Улихть тяфтама валхт: арьсетяма, што пингсь нинге сай, а афкукс сон коль ётай. И, кда арьсезеват, лац шарьхкодьсайть ня валхнень смузьснон. Бта нинге аф кунара пильгалонк кажелдсть зрнянь тюсонь лопатне, а тяни ульцяса азорондай тялось. Шуфттне вельхтяфт ловса, кона ульцятнень эзга молемста моцорды пильгала. Ёфксонь тя пингоня улендихть Од кизось и Роштувась.
Эрь кизоня ня илатнень каршеня мазопневихть ошень, райцентрань ульцятне. Тяфта тевсь ащи и Саранскяйса. Газетаньконь тячиень номероц лиси 14 декабрьста, сяс тя материалсь аноклафоль нинге сядовок рана. Но, аф ваномок тянь лангс, республикать столицаса мольфтевсть ни Од кизоти и Роштувати анокламатне. Тянь няйсасть фотокорреспондентоньконь Николай Карановонь фотографиянзон эзда. А нинге пачфтьсаськ сянь, мезе удалась содамс Саранск ошень округонь администрацияса.
Мордовиять столицанцты «седикуцюнякс» ащи Советскяй площадсь, сяс лангозонза шарфтови башка мяль.
Од кизонь и Роштувань символкс фалу ульсь кузсь. Тяддевок, тонатф койс коре, Советскяй площадьса стяфтови 22 метрань серьса искусственнай куз. Лангозонза повфневихть зрнянь тюсонь и пиндолды шархт, гирляндат.
Од кизонь кузти пиндолды и валдопты шуфттнень пачк кармай эряскодома Якшам Атясь нурдса. Сон уски мархтонза казнет. Площадьса улихть нюряпт, конат наряжавихть Од кизоннекс и валдоптовихть канделябратнень вельде.
В.И.Ленинонди памятникть фтала скверса ули кода няемс ловонь бабань джаз-бандать. Маласа касы шуфттне валдоптовихть мазы шарса.
Советскяй площадти моли ульцятненди ладявихть световой конструкцият. Светонь тоннельхть путовихть Феодор Ушаковонь соборонц ширде Советскяй площадти сувамста. Ленинонь проспектонц ширде кармай работама танцти ярхцамбяль и мишендеви сувенир мархта Од кизонь ярмаркась.
Саранскяень эряйхне няезь ни площадьса ащи сельмос пови конструкциять, кона мезьса-бди шарфты Рубиконь кубиконц лангс. Но сонь улихть световой интерактивнай опциянза. Кубикса улихть QR-котт. Кодама информация эсост? Тянь можна содамс эрти эстеенза.
Феодор Ушаковонь соборонц маласа эвондай «Звездное небо» декоративнай валдоптома.
Мазоптовихть и Саранскяйть райононза. Целайнек, Мордовиять столицанц эряензонды и инжиензонды аноклави мялень салай козя программа, но семботь, шарьхкотьф, азондома газетаса аф карматама. Сяда пара ули самс и няемс тянь эсь сельмоса.
Но аф юкснема, што Од кизось и Роштувась—тя пинге, мзярда эряви тиендемс цебярь тефт. Пади, киндивок лездома мезьсовок. Арьседа тянь колга. Эста тялонь кафта илатнень васьфтьсасть сядовок лац.
Татьяна Владимирова.