Стакаль эряфсь Великай Отечественнай войнань кизотнень. Ломаттне няйсть и вачаши, и ризф, мзярда юмафнезь фронтса тюремста маластонь ломаньцнон, но кядьснон ашезь ноля. Работасть, тушендсть фронту. Эряфсь сякокс мольсь. Лисендсть газетатне и журналхне, работасть школатне, клупне, театратне. Радиось пачфнезень Москуть вайгяленц, фронтонь кулятнень. Культурнай строительствань кизефксненди шарфневсь оцю мяль. Лувсайть ся пингонь эряфть колга книгатнень и сельминголет ётайхть эстонь событиятне. Летописень кагодгс арасть, кепотьксонди, «Мордовиясь Великай Отечественнай войнать пингста», «КПСС-нь мордовскяй организациянь очеркне» и лия литературнай изданиятне.
Оцю мяль шарфневсь школатненди. Вдь войнань пингть ламоц иттне школав ашесть яка, ашесть сатне учебникне, учебнай и хозяйственнай инвентарсь, уштомбяльсь. Учительхне тушендсть фронту, кальдявгодсь дисциплинась. 1941 кизоть песта кирсь школатнень и тонафнихнень лувкссна.
Но аф ваномок тянь лангс, школаса мольфтевсь патриотическяй ширде воспитаниянь оцю работа. Войнань кизотнень правительствась примась школать колга эрявикс постановленият. Нят обязательнай военно-физическяй ширде тонафнихнень анокламаснон, прянь вятемаснон, суворовскяй училищатнень, учительхнень и пионервожатайхнень материальнай положенияснон цебярьгофтомаснон, аттестаттнень колга и стак тов.
Аф ваномок военнай карьхцнень лангс, эрь кизоня касфневсь государствать ширде школати лезкссь. Тяфта, 1941 кизоня Мордовиять бюджетста народнай образованияти нолдафоль 80 миллион цалковай, а 1945 кизоня—100 миллионда лама цалковай. Тя лездсь касфтомс республикаса школатнень лувксснон.
Войнань кизотнень институттнень, училищатнень и курсовой мероприятиятнень вельде аноклаф 3475 учитель. 1944 кизоня Мордовиянь 59 учительсь казьфтольхть СССР-нь орденца и медальса.
Оцю мяль шарфневсь трудовой воспитанияти. Школьникне примсесть участия школьнай зданиянь, мебелень петемаса, пенгянь керомаса, паксянь тевонь тиемаса и стак тов. Тяфта, 1943 кизоня школань тонафнихне одукс тисть 949 школань здания, кочкасть художественнай литературань тёжятть книга.
Оцю лезкс макссесть школань тонафнихне республикань велень хозяйствати. Эрь кизоня паксяв лисендсть 40 тёжянь цёраня и стирня и пцтай 4 тёжятть учитель.
Ламоц школатне мольфтсть шефства животноводческяй ферматнень лангса. Аноклакшнесть тише, петнезь помещениятнень. Иттне кочксесть металлолом, лекарственнай тишет, лямбе щапт воиттненди, лезнесть фронтовикнень семьяснонды.
Общеобразовательнай школада башка, Мордовияса войнань кизотнень работасть специальнай учебнай заведеният: кафта ремесленнайхть, фкя машина кинь училища и ФЗО-нь колма школат. Войнань кизотнень училищась и ФЗО-нь школатне анокласть 15 тёжянь од специалист. Нят: токарьхть слесарьхть, машинистонь помощникт, электросварщикт, литейщикт и стак тов.
Войнань кизотнень ламоц иттне ляткшнесть тядяфтома-аляфтома, эрясть идень кудса. Тяфтама кутта Мордовияса ульсь 32. Эсост эрясь 8 тёжятть идь. Кизоста кизос кассь идень яслятнень лувкссна.
Оцю мяль войнань кизотнень шарфневсь культурно-просветительнай учреждениятненди. Аф ваномок стакатнень-сталмотнень лангс, нолявсть финансонь оцю средстват синь работаснон мольфтемс. Войнать песта МАССР-нь СНК-ть видеса пуроптфоль культпросветучреждениянь коряс управления. Библиотекатнень, клупнень, морафтома куттнень эса ётафневсть лекцият, доклатт, няфневсть концертт, кинокартинат, явондовсть газетат, журналхт.
Областной партийнай организациясь оцю мяль шарфнесь радиоть, печатть, книжнай издательствать работаснон цебярьгофтоманцты. Лезкс макссевсь и Мордовскяй научно-исследовательскяй институтти. Аф оцю коллективсь войнань кизотнень аноклась и нолдась мокшэрзянь кяльхнень и литературать, республикать историянц и экономиканц коряс аф кржа работа. Институтти оцю лезкс макссесть советскяй наукань содаф деятельхне—академиксь Ю.В.Готье, профессорхне А.И.Яковлев, Л.В.Черепнин, Д.В.Бубрих.
Войнань кизотнень кассь литературать мобилизациянь и воспитательнай ролец. Мокшэрзянь литературась лездсь маласькофтомс Сяськомань шить. Мордовиянь 78 писатель и журналист тушендсть Родинать аралама. Сят, кит ульсть тылса, тяшнесть произведеният, конат тердсть кяжи врагть каршес тюрема. Цебярь стихт тяшнесь воинць П.Кириллов. Сонь произведениянза лиссть 1945 кизоня «Войнань китнень эзга» сборникса.
Мольсь война, а стаки лисендсть мокшэрзянь писательхнень и поэттнень М.Бебанонь, Я.Пинясовонь, А.С.Малькинонь, С.А.Самошкинонь, А.Лукьяновонь, А.С.Щегловонь, И.Д.Пиняевонь произведениясна.
Родинати кельгомась, фашизмать каршес тюремась—вов инь эрявикс тематне, конат кепсевсть синь очеркснон, стихснон, повестьснон эса.
Ся писательхне, поэттне, журналисттне, конат ульсть фронтса, кучсевсть дивизионнай газетатненди. Тятфа, А.М.Лукьянов работась «За Родину» дивизионнай газетаса; П.П.Батаев—«Ворошиловец» дивизионнай газетаса военнай корреспондентокс; С.Е.Вечканов—«Сталинское знамя» отдельнай стрелковай бригадань газетань редакциянь редакторонь заместителькс; П.У.Гайни—«Советский воин» фронтовой газетань спецкорреспондентокс; «На разгром врага» армейскяй газетань секретарькс; А.Моро—редакторкс, а В.Радаев—НКВД-нь 20-це стрелковай бригадань «Вперёд за Родину» газетань сотрудникокс; И.В.Чигодайкин—«Боевая красноармейская» фронтовой газетань, «Гвардеец» армейскяй газетань, «Защитник Родины» окружной газетань литработникокс; Э.Пятай—«За Родину» дивизионнай газетань литсотрудникокс, ответственнай секретарькс, редакторкс; И.Ф.Чумаков—«Вперёд на врага» газетань сотрудникокс, редакторонь заместителькс, спецкорреспондентокс; Г.А.Пьянзин—«За Родину» дивизионнай газетань литработникокс; И.З.Антонов—«Родина зовёт» дивизионнай газетань редакциянь секретарькс; И.Д.Воронин—СССР-нь машина кинь войскань политотделонь печатть коряс инструкторкс.
Саранскяйса, А.С.Пушкинонь лемса национальнай библиотекань архивса, ванфтовсть материалхт, конат азондыхть сянь квалма, кода библиотекань работникне лезнесть ломаттненди моральнай ширде войнань стакатнень-сталмотнень сяськондемста, а сембода пяк сятненди, кит пчксесть Саранскяень госпитальхнень эса. Воинць, мярьктяма, стакаста ранендафоль, аш ни надиямац, што мрдай стройти, а лувсы Н.Островскяень «Как закалялась сталь» книганц, кеподи мялец эряфть кельгома.
Войнань васенце шитнень касфтфоль военно-обороннай и военно-учебнай литературань фондсь. «Красная Мордовия» газетась сёрмадсь: «Всеобучень боецненди библиотекась кочкась пяк лама тяфтама книга: «Вии советскяй авиациясь Родинать инкса бойхнень вятемста», «Маштт панттнень эзга якама», «Машфтк врагть рукопашнай бойса, стане кода Суворовонь солдатонза». Тяка пингть библиотекань работникне кочксесть книгат населениять кядьста. Лездсь и государствась. Библиотекатнень книгань инь цебярь фондсна пачфневсть госпитальхненди. Ранендафнень мархта работасть опытнай работникне А.Кузнецова, Т.Овчинникова, Е.Кудрявкина, В.Базунова.
Нюрьхкяня пингста библиотекань книгань лувихнень лувкссна ламода кассь. А тя нинге и сяс, мес ошу сась эвакуировандаф лама ломаньда Ленинградста, Киевста, Минскяйста, Курскяйста и лияста.
Оцю мяль шарфневсь искусствань учреждениятнень работаснон цебярьгофтоманцты. Сянкса, штоба анокламс национальнай кадрат, 1943 кизоня пуроптфоль Луначарскяень лемса Московскяй театральнай искусствань институтть видеса Мордовскяй драматическяй студиясь. Тяса тонафнесь 25 ломань. Тяка жа кизоня 22 асу цёраня и стирня прважафтольхть Собиновонь лемса Саратовскяй консервативнай опернай студияв.
1944 кизоня одукс панчфоль Саранскяень музыкальнай училищась. Войнаньберьф Саранскяйса работасть драматическяй и опернай театратне, идень музыкальнай школась. Васенцеда мокшэрзянь культурань историяса путфоль «Литова» музыкальнай драмань постановкась, «Несмеян и Ламзурь» васенце мордовскяй оперась (музыкась А.Кирюковонь). Сембонди кельговикс арась народнай инструментонь оркестрась, конань пуроптозе и вятезе Л.Воинов.
Войнань пингть Мордовиянь искусствань работникне няфтсть 400 концерт Краснай Армиянь воиттненди фронтса и 1100 концерт госпитальхнень эса пчкси ранендаф воиттненди, 4 тёжятть концерт велень хозяйствань труженикненди.
Цебярь произведенияснон мархта кеняртьфнезь трудящайхнень Мордовиянь художникне. Войнань колма кизотнень ётафневсть художественнай колма выставкат. Сембе шнакшнезь Ф.В.Сычковонь и Н.В.Ерушовонь картинаснон.
Идеологическяй работаса оцю васта занцесь военно-патриотическяй воспитаниясь. Тянкса лама тиендсть пропагандань и агитациянь системась, информациянь средстватне. «Красная Мордовия», «Мокшень правда», «Эрзянь коммуна» газетатне азонкшнезь, што минь странаньке, сонь воинонза, марнек народсь тюрихть эсь воляшиснон инкса, няфнесазь фашизмать разбойниконь шамаликонц. Газетатне лезнесть тылть кемокстамста, няфнезь производствань передовикнень опытснон, тернезь куроконе и парста тиендемс фронтть заказонзон.
Великай Отечественнай войнань темас ули кода лувомс мокшень РУВИКИ-са
Фёдор Гаврилов.