ЛЕМТЬФОЛЬ БОЕВОЙ ДЕЙСТВИЯНЬ ВЕТЕРАНОНЬ ШИТИ

1 июльста «Защитники Отечества» фондть филиалсонза ётафтовсь торжественнай мероприятия, кона лемдевсь Боевой действиянь ветеранонь шити. Эсонза примасть участия Филиалть руководителец Алексей Герасименко, фондонь сотрудникне, специальнай военнай операциянь ветераттне и синь радня ломаньцна, а стане жа «Боевое братство», «Офицеры России» и «Юнармия» общественнай организациятнень представительсна.
«Сембе пинкнень странаньке содафоль эсь героензон мархта, конат стака пингста стяшендсть сонь араламонза. Тинь—Отечествань воиттнень, конат честь и достоинства мархта пяшкодезь воинонь долгснон, пара койснон полаткшнисна. Тинь странаньконь героенза! А фондсь—кеме тылонте, кона фалу анок максомс эрявикс лезкс и ширень кирдема! Ила мархта!»—мярьгсь Алексей Герасименко.
Илати лемтьфоль «Вагнер» ЧВК-нь боецненди боевой удостоверениянь максомань церемониясь. Фондонь филиалть руководителенц кядьста документтнень получазь 15 ломанць. Ёткстост фкясь Саранскяень эряйсь Виталий Козеняшев. Сон тусь фронту доброволецекс, ульсь штурмовой группань командиркс. Участвовандась Бахмутскяй направленияса боевой действиятнень эса. Казьф «За отвагу» медальса, «Вагнер» ЧВК-нь «Якстерь крёзонь» орденца.
«Тячи мяляфтови ши тейне и сембе цёратненди, конат примасть участия вооруженнай военнай действиятнень эса. Тя мужествань и честень ила! Кеняртьфти, што именна тя шиня минь получаме ветеранскяй удостовереният. Пяк ламос учендоме эсост! Отечествать инголе заслуганьконь лангс мялень шарфтомась пяк важна тейнек. Оцю сюкпря «Защитники Отечества» фондти ся оцюдонга оцю и эрявикс работать инкса, конань сон вятьсы ветераттнень мархта!»—мярьгсь Виталий Козеняшев.
Ошень 9№ школань тонафнись Марина Фадеева лувозе пуромфненди Саранскяень поэтть Вячеслав Новиковонь «О ветеранах СВО» стихотворениянц, кона сёрматфоль торжественнай шити. Ваныхне кулезь «Защитники Отечества» фондть гимнанц. Стане жа подписандафоль сотрудничендамать колга соглашения «Отцы России» общественнай движениять региональнай отделениянц председателенц Максим Захаровонь мархта. Геройть Николай Кондинонь алянцты максфоль «Отец солдата» медаль.
Мероприятиять шумордамста няфтьфоль концерт.