположениясна, эрявсь сявомс «кяль». Ранендаф, кельме Ленинградонь модась. Мартонь шобда веня прожекторхнень цильфсна валдоптыхть пяк ичкози. Вов и врагонь окопневок, маряви лия кяльса корхтама. Царёв ялганц мархта юпадсть врагонь окопти, немецть кургс эцесть «кляп» и пачфтезь эсь окопозост. Сведениятне ульсть пяк питнихть. А шобдава наступлениясь вятевсь сяда тов. Тя заданиять инкса Н.М.Царёв казьфоль Славань колмоце степенень орденца. Тяда башка, казьф «За оборону Лениграда» медальса. Пяк ламоль Благодарносттенза Верховнай Главнокомандующайть И.В.Сталинонь эзда.
Войнав Н.М.Царёвонь сявозь 1940 кизоня. Эста сон покодсь трактористокс Атерень колхозса. А мрдась куду войнать аделамдонза меле. 900 ши и ве сон аралась и эрясь блокаднай Ленинградса. Ленинградта меле коза аньцек ашезь пачкотькшне. Ётазе марнек Советскяй Союзть, тюрсь немецнень каршес лия странатнень инкса. Куду мрдась сяськикс.
Атерьса васьфтезь рьвац, Анастасия Васильевна, тядяц, Мария Степановна, кафта сазоронза. Пингонь ётазь сась войнаста и Егор Максимович, оцю брадоц. Но сембодонга пяк кенярдсь Коля цёранянцты, кона шачсь 1941 кизоня, странаньконь инь стака пингстонза.
Войнада меле Н.М.Царёв фалу трудендась. Покодсь столяркс Атерень «Память Ильича» колхозса, сторожкс межколхознай строительнай организацияса, Атерь велень 1№ средняй общеобразовательнай школаса. А инь оцю козяшиц—кафкса иденза. Рьванц мархта касфтсть ниле цёрат, ниле стирьхть. И сембе синь шнама ломатть. Войнань ветеранть Н.М.Царёвонь 21 унокоц, лама уноконь идьтонза.
Илья ВЕШКИН.
Снимкаса: Н.М.Царёв (виде ширеса) фронтовой ялганц мархта (1941 к.).