Татьяна Кузьминична Колабкинать содаса колмогемоньда лама киза. Эряй сон Атюрьевскяй райононь Бораж велеса. Теенза моли 87-це кизось. Но мокшавась нинге отькорь. Кизонда якай пангонь, кстынь, пчкафты тишень кочкама. Ули перец, коса касфты перень сёрот.
Татьяна Кузьминична ся ломаттнень эзда, конат аф кельгсазь прянь шнафтомаснон. Сонь кизосонза кржа ни лядсь ломаньда велеса. Да сятка вешихть мельгаст якама. А вов Татьяна Кузьминична, кода афолезе маря прянц, кядензон аф нолясыне, вестевок аф пеняцякшни эсь эряфонц лангс. А нинге лезды СВО-ти. Васенда учань понаста кодась кемонь парат носок. Раднянзон вельде прважазень СВО-нь участникненди. Меле тага кодась кеветие парат. Рамась танцти ярхцамбяльхть. Таня бабань казнензон овоц, Афганскяй войнань ветеранць В.Н.Исаев, ускозень Атери. Татьяна Кузьминичнанди тя тевса лезды и стирец, Зинаида Васильевна.
Эряфкшу ломанть можна шарьхкодемс. Сон содасы, мезе стамсь войнась. Аньцек ляди мялезонза аф кирдевихть сельмоведенза. Шачсь Татьяна Кузьминична 1937 кизоня. Ниле кизонятольхть теенза, мзярда ушедсь Великай Отечественнай войнась. Бораж велеса ашель стама семья, конань сон афолезе тока. Тушендсть фашисттнень каршес тюрема од алятне, цёратне. Куду лядондсть аватне, иттне, эряфкшу ломаттне. Синць эрясть пялес вачеда, но кода маштсть, лездсть фронтти. Идькс пингоц Татьяна Кузьминичнань савсь войнань кизотненди. А войнада меле кафксошка сезон якась торфонь таргама. Мзярда эряфсь сяда петевсь, мокшавась трудендась Госстрахса страховой агентокс. Эсь тевонц тиендезе совестьс коре. Ломаттнень ёткса оцюволь авторитетоц. Да и тянивок тылонь труженицась, трудонь ветеранць шнама ломань велеса. Кинь эвондай кизефксоц, сувай Колабкинать пяли. И сон киндивок аф атказакшни лездомс.
Татьяна Кузьминичнань семейнай эряфоцка ётась аф тёждяста. Ведьгемонь кизоцоль, мзярда кулось кельгома полац Василий Захарович. Мзяра сельмоведь пяярдсь мокшавась. Но кядензон ашезень нолда, эрявсь эрямс сяда тов. Ниле иденза. Сембе эряйхть Каргоньжяйса. Зинаида Васильевна—бухгалтер «Фрунзе» ограниченнай ответственность мархта обществаса. Тоса производственнай тефнень мархта заняф и Владимир Васильевич. Тевфтома ашесть ляда Василий и Николай. Мокшавать кемонь уноконза и уноконь кемонь иденза. Кафта уноконза, А.В.Исаев и Д.В.Колабкин, ульсть специальнай военнай операцияса. Синь инксост палозь палсь Татьяна Кузьминичнань седиец. А мзярда мрдасть куду, азсть бабаснонды-щаваснонды лама лямбе вал, сяс мес лездсь и тянивок лезды СВО-ти. Аноклай од посылка боецоньконди.
Лама киза ни Татьяна Кузьминична эряй ськамонза, но юкстаф ломанькс лемдемс аш кода. Шабра велеса эряйхть нилецьке иденза. Сон машты инжиень примама.
Илья ВЕШКИН.