Азонттама асу мокшалять, мастерть Николай Цилигинонь колга
Кадошкинскяй райононь Адаж вели командировкас якамстонк улеме мокшалять Николай Цилигинонь ширеса. Николай Александровичень мархта васьфтемс саме мяльс аф стак. Тяда инголе лама шнамань вал кулеме колганза Адажэряйхнень эзда. Сон, кле, Кулибиноньке—маштсы семботь. Петьсы и компьютерть, и машинать, и тракторть, и муськомань машинать, и телевизорть… Пирьфоц пяшксе жуватада. Ули мастерскоец, коса тиенди кенкшт, вальмат, кухоннай гарнитурхт, кроватть, стулхт и лама мезе лия. Сяс, Адажу самстонк, эстокиге вешеськ Цилигиттнень кудснон, конань инголе васьфтемазь азорсь Николай Александрович. Эстокиге шарфтоме мяль кирпицьста строяф мазы кудть лангс. Пайгокс ащи—тяфта мярьгольхть колганза атяньке-бабаньке. Цебярь азоронь кядсь няевсь марнек пирьфса.
Мокшалясь Николай Цилигин шачсь Адажса колхозниконь лама идень семьяса. Вете иттнень ёткста сон лувксс коре инь мекольцесь—сембода ёмлась. Тяни эряфоц кемоста сотф шуфтста керсемать и эздонза паршиень тиендемать мархта. Но аф эстокиге Николай Цилигин кярьмодсь тянди.
Армияса служамда меле мрдась Адажу, вете кизот автобусонь водителель Кадошкинань дорожнай предприятияса. Меле валомне кярьмодсь шуфтть мархта работати. Кизефтине, ульсть-аш родсост-плямасост тя тевса асу ломатть. Николай Александрович лятфтазе щенянц—щаванц брадонц Павел Великановонь. Павел Сергеевич эсь вийса тонадозе шуфтть мархта работать. Тиендсь наличникт, мебель. Кота кизоса марась голландка. Зрнянь кядь ломанть асушиц ётась Николай Александровиченди. Мокшалясь, лама кизода меле, эсь уноконцты максозе щенянц лемонц.
Николай Цилигин, кода шарьхкодевсь, ломанць аф сятнень эзда, кит лама азондыхть эсь колгаст. Но машты кядь, асу мокшалять квалма корхтайхть тевонза. Кда шуфтста сяда оцю паршиень тиендемати кярьмодсь оцюста ни, то ручкат-месть точсесь нинге школаса тонафнемстонза.
«12 вольтонди станоконя тиень, эста моторхт ашельхть, сяс тевс нолдайне машинань «пянакудонь» моторнять. Вельденза и точсень ручкат. Вешендень стама шуфтт, конатнень ульсь кода карамс потмоснон, а меле тоза ладямс стерженть. Кепотьксонди, тя тевонди ладясь ушторсь. Тяфта и тиендень тяштеманди ручкат. Нльне мишендине синь—50 трёшник фкять инкса анцень»,—лятфни Николай Александрович.
Водителькс работамдонза меле васенда одкстоптозе диванть. Эста ни рьвяяфоль, шачсь оцю стирец Светлана. Николай Цилигин тись шуфтста диванти од «боковушкат», тага кой-мезе. Фкя содафоц, няемок диванть фотографиянц, шарфтсь мяль лангозонза. Коста, кле, сявить тяшкава мазыть? Мокшалясь азозе, што тя самай ташта диванцна, аньцек тяни одкстоптф. А меле фкя-фкянь мельге тусть закасне—табуреткат, шрат, кенкшт, вальмат… Тя лувксть поладозь кухоннай, спальнай гарнитурхне, шкафне, кроваттне.
Мярьгомс, што Николай Цилигин мастер аньцек шуфтть мархта работамать коряс—тя аф азомс мезевок! Сон «шарьхкоди» техникаса, кда мезевок синневи, эстокиге петьсы. А нинге кочкси и тиенди тракторнят, лядемкат. И тянь семботь няеськ мастерскойсонза улемстонк. Пцтай анокста ащесь уноконцты Павликонди казнесь—тракторнясь. Аш кода аф шнамс сонцень мастерскойть—оцю, валда, лямбе. Ушневи, вдь Николай Александрович тись кшнинь голландканя. Павликонь тракторнянц ваномста водителеньке Иван Иванович кизефтезе мокшалять: «А кода сонь лихтьсак ульцяв? Кенкшне ёмлат тя тевонди?» Николай Цилигин отвечась: «Срафтса-калафтса стенать, коса кенкшсь и лихтьса, а меле меки мараса». Вов тяфта! Мастерскоенц стенанц одукс тиеманц сон стакакс-сталмокс аф лувондсы!
Вастста вастс шашфневи баня. Тяфтамовок тись Адажень эряйсь Николай Цилигин. Кшнинь фургонть тиезе лямбокс, вельхтязе железаса. Потмосонза ули парной, ваймамань комната, душевой, туалет. Баняста ляйти моли шуфтонь седня… А кудботмосонза ули афкуксонь сауна. Сонцень кудть строямста Николай Александрович сивотькшнесь ломатть—оцю тефнень тиемс, а семботь лиять тиендезе сонць. Эряма васта путсь эсь тядянц и алянц кудснон юрхтс.
Мокшалять рьванц, фельдшер-ско-акушерскяй пунктонь фельдшерть Татьяна Цилигинать колга лятфнеме газетать ётай номеронц эса. Татьяна Валентиновна шачемас коре Теньгушевскяй районцта, а судьбась содафтозе мокшень цёрать Николаень мархта. И вов ни аф фкя кемотть киза эряйхть фкя-фкянь шарьхкодезь, фкя-фкянди лездозь. И сембе пингть Татьяна Цилигина работай фельдшеркс.
Мирдсь и рьвясь—афкуксонь труженикт. Кирдихть потяма вете тракст, тувот, сараст. Пересост касфнихть модамарьхть, перень сёрот.
Цилигиттнень кафта стирьсна. Светлана Николаевна эряй Подмосковьяса. Марина Николаевна тонафни Саранскяйса врачекс. Синь сидеста сашендыхть Адажу. Николай Александрович и Татьяна Валентиновна фалу синь учсазь, лажаткшнихть теест.
Татьяна АЛЬШИНА.