Масланцяста пачатневок сяда ваихть, моротневок сяда кайгихть

Масланця, Масланцянь недяля, Кели Масланця—аф  фкакс мярьгихть теенза мокшень тя или тона велеса, но смузенц, улема, ламотне няйсазь ваи пачатнень, кайги моротнень, кильтьф алашаса арнематнень эса. Тяфтама лятфнембяльхне эряйхть эрть пряса фалу.  И катк шабакс улемста лац-ряц  и афолеть сода кодама тя праздниксь Масланцясь, но мархтонза сотф койхне-обуцятне эсьотям сашендыхть прязт, мзярда теенза ляткшни недяля-кафта. А вдь Масланцять ули эсь историяц, нльне эрь шиц ётафневи лиякс и эрть ули лемоц. Ялгат, ёфси курок ушеды сон—Кели Масланцясь. Эрьда лятфтатама колганза.
Масланцясь—сембонди содаф праздник, кона моли недяля и эрь кизоня уленди Великай постта инголе. Кирдемок мяльса, мзярда ули Очижись, Масланцясь полафнесы числанц. Тядде сон ушеды 28 февральста, а шумордави 6 мартста (Прощёнай недляшиня). Тя праздниксь сувси славянскяй странатнень эса ванфтф инь кунардонь праздникнень ёткс. И катк кой-конашкада полафтозе смузенц, народсь странасонк сонь  сембе сяка кельгсы и оцю мяльса учендсы эрь кизоня.
 Масланцясь явондови кафта пяльксова: Тяйня (понедельникста сявомок вержити молемс) и Кели (шуваланяста сявомок недляшити молемс). Тя недялять эрь шинц ули эсь лемоц и смузец.
Понедельниксь—Васедема. Тя шиня васьфневи Масланцясь. Ломаттне тиендихть шужярьста Масланцянь чучела, гуляндамань васттнень эса—ловонь пандонят и крепостть. Aноклакшнихть ярхцамбяльхть праздничнай шрати. Азораватне пицихть-панцихть пачат. Инголи васенце пачать максселезь ашу ломаттненди, штоба синь лятфталезь кулоф раднятнень лемснон. Рьвянятне тя шиня яксихть эсь тядяснонды-аляснонды инжикс.
Шавшись—Заигрыш. Шавшиста ушеткшнихть Масланцянь гуляндаматне: ломаттне  курькснихть пандонятнень лангста нурдса и нурдоняса, инголи оцюнек-ёмланек озсельхть карусельхненди. Тяда башка, ашезь юксне рьвянянь ладямань-ваномань тевть: од ломаттне яксесть инжикс и кочксеcть эстеест пола. Лувондовсь, кда ладясак сай пингонь рьвять Масланцяста, свадьбась вчёк Краснай горканди сави.
Вержись—Лакомка. Тя шиня сембе пицихть-панцихть пачат и якайхть инжикс. Офне якайхть пачада ярхцама авозьбабаснон ширес, а авозьбабатне, кода маштыхть, няфнесазь, што овснон пяк кельгсазь, анокт ваномс мяльснон.
Шуваланясь—Разгуляй. Тя шиня и ушеткшни Кели Масланцясь. Инголи тя шиста сявомок ламотне кадондозь эрь шинь тевснон и ушеткшнесть весялготкшнема: тюрсть мокшендаса, ётафнесть пялькстомат и конкурст, шарондсть хороводса, морсесть весяла морот, щашендозь инь мазы нарядснон.
Пяденцясь—Тёщань  иляднят. Пяденцяста инжиень кельги, васьфни ломанькс няфнезь эсь пряснон офне: ширезост пачада ярхцама сашендсть авозьбабасна и вятнезь мархтост ялгаснон. 
Ёткшись—Аклянь кудса ащемат. Тя шиня мирдть раднянза яксесть оттнень шири инжикс. Рьвяняти эряви пидемс-панемс пачат и каванямс раднятнень. Тя шиня акляти казендихть казне рьвянять раднянзон эзда.
Недляшись—Прощёнай недляши. Тя шиня аделсеви Масланцянь недялясь. Сембе анцихть фкя-фкянь кядьста прощения, эняльдихть простямс сембонкса. Недляшиста илять плхневи Масланцять чучелац.
Православнай календарьса Масланцяти мярьгондихть Сырнай недяля. Пингстонза аф мярьгондеви ярхцсемс сивольда. Сяс сон лувови ни Великай постти эсь лацонь ушедомакс или анокламакс.
Рузаевскяй райононь Мокшень Пишля велеса Масланцяти (пишляряйхнень ламосна мярьгихть теенза Масла) анокламась ушеткшневи инголенди. Масланцясь (бабась или авась) тиендеви Од кизоста лятф кузста—тя тевонди моли сонь ронгоц—Масланцять пондоц цебярь лисенди! А щапне-месне сташендовихть тястонь клубонь «Мастера и рукодельницы» творческяй мастерскойса лятф котфонь, сюрень ляткснень эзда. Потмоцка тяфта эцекшневи.
Ужяль уленди плхтамс тяфтама баяравать, но мезе тият? Тяфтама ни мархтонза сотф койсь-обуцясь.
Малаткшни Кели Масланцять мархта сембонь!
Т.Альшина.