Маштыхть работама и ваймама

Тя семьять Порапаса содасы эрь ломанць. Содасы кода трудонь кельги и лама тевса сафты семьянь. Эздост сембоц кота шабатоль. Виде, кафттне эздост тяни ашет шиса. Тядятне-алятне Кудашкиттне—Семён Филиппович, кона васенда покодсь Карл Марксонь лемса колхозонь строительнай бригадань рабочайкс, а меле—«Парапинский» совхозса, Екатерина Ефимовна—тяка хозяйствань траксонь потьни, скотница, касфтозь эсь идьснон афкуксонь ломанькс.
Шабатне рана няезь тядяснон-аляснон эса сянь, мезти эрявсь венемомс. Акатнень-сазорхнень ёткста инь оцюсь, Зинаида, эряфоньберьф работась табельщицакс Ковылкинскяй электромеханическяй заводса. Тяста и тусь пенсияс. Мирдец, Илья Васильевич, профессияс коре строитель, примась участия колмоце микрорайонца эряма куттнень строямаснон эса. Тя профессияти кельгомась ётась и цёраснонды Евгениенди. Шумордамок Н.П.Огарёвонь лемса Мордовскяй государственнай университетонь строительнай факультетть, кой-мзярс работась специальностьс коре Ковылкина ошень поселениянь администрацияса, тяни прораб Москувонь строительнай фкя организацияса.
Валентина Семёновна (мирдень фамилияц Чекашкина) отличия мархта шумордазе Парапинскяй средняй школать (тусь 8-це класста меле), а меле—Инсарскяй медучилищать. 44 киза макссь Ковылкинскяй центральнай районнай больницяти, работамок лаборанткакс. Мирдец, Пётр Александрович, эряфонц ламошканц лемдезе Ковылкинскяй электромеханическяй заводти, станоконь наладчиколь. Цёрасна, Вячеслав, заняф церькафнень реставрацияснон мархта. Кепотьксокс ламотненди ащихть уноксна. Роман—Н.П.Огарёвонь лемса Мордовскяй госуниверситетонь студент, Пётр—отличник, тонафни 1№ гимназиянь сисемце класса.
Колмоце акась-сазорсь Аня (мирдень фамилияц Сороченкова) Парапинскяй средняй школать шумордамдонза меле тонафнесь Зубова Полянаса строителькс. Виде, специальностьс коре ашезь работа. Марнек эряфонц лемдезе мишендемань тевти, меле тусь пенсияс. Мирдец, Анатолий, профессияс коре водитель. Стирьсна, Татьяна,—Ковылкинскяй поликлиникаса старшай медсестра. Цёрасна, Дмитрий,—мастер-универсал, оцю квалификациянь специалист. Сон тиенди ремонт машинатненди, квартиратненди и офисненди. Рьвац, Земфира Александровна,—экономист эряфкшуфненди и инвалиттненди Ковылкинскяй кудса-интернатса. Стирьсна, Елизавета,—Ковылкинскяй 4№ СОШ-нь сисемце класса тонафни. Анна Семёновнань нинге фкя унокоц Виктория—колледжень студентка.
Кудашкиттнень мекольце стирьсна, Татьяна, аф кунара васьфтезе кодгемонь ветие кизонь юбилеенц. Велень школать шумордамдонза меле поступась Ковылкинскяй строительнай техникуму, коса васьфтезе эсь кельгоманц—ошса и районца содаф ломанть Александр Ежовонь. Александр Викторович инголи ульсь Ковылкинскяй ПМК-86 начальникокс, Ковылкина ошень поселениянь администрациянь оцюнякс, жилищно-коммунальнай хозяйствань директоркс и стак тов.
Татьяна Семёновна пцтай 20 киза Ковылкинскяй РОНО-са бухгалтероль-ревизороль. Пцтай тнярс бухгалтероль ЖКХ-са. И, улемок пенсияса, аф явонды кельгома тевонц мархта. Сон—«Единый расчётный центр» ООО-са оператор.
Ежофнень стирьсна, Ирина, эсь пингстонза отличия мархта шумордазе Н.П.Огарёвонь лемса Мордовскяй государственнай университетонь медицинскяй факультетть. Тяни работай Московскяй областень Сергиев Посад ошень фкя медучрежденияса. Сонь стирец, Александра, тусь тядянц киге. Сай пингонь врач, Евдокимовонь лемса Московскяй государственнай стоматологическяй университетонь 5 курсонь студентка. Цёрац, Михаил, Советскяй Союзонь Геройть А.В.Корявинонь лемса 24№ лицеень 6-це классонь тонафни.
Кудашкинатнень семьясна кельгсы марс пуромкшнеманц. Порапаса свадьбаса, юбилейса или престольнай иласта ичкози кулевихть акатнень-сазорхнень кайги вайгяльсна.
Василий ИЛЬКАЕВ.
Снимкаса: акатне-сазорхне Кудашкинатне.