ЛЯТФТАЗЬ ДОНБАССА ШАВФ ШАБАТНЕНЬ

27 июльсь—Донбасса шавф иттнень Лятфнемань ши.
10 кизода инголе, 2014 кизонь 27 июльста, мзярда неонацисттне ляцендезь Горловка ошень ульцятнень, шавовсь од тядясь Кристина Жук эсь 10 ковса стирнянц мархта. Ся шиста сявомок Кристина арась мялямонь символкс. Од тядять кядьса иднянц мархта фотографиятне шарозь марнек мирть.
Тя шиня Саранскяйса, Сяськомань Площадьса, ётафтовсь акция, коса примасть участия Отечествань воиттнень семьянь Комитетонь представительхне, общественнай, од ломанень организациянь, тяконь лувксса «Васенцетнень Движениясна», Юнармиянь активисттне, «сиянь» кизонь волонтёрхне, МР-нь Общественнай палатань члеттне, Народнай фронтонь активисттне.
«27 июльсь арась трагическяй шикс, кона лятфни пелькс событиятнень колга,—мярьгсь Отечествань воиттнень семьянь Комитетть руководителенц заместителец Ольга Котельникова.—Тя шиня минь лятфнесаськ ся иттнень и подросткатнень, конат арасть Донбасса войнань жертвакс. Нят минь шабаньке и минь пичеттяма и ризнатама сембонди сянди, мезе тяниень пингть ётафневи».
Специальнай военнай операциянь ветеранць Миразым Исмаилов, корхтамок тя шить колга, китькстазе, што, мзярда шавондовихть иттне—тя фалу стака и сярятьфти.
Акциять шумордамста участникне минута кашт аф молезь лятфтазь шабатнень, конат шавовсть киевскяй режимть агрессиянц сюнеда.