Ня шитнень Инсарскяй райононь Исапря велеса панжевсь мемориальнай доска Советскяй Союзонь Геройть, гвардиянь полковникть, тяса шачфть-касфть Иосиф Григорьевич Черяпкинонь мяляфтоманкса. Сонь лемоц сембе пингс тяштьф зрнянь букваса Великай Отечественнай войнань Мялямонь книгати, а подвигоц аф содай юкстама. 1941 кизонь июньцта сявомок Иосиф Григорьевич тюрсь Западнай, Брянскяй, Крымскяй, васенце Белорусскяй фронттнень эса. Нилексть ранендафоль. Сядонга лац няфтезе прянц Варшавско-Познанскяй наступательнай операциять пингста Польшать территорияса. Каземань кагодонц эса тяштьф, што 1945 кизонь 16 январьста сявомок 25 январти молемс И.Г.Черяпкинонь командованиянц ала бригадась тись противникти няевикс карьхцьт: машфтсь-тапась 5 танкат и самоходнай орудия, аф фкя лацонь калибрань 34 орудия, 5 миномётт, 50 пулемёт и винтовка, 3 самолётт, 50 автомашина, 11 трактор, 25 мотоцикла, 8 радиостанцият и противниконь 1200 солдат и офицер. СССР-нь Верховнай Советть Президиумонц Указонц мархта бригадать пяк маштозь вятеманкса, командованиять боевой заданиянзон лац пяшкотькшнеманкса и тя пингть отвагань и героизмань няфтеманкса Иосиф Черяпкинонди максфоль Советскяй Союзонь Героень лемсь, а тяфта жа теенза максфтольхть Ленинонь орденоц и «Золотая Звезда» медальсь. Сембоц земляконьке кафксть казьфоль Ленинонь орденонц, колмоксть Якстерь Знамянь орденть, Отечественнай войнань I и II степенень ордеттнень мархта, Якстерь Тяштьса и вейхкса медальса.
Мемориальнай доскать торжественнайста панжемасонза примасть участия Инсарскяй райононь оцюнять заместителец, районнай администрациянь социальнай работать коряс управлениять начальникоц Рауф Долотказин, Нововерхисскяй велень поселениянь оцюнясь Алексей Чигажов, «Единая Россия» партиянь активисттне, Инсарскяй райононь эряйхне, Нововерхисскяй СОШ-нь учительхне и тонафнихне. Пуромфне путсть панчфт и лятфтазь великай землякснон минута кашт аф молезь ащезь.