1 ноябрьста Республикань Кудса ульсь государственнай казнень максомань торжественнай церемония, кона лемтьфоль Народнай единствань шити.
Мордовиянь Оцюнясь Артём Здунов китькстазе, што тя илать юрса ащи народть марстомомац, патриотизмась.
«1612 кизонь событиятне няфтезь, кода эрь-кодама национальностень и верань нароттне, пуромомок марс, сявозь эсь лангозост странать судьбанц инкса ответственностть и машфтозь врагть. Тя историческяй эрявикс урок. Ся героическяй событиятнень эзда ушедсь духовнай одукс кеподемань важнай эпохась»,—азозе региононь руководительсь.
Трудовой коллектифне, волонтёрхне, православнай и мусульманскяй организациянь активисттне кочксихть военнослужащаеньконди гуманитарнай лезкс, сявондихть синь семьяснон лангса шефства, рамсихть эрявикс оборудования и снаряжения. Минь венептеськ лездыень кяденьконь од региононь эряйхненди. И тя лезксса—минь виеньке!
Тя шиня государственнай казнет получасть эрь-кодама профессиянь представительхть. Синь марс пуропнесыне аф аньцек профессиональнай асушись, но и эсь тевснонды, шачема масторснонды, странати и республикати кельгомась.
Боевой казнет максфтольхть СВО-нь участникненди.
Казьфнень ётксот мокшень содаф ломаненьке—Мордовия Республикань культурань, национальнай политикань и архивнай тевонь министрть васенце заместителец Александр Карьгин и Российскяй Федерациянь искусствань Заслуженнай деятельсь, композиторсь Нина Кошелева.
Александр Ивановиченди максф «Мордовия Республикань властень государственнай органонь Заслуженнай работник» почётнай лемсь, а Нина Васильевна арась Мордовия Республикань Оцюнять «Национальное достояние» премиянц лауреатокс.
Казнетнень максозь МР-нь Оцюнясь Артём Здунов, МР-нь Госсобраниять Председателец Владимир Чибиркин и МР-нь Правительствать Председателец Дмитрий Поздняков.