26 ноябрьста мокшэрзянь народть межрегиональнай общественнай организацияц ётафтсь лятфнемань ила, кона лемтьфоль содаф политикти, общественнай деятельти, учёнайти, этнографти, историческяй наукань докторти, профессорти А.С.Лузгинонди. 27 ноябрьста топоди вете кизот, кода сон аш минь мархтонк.
Александр Степанович калмаф рьванц, Надежда Алексеевнань, ваксс. Синь марсотольхть пцтай ведьгемонь киза. Сон содаф учёнай, политик, «народнай министр», а Надежда Алексеевна трудендакшнесь школаса биологиянь учителькс. Синь семьясна ульсь сельмонь каяма вастокс ламотненди. Да и лия эряфска тусть фкя ковста. Лятфнемань илаське ушедсь калмоняснон лангс панчфонь путомаста, литургияста. Александр Степановиченди сюконяма сашендсть учёнай, журналист, политик ялганза. Эрьти ульсь мезе азомс тя ару вайме, панжада седи ломанть колга. А.С.Пушкинонь лемса библиотекань фойеса аноклафоль народнай художественнай промыслань и ремеслань изделиянь выставка. Синь ванфтомаснон, виияфтомаснон инкса лама вий и пинге макссь Александр Степанович.
Лятфнемань илань ётафтома залсовок аноклафоль «Нациять гордостец: учёнай, историк, этнограф» выставка, коза кочкафтольхть Лузгинонь сонцень трудонза, колганза сёрматфне, лятфнематне. Няфтьфоль «народнай министрть» колга видеоочерк, кона тифоль 70 кизонь топодеманцты. А.С.Пушкинонь лемса национальнай библиотекань национальнай и краеведческяй литературань отделонь старшай библиотекарсь В.Б.Бояркина аноклась презентация.
Лятфнемань иласа ламоль А.С.Лузгинонь ялгадонза, раднядонза, СМИ-нь представительда. Колганза лятфнесть мокшэрзянь народть межрегиональнай общественнай организациясонза покодихне Ю.А.Мишанин, Т.Т.Ширманкина, Т.И.Ларина. Пяк лямбоста лятфнесть Александр Степановичень колга ялганза В.И.Рогачёв, И.И.Карпов, Т.С.Баргова. Лузгин цебярь ялгаль содаф учёнайти Н.Ф.Мокшинонди. Марса сёрмадсть аф фкя книга. Тянь колга азондсь иласа Мокшинонь стирец, содаф учёнайсь Ю.Н.Сушкова.
Культурань, национальнай политикань и архивнай тевонь министерствать лемста корхтась отделонь начальниксь Д.С.Стенькин.
Кайгсть иласа рузонь, мокшень, эрзянь кяльса морот. Морасть «Ламзурь» ансамбльсь, Мордовия Республикань содаф артисткась, Нина Спиркина, В.П.Лузгин.
Илья ВЕШКИН.