Малаткшни Од кизоть мархта!

Кельгома лувиеньке!
Малаткшнихть оцю илатне—Од кизось и Роштувась. Ня праздникне фалу пяшкотьфт кенярдемаса и валда мяльса-арьсемаса, сяс фкакс кельговихть и оцюфненди, и ёмлатненди. Од кизонь и Роштувань шитнень учемста минь верондатама, што лядыхть фталу ризфне-пичефксне, пяшкодевихть цебярь полафткснень лангс минь учсеманьке.
Ёфси курок сязеви календарень мекольце лопанясь. Лядонды аф лама пингта, штоба пращамс тушенды кизоть мархта, тиемс теенза итокт. Аньцек ня шитнень шумордавсь 2024 кизоть васенце пяленцты газетас и журналс сёрматфтомась. Пара мяльса азсаськ, што аф ваномок тяниень стакатнень-сталмотнень лангс, мелянь тяка пингть коряс лувиеньконь лувкссна пцтай ашезь кире. Тя нинге весть корхтай сянь колга, кит сёрматфнесазь и лувондсазь газетаньконь, аф каендайхть, мушендыхть эздонза лама интереснай, сон эряви теест.
Кода няеви подпискань даннайхнень эзда, сембода лама лувидонк ульсь и ляткшни Ковылкинскяй районца. Омбоце вастса Атерень аймаксь. Стане жа аф кальдявста ётась газетаньконди тяштьфтемась Инсарскяй, Рузаевскяй и Старошайговскяй райоттнень эса. Оцю сюкпря лувихненди, конат лядсть мархтонк, и почтовай отделениянь работникненди, конат лездсть тейнек газетаньконди сёрматфтомать парста ётафтомасонза!
Мялезе эсь лемстон и «Мокшень правдань» редакциянь марнек коллективть эзда седи ваксста поздравляндамс сембонь малаткшни Од кизоть и Роштувать мархта. Арьсетяма кеме шумбраши, паваз и од сатфкст! Катк тевонте най молихть аньцек инголи, а седисонт фалу кармайхть валда мяльхть-арьсемат!
«Мокшень правда» газетать
главнай редактороц
Ольга ЕВДОКИМОВА.