Маряйхть инксонза гордость

Мордовия Республикань Заслуженнай артисткась, специальнай военнай операциянь участниксь Валентина Миркина кирди кеме соткст эсь шачема-касома уженянц, Атюрьевскяй райононь Пичепулоня велеть мархта. Аньцек эвондайхть ваймама шинза, мокшавась эряскоды вели, коса сонь учсазь шачфтыенза-касфтыенза Лидия Сергеевна и Никифор Киреевич. Кафцьке трудонь кельги ломатть. Лидия Сергеевна сембе эряфонц максозе велень хозяйствати. Потьнесь тракст. Тяда башка, сон лац морай, шнафтсы прянц стамань тевса. Райононь илатнень эса, «Шумбрат, Мордовия!» Народнай творчествань республиканскяй фестивальса-пялькстомаса Л.С.Мустайкинась няфнесь мастер-класст. Тянкса казьфоль Мордовия Республикань Культурань министерствать, Атюрьевскяй райононь администрациять Почётнай грамотаснон мархта. Аляц, Никифор Киреевич, лац морай гармонияса. Заслуженнай артистсь шачсь мораень семьяса. А васенце тонафтыкс теенза ульсь педагогическяй трудонь ветеранць, мокшень кялень и мокшэрзянь литературань тонафтыец И.Ф.Брындин. Сонць Иван Фролович ульсь тонафтыкс Шкайть эзда. Морсесь «Пиченя» фольклорнай ансамбльса. Ульсь райононь сембе концерттнень, республикань фестивальхнень-пялькстоматнень эса. Касфтсь мокшень кялень кельги лама шабада. Фкясь синь эздост Валентина Миркина, кона нинге школаса тонафнемста лисендсь сяськикс республикань ламоц пялькстоматнень эса.
Да и тянивок, мзярда Валентина Никифоровна сашенды Пичепулоня вели, ваймамать колга сидеста юксни. Родителензон оцю хозяйствасна. Лама жуватадост, путнихть кафтонь пере. Кода машты, лезды родителензонды. Якай вири кстынь и пангонь кочкама. А мзярда велень аватне, эряфкшу ломаттне пуромкшнихть ваймама, Валентина морси теест сире и тяниень пингонь мокшень морот. Сёрматкшнесыне велеряензон вайгяльснон.
—Кудса аш мзярда ваймосемс стирезти,—корхтай тядяц.—Лама жуватадонк, путнетяма перет. Семьяньке оцю. Кота идне. Сембонди лезттама.
Кода СВО-нь участник, В.Н.Миркина казьф боевой аф фкя казнеса. Инксонза маряйхть оцю гордость родителенза, велеряенза.
Илья Вешкин.
Снимкаса: Мордовия Республикань Заслуженнай артисткась Валентина Миркина тядянц Лидия Сергеевнань мархта.