Лезксть максоманц мархта заняфт эрь шиня

Специальнай военнай операциянь участникненди лезнихть ламотне. И тиендьсазь тянь аф кошардозь или вихца, а эсь мяльс коре. Лиякс, кле, аш кода. Кой-кит, ушедомок тя тевть, эсь перьфкаст пуропнихть ломатть, сяс мес марстонь вийса сатови сяда лама. Кода Саранскяйса, стане и целайнек Мордовияса работай гуманитарнай лезксонь максомань аф кржа группа и штаб.
«Помощь 13» волонтёрскяй сообществась эвондась 2022 кизоня октябрьста. Руководителенцты Анастасия Казанчевати максонь кизефкс: мес сообществась получась тяфтама лем?
Анастасия Алексеевна отвечась вов мезе: «Лемонь арьсемста саме мяльс, што вельденза ёратама пачфтемс сянь, мезе тиенттяма. Мезьса заняфтама? Лезксонь максомаса! Эрятама Мордовияса, а сон 13 регионць. Вов и лиссь, што «Помощь 13» лемсь пяк ладясь.
«Помощь 13» сообществась стаки максси лезкс ся боецоньконди, конат тяни специальнай военнай операциянь ётафтома зонасот. 2022 кизонь октябрьста сявомок лезкс максфоль аф аньцек Мордовиянь, но и лия региононь алятненди и цёратненди.
Кит сувсихть «Помощь 13» волонтёрскяй сообществати? Сят, кит аф озадонь седихть ащихть гуманитарнай лезксонь кочкамати и прважамати. Тяда башка, волонтёрхне котцихть маскировочнай сетьть и аноклакшнихть коське шонгаряпт.
Тя сообществать мархта ламотне кирдихть кеме соткст. Газетаса колганза пачфнеме миньге. Интернетса социальнай сетьтнень и каналхнень эса группанзон коряс няйсаськ, што волонтёрхне заняфт тя эрявикс тевть мархта эрь шиня. Пачфнихть, мезе кочкама и рамама маластонь пингть. Лездомс ули кода ярмакса, конань лангс рамави инь эрявикссь, или можна мезевок эстейть рамамс уликс спискаса и кандомс «Помощь 13» сообществать складозонза. Тяньге квалма волонтёрхне пачфнихть группаснон и каналснон эса.
Тяшнесазь, мезе нинге эряви тя или тона заявкать пяшкодеманц инкса. Кепотьксонди, тняра-тняра ярмаконя марстонь вийса кочкама медикаменттнень коряс заявкать «сёлгоманц» инкса.
Пулонят. Тяфта «Помощь 13» группаса лемневи ярмаконь кочксемась, мзярда нинге фкя заявкать пяшкодеманкса эрявксни, кепотьксонди, кафта тёжятть цалковай и кочкама тя суммась тяниёк. Эста и тяшневи, што тага нолявихть тевс пулонятне—кинь ули мялец, ся ётафни счётти пулоня—банковскяй картаста уликс аф оцю суммать. Кепотьксонди, фкясь—58, омбоцесь—95, колмоцесь—60 цалковай. Вов тяфтама пулонятнень эзда и пуропневи аф сатни суммась.
Анастасия Казанчева фалу корхни, што кой-коста оцю лезкс максси нльне аф лама ярмаконяське.
Июльть песта и августть ушетксста «Помощь 13» сообществась рамась и прважась боецоньконди рацият, палаткат, медикаментт и лама мезе лия. Волонтёрхне апак лотксек работайхть синь заявкаснон пяшкодемаснон лангса. Пади, лувиеньконь ёткса улихть ломатть, конат ёрайхть лездомс специальнай военнай операциянь участникненди. Содасть, што тянь тиемс пяк тёждя. И тяниень пингть эряви самай ся аф сатни пулонясь.
Татьяна АЛЬШИНА.