Марстонь вийса сатови ламось

Кода пачфнеськ ни морафтыеньконди, аф кунара «Сембось Сяськомать инкса!» проектть мяльса кирдезь Общероссийскяй Народнай фронтть Мордовскяй региональнай отделениянц штабонц сопредседателец И.П.Еремкин якась Донбассу гуманитарнай лезксонь ускома. Тя лезксть марстонь вийса кочказь Мордовия Республикань организациятне, ведомстватне, бизнес-сообществатне. Донбасста мрдамдонза меле Игорь Павлович пачфтсь тоса улеманц колга. Вов мезе сон азондсь.
—Специальнай военнай операциянь ётафтома вастти якаме гуманитарнай лезксонь пачфтема. Тоза молеманьке согласовандафоль региононь руководствать мархта.
Донбасса улеме основной колма васттнень эса. Васенцесь эздост сотфоль Белгородскяй областть мархта, коса военнай кафта госпитальхненди максоськ гуманитарнай лезксть кой-конашка пяльксонц. Васьфтеме Народнай фронтть тостонь региональнай отделенияста работас коре ялганьконь мархта. Эздост кулеськ, кодама работа синь мольфтихть.
Сяда тов гуманитарнай киньке пачфтемазь Луганскяи и Донецкяи. Луганскяйса максфоль гуманитарнай лезксть ламошкац.
И.П.Еремкинонь валонзон коряс, улихть аф озадонь седихть ащи ломатть, конат работайхть аф аньцек регионцонк, вастсост, но и тоса, коса теест ули кода кирдемс соткст военнослужащаеньконь мархта. Вельдест получсеви ся информациясь, гуманитарнай кодама лезкс эряви тяни, мезти сяда оцю вешфкссь. Тя эстокиге сявондеви мяльс. Специальнай военнай операциянь васттненди якамста удалась пачфтемс кой-кона боецоньконди именной посылкат.
Якамать колмоце пяльксоц сотфоль Донецк ошса улемать мархта. Тостонь музейти С.Д.Эрьзянь лемса Изобразительнай искусствань Мокшэрзянь республиканскяй музейть эзда казьфоль 13 картина и художественнай пяк лама литература. Тифоль тя од территориятнень и Мордовиять ёткса культурнай полафтомать мяльса кирдезь.
Донецкяй Народнай Республикань «Арт-Донбасс» Художественнай музейть коллективоц азсь оцю спасиба пачфтьф эрявикс казнетнень инкса.
«Азонттама благодарностень валхт ся ломаттненди, кит эсь кепотьксснон лангса няфтезь сянь, кода синь седи ваксста кирдьсазь Донбассонь эряйхнень ширеснон, ялгаксшинь соткснень и пяк оцю странаньконь культурнай марстоньшинц»,—корхтави Донбасста кучф сообщенияса.
С.Д.Эрьзянь лемса музейть директоронцты Л.Н.Нарбековати оцю профессионализманкса, виень аф ужяльдезь работаманкса, Российскяй Федерациянь региоттнень ёткса культурнай соткснень виияфтомаса и кемокстамаса оцю путксонкса кучфоль грамота Донецк ошень Культурань Управлениять начальниконц А.Г.Элиосидзень эзда.
Общероссийскяй Народнай фронтть Мордовскяй региональнай отделениянц штабонц сопредседателец И.П.Еремкин азсь оцю спасиба сембонди, кит примасть участия гуманитарнай лезксть пуроптомаса, а регионть руководстванцты—тя тевть вятеманц инкса.
«Путф цельть сатомста стака-сталма мархта ашеме васьфте»,—мярьгсь сон.
«Сембось Сяськомать инкса!» проектсь мольфтеви сяда тов. Примамс эсонза участия ули кода сембонди. Кирдьсаськ передовойса аляньконь-цёраньконь ширеснон!
Материалть аноклазе Т.Альшина.