Сяда тов мольфтеви #МЫВМЕСТЕ военнослужащайхненди и синь семьяснонды лезксонь максомань региональнай штабть волонтёронзон работасна. Общероссийскяй тя акциять мяльса кирдезь аф кржа тиендихть Н.П.Огарёвонь лемса Мордовскяй госуниверситетонь студенттне.
«Студентоньке тиендихть оцю путкс добровольчествань движениять касоманкса. #МЫВМЕСТЕ Общероссийскяй акциясь—тянди кепотькс. Огарёвецне—аф озадонь седихть ащи ломатть, конат васенцекс венептьсазь кядьснон зияттнень и прябалатнень пингста. Тянкса теест сюкпря!»—мярьгсь Н.П.Огарёвонь лемса Мордовскяй госуниверситетонь Добровольчествань ресурснай центрать волонтёрхнень мархта работать коряс специалистсь Татьяна Дмитриевна Власова.
Филологическяй факультетонь колмоце курсонь студенткась, факультетса волонтёрскяй центрать мархта работать коряс секторть руководителец, мокшень стирсь Александра Родионова пачфтсь эсь тевонц колга вов мезе: «Арань #МЫВМЕСТЕ акцияти волонтёркс университетса Штабть панжема шистонза. Васень тевозе—лездомс мобилизованнайхненди и синь семьяснонды. Тейнек пшкятькшнихть психологическяй и юридическяй консультациять коряс заявкань максома, а стане жа кадондыхть заявкат адреснай лезксонди.
Фкя шиста гайфни аф кржа ломань марнек республикаста и старандан лездомс эрти. Кой-коста сатомшка аньцек кулхцондомс ломанть и азомс теенза лямбе валхт, а кой-коста сави кучемс лия спецслужбас. Васендакиге стакаль моральнай ширде, пяк таколдан, сяс мес эрь ломанть историянц ётафнеса эсь ваймозень пачк.
Мзярда арань волонтёркс, ушедонь шарьхкодема, конашкава эряви ванфтомс эрь шить, конань ётафнесаськ мала ломаненьконь мархта. И кода лездома сятненди, кит кодамовок туфталонкса аф получайхть тяфтама лезкс.
Электроникань и светотехникань институтонь 4 курсонь студентсь Артём Прончатов стане жа примай участия #МЫВМЕСТЕ военнослужащайхненди и синь семьяснонды лезксонь максомать коряс акцияса. Арась волонтёркс пси линиять нолдамань шистонза. Сон стане жа отвечси гайфнематнень лангс, аноклакшни заявкат и кучсесыне синь специалисттненди. Артём азозе, што тя тевсь аф тёждятнень эзда, но старандай тиемс семботь, мезсь вийсонза. Пяк пара мялезонза, мзярда удалси киндивок лездомс.
Мордовиянь Доброволецнень командазост ули кода сувамс мывместе.рф сайтть вельде.
О.Белкина.