Мезть лангс шарфтома башка мяль

Тянь колга пачфни «Стопмошенник13» телеграм-каналсь.
Можна улемс пяк аккуратнайкс, аф корхнемс аф содаф ломаттнень мархта, аф ётнемс аф содаф ссылкатнень коряс и тияк сембе сяка повомс мошенникнень килькшс кодамовок анцяйнянкса. И тяфтама анцяйнять вельде мошенникне ярмаконьконь мархта пяшкотькшнесазь зепснон. Тяфта и лиссь Алинать мархта. Сявость мяльс сонь историянц и кирдесть пилентень стяда.
Мошенникнень од схемасна арьсеф сятнень мяльс сявозь, кит мишендихть объявлениянь сайттнень эса. Сембось моли пяк лац: мишендить мархта латци соткст «рамайсь» и эняльди няфтемс товарть, лиякс азомс, тиемс тянь видео-связть вельде.
Алина ёрась мимс тумбочка. Курокста мувсь рамай и аф ламос корхнемада меле сон мярьгсь гайфтемс видеоть вельде, штоба педа-пес няемс мебельть. Но «рамайть» ширде эвондакшнесть ёшмонят: сон пеняцясь, бта равжа экранда башка мезевок аф няи. И эста эвондась мялец: катк Алина ладясы и нолдасы экранть.
«Ёрань ни шумордамс кунара ушетф и ламос моли корхнеманьконь, сяс ашень арьсезев, мезьса и кода тя тевса лезды экранць. Рамайть ширде эстокиге сембось ушедсь работама, сон макссь несколька кизефкс товарть колга и мярьгсь, што кучезе пандомать».
И тя ёткть лиссь вов мезе: Алинать телефонозонза сась аф содаф кодама код.
А мошенникти лия и ашезь эряв. Корхнемать шумордамдонза меле Алинать счётста юмасть ярмакне и кие-бди ёрась синнемс Госуслугатнень эса аккаунтонц. Мошенниксь тевс нолдазе кодть, конань няезе Алинать экранонц лангста.
Мезе тиемс, штоба аф повомс тяфтама историяс
*Мзярдовок тясть няфне экранть аф содафнень мархта корхнемста.
*Кда соньфтемонза аш кода, инголенди ладясть настройкатнень—кепотьксонди, тевс нолдасть «не беспокоить» режимть.
*Ули кода тиемс уведомлениятнень стане, штоба ваномста аф няемс тя или тона приложениятнень уведомленияснон—кепотьксонди, СМС-снень и банкнень эзда.