Колмочесь, 14 январьста, Республикань Кудса ётафтовсь торжественнай мероприятия, кона лемтьфоль Российскяй печатень шити. Мордовиянь журналисттнень поздравляндазень региононь Оцюнясь Артём Здунов. Сон шарфтсь мяль обществаса массовай информациянь средстватнень оцю вастснонды, китькстазе, што журналисттнень профессиональнай работасна лезни лихнемс лангс и решандакшнемс оржа прябалатнень сяда тов виияфнемс республикать.
«Тя аф тёждя пингть мялезе спасибамс эрти эздонт принципиальнай позициянкса, Родинати кельгомантень инкса, сянкса, мес тинь ащетяда республиканьконь информационнай политиканцты юркс,—мярьгсь Артём Здунов.—Специальнай военнай операциянь темась тяниень пингть ащи сембе изданиятнень васенце лопанясост, сембе эфирхнень эса. Лиякс аш кода—тейнек эряви информациять вельде кирнемс цёраньконь, синь семьяснон ширеснон. Печатнай сембе изданиятне пачкотькшнихть теест и эздост сашендыхть аньцек шнамань валхт. Омбоце важнай ширесь—государстваньконь, од ломаненьконь лангс информационнай атакатнень каршес ащемась. Аделавихть военнай конфликттне, экономическяй войнась, но информационнай войнась аф шумордави мзярдовок. Улемок тылса, тинь ащетяда информационнай войнань передовойса».
2025 кизось азф Отечествань аралаень кизокс. Странаньке васьфтьсы Великай Сяськомать 80 кизонц. Мордовияса тя нинге и Историческяй мялямонь киза. «Кеман, што «Кивок апак юкстак и мезське апак юкстак» лозунгсь заняй башка васта творчествасонт тя кизоня,—китькстазе республикань Оцюнясь.—Гуманитарнай лезксонь кочкамась, целай семьятнень, волонтёроньконь и доброволецоньконь работасна, лентанять тона ширесонза улемась—семботь колга пачфневи прессасонк. Мон азан теенть седиста моли спасибамань валхт странати преданнайкс улеманкса, шачема масторонь героень воспитандаманкса».
Региононь руководительсь отмечазе, што сашендови васьфнемс фейкнень, экстремистскяй контентть, неонацистскяй пропагандать мархта. «Колси мяль, што тянь тиендьсазь республикасонк шачф-касф ломаттне. Синь стака лемдемс землякокс, но эряви ащемс каршек синь равжа тевснонды: азонкшнемс минь традиционнай питнишиньконь колга, няфнемс мероприятияньконь, фестиваленьконь»,—мярьгсь Артём Здунов.
Ётай кизоня Мордовиять эряфоц козяль мяляфтови событияса. Республиканьке активнайста примай участия национальнай проекттнень эса. «Президентсь путсь задача, штоба 2023 кизоня сембе школатне, конат эрявихть одкстоптомс, улельхть петьфт, минь лац работатама тя ширеса, тяконь лувксса идень саттнень, СПО-нь
учреждениятнень коряс,—азозе региононь руководительсь.—Сяда тов мольфтеви работа демографиять цебярьгофтоманц, лама идень семьять статусонц касфнеманц коряс. Сембе ня важнай тематне обязательна муйхть васта печатнай изданиятнень лопаняснон лангса, теле-и радиоэфирса».
Мероприятиять пингста максфтольхть государственнай казнет, а стане жа тифтольхть итокт журналистскяй конкурсненди. Пара мяльса азсаськ, што «Мокшень правда» газетась занязе омбоце вастть МР-нь Оцюнять «ИнтоНАЦИЯ» конкурссонза.
Журналисттнень профессиональнай иласнон мархта стане жа поздравляндазь и макссть казнет МР-нь Оцюнять и МР-нь Правительствать Администрацияснон Руководителец Булат Хайрутдинов, МР-нь Правительствать Председателенц васенце заместителец Наталья Таркаева, МР-нь Правительствать Председателенц заместителец Алексей Ежов, МР-нь Оцюнять и МР-нь Правительствать Администрацияснон Руководителенц заместителец—Мордовиянь Оцюнять Пресс-службанц руководителец Елена Башкирцева.