Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа» лем ала форум. Сонь аноклазе и ётафтозе «Российскяй Федерациянь финно-угорскяй нароттнень Ассоциациясна» общероссийскяй общественнай организациясь Национальносттнень тевснон коряс федеральнай агентствать ширень кирдеманц вельде.

Ширезонк пуромкшнесь пцтай 200 од ломань странань 26 регионцта.

4 июльста Лидерствань национальнай школать работац ушедовсь Пленарнай заседанияста. Пингстонза форумонь участникненди приветствиянь валхт азсть Российскяй Федерациянь Сенаторсь, РФ-нь финно-угорскяй нароттнень Ассоциацияснон председателец Пётр Тултаев, Мордовия Республикань Государственнай Собраниять Председателец Владимир Чибиркин, МР-нь культурань, национальнай политикань и архивнай тевонь министрсь Светлана Баулина.

—Кафта шит минь карматама ванондомост фкя инь важнай кизефкснень, тонафнема фкя-фкянь эзда,—мярьгсь Пётр Тултаев.—Национальнай политикань кизефксне фалу тяниень пингоннет. Россияса эряйхть 192 национальностень представительхть, лувондови 250-да лама кяль и диалект. Эрь народсь венеми эсь культуранц ванфтоманцты. Арьсян и надиян, ламотне ёткстонт пингонь ётазь сотнесазь эряфснон национальнай политикать мархта. Сембе кяльхненди тячи аф тёждя, лама прябалада синь ванфтомаснон коряс. Кда од ломаттне аф кармайхть корхтама тядянь-алянь кяльса—мезевок аф ляды. Эряви анокламс ломатть, конат ушедыхть покодема властьса кялень кизефкснень коряс. Лидерствань национальнай школась лезды теенть полафтомс опытса и получамс управленецень маштомошит.

Владимир Чибиркин азсь лямбе валхт форумс пуромфненди МР-нь Оцюнять Артём Здуновонь лемста:

—Россиясь—великай и козя страна. И сембода оцю козяшиньке сянь эса, што минь эрятама фкя-фкянь мархта ладязь. Сембе пинкнень атянь-атяньке преданнайста служасть Отечествати, касфнемок сонь славанц и виенц.

—Од ломаттнень творческяй эрьгаснонды, активнай гражданскяй позицияснонды фалу ули вешфкс,—пшкядсь Лидерствань национальнай школань участникненди Светлана Баулина.—Теенть сави кемокснемс Россиять единстванц!

Пленарнай заседаниять пингста доклад тись Удмуртия Республикань Госсоветть Председателенц заместителец—наукать, образованиять, культурать, туризмать и национальнай политикать коряс постояннай комиссиять председателец, РФ-нь финно-угорскяй нароттнень Ассоциацияснон председателенц заместителец Татьяна Ишматова.

—Мон сашендан Мордовияв кода радня ломанень шири. Тяса лац вятеви национальнай политикась, маштыхть инжиень васьфтема-примама. Сембе кяльхне вешихть лангозост мялень шарфтома. Штоба тя или тона кяльса корхнельхть, штоба синь кайгольхть аф аньцек кудса, но и лия вастова,—ушедозе эсь корхтаманц Татьяна Витальевна.

Татьяна Ишматова азондсь сянь колга, кода ащихть национальнай кизефкснень коряс тефне синь ширесост. Прябалатне, сталмотне, кле, стамот жа, кода и лия вастова: школатнень эса родной кяльть тонафнеманцты макссеви аф сатомшка пинге, аф сатнихть кадратне. Тяка пингть Удмуртияса работай Кузебай Гердонь лемса государственнай национальнай гимназия—республикань этнокультурнай образованиянь центрась, ули национальнай образованиянь Научно-исследовательскяй институт, удмуртскяй кяльса нолявихть сисем изданият. И мезсь нинге кеняртьфти, и мезть ули кода сявомс кепотьксокс лиятненди—2020 кизоня Удмуртияса ушедсь работама «Даур ТВ» од ломанень интернет-телеканал, коса шиньберьф корхтамась мольфтеви удмуртскяй кяльса.

—Сембось эсь кядьсонк,—меколи мярьгсь Татьяна Витальевна.—Аньцек эряви покодемс.

Пленарнай заседанияса стане жа корхтась Российскяй Федерациянь образовательнай организациятнень эса религиознай и этническяй экстремизмать профилактикань центрань главнай специалистсь Марина Малафеева. Сон пачфтсь сянь колга, кода од ломаттнень тернесазь радикальнай группатненди и эрь-кодама деструктивнай организациятненди.

Интернетса террористическяй пельксть шарьхкодеманц и инголдаманц квалма азондсь Н.П.Огарёвонь лемса Координационнай центрать директороц Сергей Гладышев. Эряви азомс, марнек странаньконь келес панжевсь 83 тяфтама центра.

Корхтафоль и сянь колга, кодама васта занцихть IT-технологиятне Россиянь нароттнень культураснон, кяльснон ванфтомаса. Вал максфоль «Яндекс» ООО-нь специалисттненди Александр Белховитяновонди и Антон Москаленковонди, конат шарфнихть оцю мяль Интернетса кяльхнень тевс нолямаснонды.

Пленарнай заседанияда меле форумсь поладовсь секциява работать мархта: «Влияние на молодёжь. Красные линии», «Лидеры общественного движения новой волны», «Многоязычие в условиях современных вызовов» и стак тов. Кепотьксонди, «РУВИКИ» интернет-энциклопедиянь Россиянь нароттнень кяльсост региональнай разделхнень работаснон ладямаснон коряс отделть руководителец Рустам Гатауллин содафтозень пуромфнень од проектть мархта. «РУВИКИ» интернет-энциклопедиясь ушедсь работама 2023 кизоста сявомок. Проектти эрявихть эрь-кодама кяльс ётафтыхть. Тяниень пингть аф фкя лацонь темас коре нюрьхкяня и шарьхкодеви тексттне интернет-энциклопедияса максфт комсь кяльса. Вейхксотне ёткстост—финно-угорскяйхть. Няфтьфт мокшень и эрзянь кяльхневок. Мокшекс ётафтысь филологическяй наукань кандидатсь Валентина Гришунина, эрзякс—эрзянь кялень тонафтысь и журналистсь Александр Данильчев.

Кода ни азоськ, Лидерствань национальнай школав Саранскяи сашендсть од ломатть странань 26 региотцта. Нят эрь-кодама национальностень представительхть. Ламотне ёткстост наряжафтольхть национальнай щамса. Стирьхне-цёратне пара мяльса азонкшнесть фкя-фкянди эсь культураснон, иласнон, койснон-обуцяснон колга. Няевсь: тяза пуромсть ся од ломаттне, конатнень аф кадондсыне озадонь седихть ащекшнема народснон сай пингоц. Кафта шит Мокшэрзянь национальнай драматическяй театраса (сон арась форумонь ётафтома основной площадкакс) кайгсть эрь-кодама кяльса морот, ульсть национальнай кштимат-месть.

Тейнек удалась корхнемс форумонь кой-кона участникнень мархта. Кепотьксонди, кафта стирьхнень-ялгатнень Юлия Новаковскаять и Алёна Федоровать мархта. Синь сашендсть Саратовскяй областьста. Юля национальностьс коре мокша, Алёна—эрзя. Эрть сонцень работац: Юля фитнес-тренер и английскяй кялень тонафты, Алёна покоди директорти воспитаниять коряс заместителькс Саратовань 4№ гимназияса. Стирьхнень маласькофтозень, а меле тиезень ялгакс национальнайти кельгомась. Тяфта ни лиссь, хуш юрсна синь мокшеннет и эрзяннет, семьясост пцтай ашесть корхне родной кяльса, койхне-обуцятнеашесть ванфтов. Но Юлять и Алёнать пяк оцю мяльсна, кода корхнихть, мрдамс эсь унксснонды. Аф кунара стирьхне сувасть Саратовскяй областень «Шумбрат» мокшэрзянь культурань центрав. Тяни ялгатне примсихть участия национальнай илатнень, пуромкснень эса, пара мяльса щашендсазь лангозост мокшень и эрзянь наряттнень. Меля стирьхне сашендсть Саранскяи од ломанень форумс. Тяда меле национальнайти кельгомасна сядонга вииясь. Алёна ушедсь тонафнемонза родной кяленц репетитор мархта. Лацонза арьси тиемс Юлявок.

Кристина Краснова сашендсь ширезонк Марий-Элста. Национальностьс коре сон марийка. Стирсь щафоль марийскяй национальнай щамса.

—Тя нарядсь сатовсь тейне бабазень эзда. Пара азомс, што миньцонк национальнай щапне-каряпне аф ащекшнихть арьзяса. Пяк ламотне, тяконь лувксса и од ломаттне, щашендсазь праздникста и эрь-кодама пуромксс.

Анастасия Кузнецова сашендсь Саранскяи Красноярскяй крайста. Сон сету национальностень представитель. Кода азозе, покоди Культурань кудса, вятьсы «Лиль» фольклорнай ансамбльть. Коллективсь морси сетунь морот. И мезсь кеняртьфти, морсихнень ёткса лама од ломаньда.

Шарфтсь эсь лангозонза мяль Коминь делегациясь. Эзонза сувсесть вейхкса ломатть, ламошкасна—студентт. Синьге щафтольхть эсь национальнай щамсост-карямсост. Ульсь ётксост и гармонист. Аф кржась форумонь участникнень ёткста кштись-морась народнай инструментонц корява.

Форумонь омбоце шиня тага работасть семинархт и мастер-класст. Лама корхтафоль кяльхнень и культуратнень ванфтомаснон, афкуксонь лидеркс улемать, патриотизмать, духовно-нравственнай питнишитнень колга и стак тов. Обедта меле тифтольхть итокт кафта шинь работати. А шумордавсь пуромкссь Мокшэрзянь национальнай драматическяй театрать инголе кштимаса-морамаса.

Ольга Евдокимова.

Последние новости

НИЛЬГЕМОНЬ КИЗА МАКССЬ УЧИТЕЛЕНЬ ТЕВТИ

Улема, эрсь мяляфтсы васенце учителенц, кона панжезень теенза содамошитненди...

Мордовиянь мастерхне—Беларусь Республикаса

Июльть васенце пялестонза Беларусь Республикань Могилевскяй областень Шкловскяй райононь...

Атери сашендсь Советскяй Союзонь Геройть Михаил Девятаевонь цёрац

8 июльста Советскяй Союзонь Геройти, легендарнай лётчикти М.П.Девятаевонди топодель...

РЕСПУБЛИКАВ САСЬ ОД ТЕХНИКА

«Экология» нацпроектть «Сохранение лесов» региональнай проектонц эряфс ётафтоманц рамкаса...

ВАНФТОЛЬХТЬ ЭРЯВИКС КИЗЕФКСТ

23 июльста Саранскяйса, Республикань Кудть конференц-залсонза, ётафтовсь Мордовия Республикань...

В Мордовии развивается система оказания первичной медико-санитарной помощи

В Мордовии в рамках национального проекта «Здравоохранение» развивается система...

НИЛЬГЕМОНЬ КИЗА МАКССЬ УЧИТЕЛЕНЬ ТЕВТИ

Улема, эрсь мяляфтсы васенце учителенц, кона панжезень теенза содамошитненди кенкшнень. Тейнек, Порапа велень шабатненди, тяфтама ломанькс арась Анна Николаевна Купряшкинась. Смузю, внимательнай, заботендай, но...

Мордовиянь мастерхне—Беларусь Республикаса

Июльть васенце пялестонза Беларусь Республикань Могилевскяй областень Шкловскяй райононь Александрия агроошкаса—Днепр ляйть трваса ётафтовсь «Купалье»—«Александрия собирает друзей» республиканскяй оцю ила. Эсонза примась участия кафта...

Атери сашендсь Советскяй Союзонь Геройть Михаил Девятаевонь цёрац

8 июльста Советскяй Союзонь Геройти, легендарнай лётчикти М.П.Девятаевонди топодель 107 киза. Шачема уженясонза, Торбеева посёлкаса, ётафтовсь лама интереснай ила. Ульсть панчфонь путомат, мужествань урокт,...