«МИНЬ, МОКШЭРЗЯТНЕ, РОССИЯНЬ ГОСУДАРСТВАНЬ ПУРОПТЫ НАРОТТНЕНЬ ЭЗДА ФКЯСЬ!»

Кода ни пачфнеськ лувиеньконди, 2 сентябрьста Ковылкино ошса «Шумбрат» V-це Межрегиональнай фестивальть пингста ётафтовсь Мордовскяй (мокшень и эрзянь) народонь Межрегиональнай общественнай организациять Исполкомонц келептьф заседанияц.
Исполкомонь членда башка, заседанияса тяфта жа работасть Россиянь Федеральнай Собраниянь, Мордовиянь Оцюнянь и Правительствань, Администрациянь, Государственнай Собраниянь, Республикань высшай образованиянь представительхть.
Сембе кизефкснень коряс, конат ванфтольхть Исполкомть заседанияса, пуромфне састь марстонь мяльс.

Мордовскяй (мокшень и эрзянь) народонь Межрегиональнай общественнай организациять председателец, профессорсь Ю.А.Мишанин :
—Мордовскяй (мокшень и эрзянь) народонь Межрегиональнай общественнай организациять сембе тевонза и мероприятиянза водендафт сянди, штоба ванфтомс и виияфтомс мокшэрзянь национальнай культурать, мокшень и эрзянь кяльхнень, национальнай промыслатнень и ремеслатнень, а стане жа кемокстамс межнациональнай и межкультурнай соткснень российскяй нациянь нароттнень ёткса кода Мордовия Республикаса, стане и Российскяй Федерациянь лия субъекттнень эса, коса компактнайста эряйхть мокшэрзят.
Лятфтасайне кой-конатнень эздост, конат ётафтовсть эряфс мекольдень Исполкомонь заседанияда меле. Кода тинь мяляфтсасть, Исполкомонь мекольце заседанияса минь фкя мяльса примаськ-кемокстаськ Донецкяй и Луганскяй Народнай Республикатнень эса соотечественниконьконь араламанкса специальнай военнай операциять ётафтоманц коряс заявлениять, конань эса минь кирдьсаськ СВО-ть и ся политикать ширенц, конань ётафнесы странаса Россиянь Президентсь В.В.Путин.
И тя заявленияньке кеподсь обществасонк цебярь мяльхть-арьсемат!
Тяконь ули кода азомс митингть колга, конань минь ётафтоськ республикань Общественнай палатать мархта Саранск ошень Победань площадьса. Пингстонза минь тяфта жа кирдеськ СВО-ть и Россиянь Президентть В.В.Путинонь политиканц ширеснон.
Сяльде минь лемдеськ Исполкомонь Президиумть келептьф заседаниянц мокшэрзянь национальнай культурать, мокшень, эрзянь и государственнай лия кяльхнень ванфтомаснон-виияфтомаснон коряс республикань Государственнай программать эряфс ётафтоманцты. Пингстонза Государственнай программать эряфс ётафтоманц коряс макссть отчётт республикань министерствань и ведомствань представительхне и лия исполнительхне. И ули кода азомс: Государственнай программась ётафневи эряфс тевонь содазь и лац.
Тяфта жа минь инициативаньконь коряс Мордовияса ётафтовсь Тядянь-алянь кялень учителень Республиканскяй форумсь. И тяса тейне пара пачфтемс нинге фкя цебярь куля. Ня шитнень Москуса, федеральнай уровеньца, кемокстафт 9, 10 и 11 классонди мокшэрзянь литературань тонафнемань программатне. Синь сёрмадозень Межрегиональнай организациянь Исполкомонь членць, педагогическяй наукань докторсь, профессорсь Александра Михайловна Каторова.
Цебярь работа Межрегиональнай организациясь и сонь Исполкомоц тяфта жа ётафтсть «Волгась—ялгаксшинь ляй» Международнай этнокультурнай экспедициять, «Морай шуфта» шуфтонь керсиень Межрегиональнай фестивальть и «Сабантуй» велень Всероссийскяй илать, «Акша келу», «Раськень озкс» и «Кургоня» мокшэрзянь национальнай илатнень, Од ломанень Всероссийскяй форумть, «Кулдор-Калдор» финно-угорскяй народонь рахсемань-пеетькшнемань фестивальть и лама лия эрявикс мероприятиянь анокламста и ётафтомста.
Азондан оцю сюкпря Исполкомонь ся члеттненди, конат вятихть оцюдонга оцю работа мокшэрзянь национальнай культурать, койхнень-обуцятнень, мокшень и эрзянь кяльхнень ванфтоманкса-виияфтоманкса Россиянь лия региоттнень эса, коса компактнайста эряйхть мокшэрзят.
И тейне ули кода азомс: сембе минь мероприятияньке няфнесазь—минь, мокшэрзятне, фалу маряськ и марясаськ эсь пряньконь Россиянь лама национальностень фкя народонь пяльксокс, кода странань государствань пуропты нароттнень эзда фкясь.
Сяс минь молеме и фалу карматама молема омба масторонь идеолокнень и теест лездыхнень мяльснон-арьсемаснон и тевснон каршес, конатнень вельде синь ёрайхть аф аньцек лафчептомс, но и срафтомс-калафтомс Россиять.
Мордовиянь Государственнай Собраниянь депутатсь, «Од веле» региональнай общественнай организациять председателец Е.Е.Ледяйкин:
—Васенцекс, конешна, минь аф кирдьсаськ ся проекттнень ширеснон, конатнень Эстониять вельде кой-кит тяряфнихть ётафтомс эряфс Россиять каршес. Сяс минь Исполкомоньконди эряви видеста азомс: минь вестевок ашеськ кирне и вестевок аф карматама кирнемост тя или лия проекттнень ширеснон, конатнень вельде омба масторста тяряфнихть работамс минь странаньконь—Россиять каршес!
Сяс тячи тейнек сембонди социальнай сетьтнень вельде эряви пачфтемс тя мяленьконь народти!
Омбоцекс, минь ули Мордовскяй (мокшень и эрзянь) народонь Межрегиональнай общественнай организацияньке, кона вятьсыне общественнай политическяй сфераса сембе тевоньконь. Сяс мокшэрзянь Всероссийскяй национально-культурнай автономиянь тиемать колга идеяти монь фкя лацонь мялезе нинге аш.
Сонь аф кенордазь эряви ваномс сембе ширде. И аньцек тяда меле коряванза самс фкя мяльс.
Российскяй Федерациянь сенаторсь, Россиянь финно-угорскяй народонь Ассоциациять председателец П.Н.Тултаев:
—Кизефкста, конат тячи ащихть минь инголенк, лама. И сембе синь эрявихть пяшкотькшнемс эсь пингстонза. Сяс тейнек эряви васетькшнемс сяда сиденяста.
Васенцекс, мекольдень пингть, койсон, минь кода-бди ушедоме виздема азондомс: кле, минь, эрзятне, мокшетне и шокшетне,—мокшэрзянь фкя народ. Сявсаськ, кепотьксонди, татаронь народть, конань «Сабантуй» Всероссийскяй илац аф кунара ётафтовсь Мордовия Республикаса. Мон улень тя иласа и ушедонь содама: татаронь народсь ащи-пуропневи 17 этническяй группаста. Ётксост—Крымскяй, Поволжьянь, Оренбургскяй, Казанскяй, Астраханскяй, Мордовиянь и странань татаронь лия этническяй группатне. Но сембе синь марса—тя татаронь фкя народ!
Тякоть ули кода азомс удмуртонь, мариецонь, коминь и лия нароттнень колга.
Вов и тейнековок, мокшэрзятненди, аф эряви юкснемс марстоньшиньконь колга.
Омбоцекс, азса мокшэрзянь Всероссийскяй национально-культурнай автономиянь тиемать колга мялезень. Сон лисенди ся опытть эзда, кона ули ни Россиянь общественно-политическяй пространстваса.
Кепотьксонди, ули мариецонь Всероссийскяй национально-культурнай автономия. И мезе лисенди? Тя аньцек вяти мариецонь общественнай лия организациятнень мархта конфликттненди.
Минь, мокшэрзятнень, ули Межрегиональнай общественнай организацияньке, сонь Исполкомоц и мокшэрзянь народонь съездсь, конат машфнесазь сембе прябаланьконь и ётафнесазь эряфс сембе кизефкснень, конат, келепнемок тевс нолямань сфераснон, тиендьсазь мокшэрзянь национальнай и профессиональнай культурать, мокшень и эрзянь кяльхнень ламода сяда виикс и эрявиксокс.
Сяс автономиять коряс кизефксть эряви ваномс нинге аф весть, мезевок фкя-фкянь эзда аф сёпондомок.
Кда корхтамс ся проектть колга, конань ёрайхть ётафтомс минь каршезонк Эстонияса, эряви азомс—тя эсь народонь и странань мима. Сяс минь фалу карматама работама тя и лия проекттнень каршес, конат срхкафневихть вятемс, вятевихть или арьсекшневихть вятемс Россиять и минь лама национальностень народоньконь каршес!
В.НЕСТЕРОВ.

Последние новости

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

В Мордовии развивается система патриотического воспитания

В рамках регионального проекта «Патриотическое воспитание граждан» национального проекта...

Бизнес-десант посетил Ромодановский и Лямбирский районы

Третий год в Мордовии в рамках национального проекта «Малое...

ПЕТРОФНЕНЬ СЕМЬЯСНА—ИНЬ ОЦЮСЬ АРГАСА

Атюрьевскяй райононь Арга велесь кирди Петрофнень вельде. Тячи тяса...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь ошнень эзга ётафневи «Волга—река мира. Диалог культур волжских народов» Международнай этнокультурнай экспедициясь-фестивальсь. Тядде сон пуропневсь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа» лем ала форум. Сонь аноклазе и ётафтозе «Российскяй Федерациянь финно-угорскяй нароттнень Ассоциациясна» общероссийскяй общественнай организациясь...