Ушесь сетьме, мани.
Панжихть саттне,
Лямбе ширде варманя уфай.
Ватт: ульцява молихть ветераттне,
Кода якайхть вейхксоце эрь майть.
Тюрсть фашисттнень каршес синь аф пелезь,
Мяштьсост недяфт ордетт и медальхть.
Синь Европать марнек ялга кялезь,
Акшемсть прясна ёфси апак архтт.
Аф шумбрат, но эрямс нинге ёрайхть,
Хоть и лозкнайхть ранасна вень-ве.
Теест кенярдезь оркестрсь морай,
А синь аньцек нарнихть сельмоветть.
Ветераттне памятникть ваксс лоткайхть,
Панчфта путыхть тоза аф кржа.
Фкя минутас корхтамдонга лоткайхть,
Лятфтайхть, кит войнаста исть мрда.
Мяляфтсыне сембонь ошсь и велесь,
Тячи лятфтамс эрявихть и сят,
Кие кулось ни войнада меле,
Кит аф васьфтихть праздниконь илат.
Сембонди минь вечнай толонь ваксса
Азсаськ и эсь валоньконь кирдьсаськ:
Родинаньконь киндиге аф макссаськ,
Сай зиян—синь лацост идесаськ.
Полина АЛЁШИНА.
Великай Отечественнай войнать колга ули кода лувомс мокшень РУВИКИ-ста.